Klei Aê Diê Blŭ: Y‑Mathiơ 19:7-9
Êlan kliăng: “Leh anăn Kâo lač kơ diih, hlei pô lui mô̆ ñu tơdah gơ̆ amâo tuôm tlĕ piu ôh leh anăn lŏ dôk mniê mkăn, ñu tlĕ piu yơh” (Y‑Mathiơ 19:9)
Klei êmuh ksiêm mĭn: Phung Pharisi bi êdah klei bi klăk hlăm klei Khua Yang Yêsu mtô leh anăn klei bhiăn Y‑Môis ya klei diñu kñăm čiăng? Si ngă Khua Yang Yêsu lŏ wĭt lač? Ya klei hriăm drei mâo kơ drei pô mơ̆ng klei anei?
Leh Khua Yang Yêsu mtô kơ boh yuôm kơ klei bi dôk ung mô̆, phung Pharisi lŏ êmuh ñu: “Snăn si ngă Y‑Môis mtă brei arăng ngă hră lui mô̆ leh anăn lui gơ̆?” (êlan 7). Diñu čiăng bi luč knuih Khua Yang tơdah diñu bi êdah klei bi klăk plah wah klei Khua Yang mtô leh anăn klei bhiăn Y‑Môis. Phung Pharisi hrêč mă Klei Mtô Mñă Klei Bhiăn 24:1-4, leh anăn lač Y‑Môis brei dưi bi lui ung mô̆, kyuanăn tui si klei bhiăn phung Raƀi Yuđa ăt mtô leh anăn tŭ kơ klei bi lui ung mô̆.
Khua Yang Yêsu lŏ wĭt lač brei phung Pharisi thâo ya ngă Y‑Môis čih hĕ msĕ snăn hlăm hră Klei Mtô Mñă Klei Bhiăn, “Kyuadah ai tiê diih khăng, snăn Y‑Môis tŭ brei diih lui mô̆ diih, ƀiădah mơ̆ng mphŭn amâo djŏ snăn ôh” (êlan 8). Boh blŭ “khăng” čiăng lač kơ ai tiê amâo čiăng kmhal kơ klei soh, amâo čiăng ngă klei bi grăng ôh ƀiădah dôk kram hlăm klei soh leh anăn klei kđeh tluh. Tơdah ung amâodah mô̆ tlĕ piu bi khăng ai tiê amâo čiăng kmhal kơ klei soh ôh, ăt dôk nanao hlăm klei soh, ngă kơ klei bi dôk ung mô̆ diñu amâo lŏ mâo klei jăk ôh. Kyuanăn yơh găn hŏng Y‑Môis, Aê Diê tŭ hŏng klei mgô̆ kơ klei brei bi lui ung mô̆. Khua Yang Yêsu lŏ mñă kơ phung Pharisi, mơ̆ng mphŭn “klei bi lui ung mô̆” amâo djŏ klei Aê Diê čiăng kơ anak mnuih ngă ôh. Tơdah amâo djŏ kyua klei tlĕ piu, jih jang kyua klei mkăn Aê Diê amâo tŭ ôh hlăm klei bi lui ung mô̆, mơ̆ng klei anăn Aê Diê brei ƀuh păt čiăng jih phung Pharisi lač mdê leh anăn phung Yuđa lač mbĭt dôk ngă klei knhông leh anăn tlĕ piu sơăi!
Hruê anei, klei bi lui ung mô̆ ti lăn ala anei ƀrư̆ hruê ƀrư̆ đĭ lar, wăt čar phung đăo kơ Krist, klei bi lui ung mô̆ ăt lu snăk mơh, ngă kơ lu mnuih tŭ klei bi hmăi jhat mơ̆ng klei bi lui ung mô̆ anăn. Drei tuôm hmư̆ mâo lu phŭn kơ klei bi lui ung mô̆ djŏ snăk. Găl snăk pioh mgang kơ klei bi lui ung mô̆. Jing phung đăo, tơdah mâo klei bi keh koh, klei amâo bi djŏ kyua sa mta klei, brei drei ksiêm dlăng kơ ai tiê drei pô čiăng ƀuh ya klei ngă kơ drei dôk “bi khăng ai tiê” amâo tŭ ôh kơ drei jing mnuih awăt leh anăn mâo klei soh, amâodah kƀah klei thâo săng brei kơ mô̆ amâodah kơ ung pô. Bi blŭ hrăm bĕ hdơ̆ng ung mô̆ hŏng klei kpă leh anăn hưn jih klei dleh dlan dua ung mô̆ kơ Khua Yang čiăng Ñu atăt gai leh anăn bi hlao. Hdơr bĕ klei Aê Diê čiăng tơdah Ñu atăt drei hlăm klei bi dôk ung mô̆ jing Ñu čiăng drei mă tŭ klei jăk jĭn, klei mơak mñai Ñu brei.
Mâo mơ̆ klei soh hlăm klei khăp, hlăm klei bi dôk ung mô̆ brei drei bi khăng ai tiê hŏng klei Khua Yang mtă?
Wah lač: Ơ Khua Yang, lač jăk kơ Ih kyua klei Ih mtô hlăm klei bi dôk ung mô̆ Ih mkŏ mjing leh. Đru kâo amâo bi khăng ai tiê ôh hŏng klei Ih bi hriăm čiăng kơ klei bi dôk ung mô̆ leh anăn klei khăp kâo dưi mă tŭ klei jăk jĭn Ih brei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Y‑Samuel 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
