Mathais 19:7-9
Nqe cim:
“Kuv qhia rau nej hais tias, yog leejtwg tus pojniam tsis tau mus deev hluas nraug, nws cia li muab nrauj lawm, yog nws mus yuav dua pojniam, ces yog nws deev luag pojniam.” (Mathais 19:9)
Lus nug rau sawvdaws xav:
– Lub homphiaj cov Falixais hais txog qhov kev tawmtsam ntawm Tswv Yexus tej lus qhia thiab Mauxes txoj kevcai yog dabtsi?
– Tswv Yexus teb zoo li cas?
– Peb kawm tau zaj kawm twg rau yus tus kheej hais txog qhov teebmeem no?
Kiag lub sijhawm tomqab uas Tswv Yexus qhia txog qhov muaj nqis ntawm kev sib yuav, cov Falixais “rov nug Yexus hais tias, vim li cas Mauxes ho tso cai rau tus txivneej ua ntawv nrauj rau nws tus pojniam, ces nrauj tau?” (nqe 7). Lawv xav ua kom tus Tswv lub koob npe poob qis, lawv thiaj hais txog qhov cuam tshuam ntawm tus Tswv tej lus qhia thiab Mauxes txoj kevcai. Cov Falixais muab II Kevcai 24:1-4 los thiab hais tias Mauxes txoj cai pub sib nrauj, raws li keebkwm cov neeg Yudais cov thawjcoj yeej qhia thiab pub sib nrauj.
Tswv Yexus thiaj teb rau cov Falixais paub tias, vim li cas Mauxes ho sau cov lus ntawd rau hauv II Kevcai, “Qhov uas Mauxes tso cai rau nej nrauj pojniam, twb yog vim nej tawv ncauj tsis muaj neeg hais tau. Tiamsis thaum chivkeeb yeej tsis muaj li ntawd .” (nqe 8). Lo lus “tawv ncauj” hais txog lub siab uas tsis kam lees txim, tsis kam hais kom haum, tiamsis pheej too hau ntso mus ua kev txhaum raws li kev ntshaw. Thaum tus txivneej lossis tus pojniam mus deev hluas tsis kam los lees txim, yim hnub yim ua txhaum ntxiv, nkawd ua rau txojkev sib raug zoo hauv kev ua txijnkawm ntxhov. Twb yog li ntawd Vajtswv txoj cai uas Mauxes sau thiaj raug yuam kom pub cai sib nrauj. Tswv Yexus yeej hais meej ib zaug ntxiv rau cov Falixais tias “sib nrauj” tsis yog Vajtswv txojkev npaj rau tibneeg thaum chivthawj thiab yeej yuav tsis muaj ib zaug pub cai ua li ntawd. Yog tsis vim qhov uas mus deev lwm tus sab nraud ces txhua lub vimchiv puavleej tsis pub cai sib nrauj, dhau qhov ntawd tus Tswv kuj hais tias feem ntau cov Falixais thiab cov neeg Yudais tabtom ua txhaum kev nkauj kev nraug lossis deev luag pojniam luag txiv!
Nimno, txojkev sib nrauj nyob hauv ntiajteb no yim hnub yim muaj ntau, kiag cov tebchaws uas ntseeg Yexus los twb muaj thiab, tej kev sib nrauj yeej muaj coob kawg nkaus ua rau tej neeg sawvdaws pom tus qauv tsis zoo. Peb kuj hnov muaj qee nkawm niamtxiv sib nrauj muaj timkhawv meej daws tau nws qhov kev nrauj. Tiamsis yog tus ntseeg Yexus, thaum muaj tej kev tsis sib haum, muaj kev sib cav sib ceg vim ib yam dabtsi twg, peb yuav tau ua tib zoo saib saib yog tim yam twg tabtom ua rau peb “lub siab tawv”, tsis paub yus qhov txhaum, ua tsis tau lossis tsis muaj kev ua siab ntev rau tus txijnkawm. Cia li sib qhia siab thiab ob leeg los txhos caug ua ke muab tej ntawd qhia rau tus Tswv thov Nws pab kho. Cia li nco ntsoov hais tias Vajtswv txojkev npaj kom peb muaj txijnkawm yog ua kom peb muaj kev kaj siab, zoo siab.
Thov Vajtswv,
Tus Tswv, ua Koj tsaug vim Koj Txojlus qhia txog kev sib yuav. Thov Koj pab kom nyuam yaus tsis ua neeg tawv ncauj thaum Koj qhia, nyuam yaus nkawm niamtxiv thiaj muaj kev sib hlub thiab tau txais Koj tej koob hmoov. Nyuam yaus tuav Tswv Yexus lub npe thov, Amees.
Puas muaj tej kev txhaum nyob hauv txojkev hlub, kev sib yuav ua rau peb “tawv ncauj” tsis mloog tus Tswv tej lus qhia?
Nyeem Vajluskub hauv peb lub xyoo: I Xamuyees 17
Kênh Youtube BHKTHN:
