Yelemis 20:1-6
Nqe cim:
“Txhua tus yuav ntxub nej vim nej yog cov uas ntseeg kuv, tiamsis tus uas ua siab ntev mus txog hnub kawg tus ntawd yuav dim.” (Malakaus 13:13)
Lug nug rau sawvdaws xav:
– Vim licas Pasehus kom luag nplawm thiab muab saw hlau xauv tus cevlus Yelemis?
– Tomqab uas tau tso dim, tus cevlus Yelemis tau ua dabtsi?
– Niaj hnub nimno, thaum mus tshajtawm tus Tswv lub npe peb pheej ntsib tej kev sim siab twg?
Pasehus yog ib tug povthawj tus tub thiab yog ib tug thawj saib haujlwm hauv lub Tuamtsev. Yog ib tug ua tus Tswv haujlwm, tsimnyog Pasehus yuav tsum txhawb tus cevlus Yelemis tes haujlwm, tiamsis nws ho “kom luag nplawm” thiab “muab saw hlau xauv” tus cevlus Yelemis kotaw vim tau tshajtawm Vajtswv Txojlus ceebtoom txog Vajtswv kev txiav txim rau lub nroog Yeluxalees (Yelemis 19:14-15; nqe 2). Keebtiv yog vim Pasehus tsis xav ntseeg tej lus tseeb ntawd thiab tsis xav kom tus cevlus Yelemis tshajtawm Vajtswv tej lus ntxiv lawm.
“Saw hlau xauv” yog ib txojkev tsimtxom uas txaus ntshai heev thaum tus neeg muaj txim raug muab saw hlau khi dab teg dab taws. Qhov xav tsis thoob yog tus cevlus raug “xauv” rau ntawm ib qhov chaw uas sawvdaws pom, “ze rau ntawm lub Roojvag Npeenyamees theem siab ntawm lub Tuamtsev.” Ntawd yog qhov chaw uas cov pejxeem yooj yim saib pom tshajplaws. Tus cevlus Yelemis ke raug mob sab nqaij tawv, ke raug mob hauv siab ntsws. Nws raug hem ntau zaug ua ntej lawm tiamsis zaug no yog thawj zaug nws raug tsimtxom. Xav hais tias tomqab ib hmos raug tsimtxom txajmuag ntsuav, ces tus cevlus Yelemis yuav tseg thiab tsis cevlus ntxiv lawm. Tiamsis qhov tseeb tsis yog li ntawd. Hnub tomqab, thaum nyuam qhuav tau tso dim, tamsim ntawd tus cevlus Yelemis twb cevlus txog tus Tswv txojkev txiav txim rau Yudas. Hais txog Pasehus tus kheej, qhov uas tis nws lub npe hu ua “Kev Kub Ntxhov Txhua Qhov” lossis “ntshai kawg rau txhua fab”, yog tej lus cev tseg hais tias nws thiab nws tsev neeg nrog rau tagnrho lub nroog Yeluxalees yuav poob rau cov Npanpilos txhais tes (nqe 4-6). Txojkev ntshai yuav nyob puagncig txhua fab.
Tus cevlus Yelemis tsis qaug zog thaum ntsib kev sim siab hauv kev ua haujlwm. Saw hlau khi thiab hlua tawv nplawm tav tsis tau nws kev ua haujlwm tshajtawm Vajtswv Txojlus. Nyeem tagnrho phau ntawv Yelemis, peb yuav pom hais tias tomqab ntawd nws tseem raug hem tua povtseg, raug iab liam, raug hais lus nkaug thiab raug kaw, raug muab pov hauv qhov tshij thiab ntsib ntau yam kev sim siab hauv kev ua haujlwm, tiamsis nws yeej tiv dhau thiab ncaj ncees mus txog thaum kawg.
Niaj hnub nimno, thaum mus tshajtawm tus Tswv Txojmoo Zoo cawmdim, peb pheej ntsib ntau kev tawmtsam vim dab Ntxwsnyoog pheej nrhiav ntau yam los tav peb haukev. Nws yuav siv peb tej phoojywg, tej txheeb ze hauv tsevneeg los tawmtsam thiab ntxub peb. Qee zaug peb tseem raug ntes, raug ntaus thiab raug kaw nrho. Ntawd yog tej kev sim siab uas tus ua tus Tswv haujlwm yuav ntsib. Tswv Yexus tau hais ua ntej hais tias: “Txhua tus yuav ntxub nej vim nej yog cov uas ntseeg kuv, tiamsis tus uas ua siab ntev mus txog hnub kawg tus ntawd yuav dim” (Malakaus 13:13). Thov tus Tswv pub rau peb paub vamkhom Nws txoj koob hmoov kom muaj lub siab tawv thiab khov kho ua tus Tswv haujlwm txawm yuav ntsib tej kev sim siab twg los xij.
Thov Vajtswv,
Tus Tswv, txawm yog nyuam yaus yuav raug lwm tus ntxub vim Koj lub npe, los thov Koj pub nyuam yaus muaj lub siab tawv thiab ua siab ntev kom tsis qaug zog, paub vamkhom Koj txoj koob hmoov kom tiv dhau tej kev sim siab, mob siab; ua Koj tes haujlwm mus txog thaum kawg. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas muaj lub siab tawv ua tus Tswv haujlwm mus txog thaum kawg?
Nyeem Vajluskub hauv peb lub xyoos: Cov Thawjtswj 15
Kênh Youtube BHKTHN:
