Klei Blŭ Thâo Mĭn – 19/6/2022

907

 

Klei Aê Diê Blŭ: Klei Bi Hriêng 16:20-24

Êlan kliăng: “Ai tiê phung thâo mĭn gai klei ñu blŭ, leh anăn dưi mă ai tiê arăng. Klei blŭ siam jing msĕ si ksing hnuê, mmih kơ mngăt leh anăn klei suaih kơ asei mlei.” (Klei Bi Hriêng 16:23-24).

Klei êmuh ksiêm mĭn: Klei blŭ thâo mĭn mơ̆ng mphŭn mâo leh anăn ya klei mâo? Ya klei drei khăng ƀuh hlăm klei phung aê, ama blŭ hlăm gŏ sang? Si klei hmaĭ mơ̆ng klei blŭ kƀah thâo mĭn kơ phung anak čô? Ya klei brei drei ngă čiăng klei pô blŭ bi guh kơang Anăn Aê Diê leh anăn ba klei mđĭ ai kơ phung dôk hmư̆?

Mtao Salômôn mñă klă dua mta yuôm bhăn mơ̆ng klei blŭ thâo mĭn. Tal sa, klei blŭ thâo mĭn brei mâo mơ̆ng ai tiê thâo mĭn (êlan 20-22). Mnuih thâo mĭn jing phung thâo kriê pioh klei djŏ, mđing kơ Klei Aê Diê Blŭ mtô. Kyua anăn, klei blŭ thâo mĭn bi êdah ai tiê knang kơ Yêhôwa Aê Diê leh anăn mâo klei thâo mđĭ ai phung hmư̆. Hdră kñăm yuôm bhăn hĭn mơ̆ng klei blŭ thâo mĭn jing ba anak mnuih kơ phŭn klei hdĭp. Tal dua, klei blŭ thâo mĭn dưi bi êdah hlăm hdră thâo mĭn (êlan 23-24). Klei blŭ brei êdu êun, jăk siam, đri kơ phung dôk hmư̆ thâo săng kơ Aê Diê lu hĭn. Klei blŭ thâo mĭn mâo Mtao Salômôn lač : “Klei blŭ siam jing msĕ si ksing hnuê, mmih kơ mngăt leh anăn klei suaih kơ asei mlei.” Klei blŭ thâo mĭn jing jăk, êdu êun, mâo klei tŭ dưn ba klei suaih kơ asei mlei, mmih kơ mngăt.

Hlăm knăm dơr djiê mnuih Việt Nam, sĭt lač kơ klei bi hdơr hŏng mnuih djiê, boh nik phung aê, ama hlăm gŏ sang, arăng srăng lač bi êdah klei khăp, bruă klam hŏng gŏ sang leh anăn anak čô hŏng bruă ngă amâo djŏ hŏng klei blŭ ôh leh anăn ăt kăn đei bi êdah ai tiê ti êngao. Êngao anăn, hlăm đa đa gŏ sang, ăt mâo phung anak êka ai tiê kyua klei blŭ amâo thâo mĭn amâodah klei phung aê, ama ƀuah ăl kjham hlăk êjai đĭ ai ngêñ. Ăt mâo lu gŏ sang kruh rai kyua klei blŭ leh anăn bruă ngă kƀah klei thâo mĭn mơ̆ng phung amĭ ama hlăk êjai amâo dưi ư̆ ăn. Ăt kyua klei blŭ kƀah klei thâo mĭn anăn ngă bi êka klei bi mguôp plah wah aê čô, ama anak, amĭ anak leh anăn phung hlăm gŏ sang.

Akâo kơ Khua Yang đru kơ phung jing amĭ ama, boh nik phung ama, phung ung jing khua kơ gŏ sang jhŏng kah mbha, bi hriăm anak čô klei thâo mĭn mơ̆ng Aê Diê, đru kơ anak čô leh anăn phung mkăn thâo huĭ mpŭ kơ Aê Diê leh anăn mđing kơ hdră kñăm klei hdĭp pô kơ klei hdĭp. Drei ăt akâo kơ Khua Yang đru kơ phung amĭ ama thâo ư̆ ăn ai phĭ ngêñ čiăng mâo klei blŭ êdu êun leh anăn mmih msĕ si ksing hnuê, ba klei mơak kơ gŏ sang, thâo bi djŏ hlăm Sang Aê Diê leh anăn ala ƀuôn.

Drei akâo kơ Aê Diê đru pô bi mlih ya klei čiăng mâo klei blŭ thâo mĭn, bi mơak kơ Aê Diê, bi mơak kơ mnuih?

Wah lač: Ơ Khua Yang, kâo bi mni lač jăk kơ Aê Diê kyua Ih mñă kơ kâo kơ klei blŭ thâo mĭn. Akâo kơ Khua Yang brei kâo klei blŭ ba klei khăp, kpă ênô leh anăn klei hdĭp lă lar kơ phung hmư̆. Akâo kơ Khua Yang ăt brei kơ kâo mâo klei blŭ êdu êun ba klei jăk, klei bi hgŭm hlăm gŏ sang.

Dlăng Klei Aê Diê Blŭ hlăm tlâo thŭn: Klei Mmuñ Hđăp 81:1-16; 82:1-8

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Kênh Youtube BHKTHN:

https://www.youtube.com/c/bhkthn

Bài trướcLus Txawj Ntse – 19/6/2022  
Bài tiếp theoLời Nói Khôn Ngoan – 19/6/2022