Klei Aê Diê Blŭ: I Klei Yăl Dliê 29:19
Êlan kliăng: “3Ƀiădah brei diih duah êlâo hĭn ƀuôn ala mtao Aê Diê leh anăn klei kpă ênô Ñu, leh anăn Ñu srăng thiăm brei kơ diih jih jang mnơ̆ng anăn.” (Y-Mathiơ 6:33)
Klei êmuh ksiêm mĭn:
- Ya klei mtao Y-Đawit akâo brei kơ mtao Y-Salômôn?
- Ala mtao anak êkei nu dưi dôk mơ̆ng ya mta klei?
- Ya ngă bruă rŭ mdơ̆ng Sang Aê Diê jing yuôm bhăn?
- Ya klei drei srăng akâo kơ Aê Diê brei kơ pô hlăm klei drei wah lač grăp hruê?
Čiăng bi ruê̆ klei wah lač bi mni kơ Aê Diê kyua klei myơr mơ̆ng jih jang mnuih buôn sang Isarael kơ bruă rŭ mdơ̆ng sang yang, mtao Y-Đawit myơr leh klei wah lač ñu akâo kơ anak ñu jing Y-Salômôn. Mtao amâo akâo kơ anak ñu mâo klei mdrŏng sah, klei kdrưh kơang leh anăn klei dưi ƀiădah akâo kơ anak ñu mâo ai tiê kluôm ênŭm čiăng djă pioh 10 mta klei bhiăn, klei bi knăl leh anăn klei bhiăn Aê Diê, leh anăn čiăng kơ Y-Salômôn dưi rŭ mdơ̆ng sang yang mơ̆ng mtao Y-Đawit prăp êmiêt leh hŏng jih ai tiê.
Mtao Y-Đawit thâo klă ala mtao anak êkei ñu dưi dôk mơ̆ng klei gưt kơ 10 mta klei bhiăn đưm leh anăn klei bhiăn mơ̆ng Aê Diê (I Klei Yăl Dliê 28:7). Leh anăn mtao Y-Đawit ăt thâo Y-Salômôn jing mnuih Aê Diê ruah pioh rŭ mdơ̆ng sang yang kơ Aê Diê leh anăn tơdah anak êkei ñu ngă tui si klei Aê Diê čiăng snăn Ñu srăng “bi kjăp jhưng mtao ñu hlŏng lar” (I Klei Yăl Dliê 17:12). Kyua anăn, klei mtao Y-Đawit akâo hŏng jih ai tiê jing “Akâo kơ Aê Diê brei kơ Salômôn, anak êkei kâo, mâo ai tiê kluôm ênŭm” čiăng ngă tui si klei Aê Diê čiăng leh anăn jih ai tiê rŭ mdơ̆ng sang yang kơ Aê Diê, ñu thâo anei jing klei yuôm bhăn hĭn kơ klei dôk ala mtao ñu, bi dŭm klei mkăn msĕ si: klei mdrŏng sah, klei drưh kơang, klei dưi … Aê Diê srăng lŏ brei tơdah anak êkei ñu tui duah Khua Yang leh anăn mă bruă kơ Khua Yang hŏng jih ai tiê.
Hlăm klei hdĭp duh ƀơ̆ng dleh dlan anei, drei khăng rŭng răng leh anăn ai tiê tui duah klei mdrŏng sah, klei hĭng ang, klei dưi hrô kơ klei mă bruă kơ Khua Yang leh anăn ngă tui si klei Ñu čiăng. Ƀiădah dŭm klei ngă kơ anak mnuih rŭng răng hlăm dŭm ênuk amâo mâo klei mdê ôh. Êbeh leh 2.000 thŭn êlâo, Khua Yang Yêsu mtô kơ drei: “31Snăn đăm diih uêñ đei ôh leh anăn lač, ‘Ya drei srăng ƀơ̆ng huă?’ amâodah ‘Ya drei srăng mnăm?’ amâodah ‘Ya drei srăng hơô?’ 32Kyuadah phung tue tui duah jih jang mnơ̆ng anăn; leh anăn Ama diih hlăm adiê thâo leh jing yuôm diih mâo jih dŏ anăn. 33Ƀiădah brei diih duah êlâo hĭn ƀuôn ala mtao Aê Diê leh anăn klei kpă ênô Ñu, leh anăn Ñu srăng thiăm brei kơ diih jih jang mnơ̆ng anăn.” (Y-Mathiơ 6:31,33). Tui duah klei kpă ênô Aê Diê jing gưt asăp Ñu, tui duah Ƀuôn Ala Mtao Aê Diê jing dlăng kơ Ƀuôn Ala Mtao Aê Diê jing mta phŭn hlăm klei hdĭp leh anăn jao kơ Khua Yang kiă kriê kluôm ênŭm ai tiê pô.
Ară anei, brei drei ăt mâo “ai tiê kluôm ênŭm” ngă tui si Klei Aê Diê Blŭ leh anăn mâo đru kơ bruă rŭ mdơ̆ng Sang kkuh mpŭ kơ Ñu hlăm Sang Aê Diê. Drei amâo srăng čŏng pô dưi ngă ôh klei anăn ƀiădah brei drei akâo kơ Aê Diê srăng brei kơ drei leh anăn dŭm klei hơêč hmưi mkăn Aê Diê ăt srăng lŏ brei thiăm hlăm klei hdĭp drei tui si klei Ñu buăn leh.
Di ih dôk hmăng hmưi klei hơêč hmưi hlăm klei hdĭp anei amâo dah hŏng jih ai tiê mă bruă kơ Khua Yang leh anăn hluê ngă Klei Aê Diê Blŭ mơ̆?
Ơ Khua Yang, akâo kơ Ih brei kơ kâo “mâo ai tiê kluôm ênŭm” čiăng kơ kâo thâo gưt klei Ih mtô leh anăn mă bruă kơ Ih hŏng jih ai tiê, čiăng kâo thâo săng kơ dŭm klei Ih hơêč hmưi leh kơ kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 16:1-24
Kênh Youtube BHKTHN:
