Klei Aê Diê Blŭ: I Klei Yăl Dliê 29:1-9.
Êlan kliăng:
“Êbeh kơ anăn čiăng lŏ thiăm kơ jih jang mnơ̆ng kâo mâo leh pioh kơ sang doh jăk, kâo mâo leh ngăn drăp kâo pô mah leh anăn prăk, leh anăn kyuadah kâo khăp kơ sang Aê Diê kâo, kâo brei mnơ̆ng anăn kơ sang Aê Diê kâo,… Snăn hlei pô čiăng myơr ñu pô pioh brei kơ Yêhôwa hruê anei?” (I Klei Yăl Dliê 29:3, 5b).
Klei êmuh ksiêm mĭn: Mtao Y-Đawit lač ya hdră kñăm bruă rŭ mdơ̆ng sang yang? Êlâo kơ iêu mthưr klei myơr, si mtao ngă bi hmô? Ya klei tŭ mơ̆ng bruă iêu mthưr myơr kơ bruă rŭ mdơ̆ng sang yang? Mơ̆ng ya mta klei dưi mâo klei tŭ msĕ snăn? Si ngă drei hluê ngă klei hriăm anei?
Leh jao hră rup kơ bruă rŭ mdơ̆ng sang yang mơ̆ng Khua Yang bi êdah kơ Y-Salômôn, anak êkei pô, Mtao Y-Đawit bi kbĭn phung Sang Aê Diê čiăng iêu mthưr myơr kơ Aê Diê. Mphŭn pŏk klei iêu mthưr, Mtao mñă klă hdră kñăm rŭ mdơ̆ng, “Kyuadah sang yang amâo djŏ pioh kơ mnuih ôh, ƀiădah srăng pioh kơ Yêhôwa Aê Diê” (êlan 1b). Klei anei lač kơ phung drei đăm ktưn hưn ôh sang yang pô amâodah mkă bi lông hŏng sang yang mkăn, ƀiădah brei hdơr rŭ mdơ̆ng sang yang jing kơ Khua Yang leh anăn đru grăp čô mnuih ƀuh Khua Yang hlăm dŭm klei bi kƀĭn hlăm sang yang anăn.
Mơ̆ng êlan 2-5a, Mtao Y-Đawit hưn mdah hŏng Sang Aê Diê, “Snăn kâo duah bi mâo leh kơ sang Aê Diê kâo tui si kâo dưi” (êlan 2a) leh anăn “kyuadah kâo khăp kơ sang Aê Diê kâo” (êlan 3a), anăn Mtao myơr leh lu êdi. Leh bi hmô klei myơr mơ̆ng mtao jing khua gĭt gai prŏng hĭn, mtao iêu mthưr “Snăn hlei pô čiăng myơr ñu pô pioh brei kơ Yêhôwa hruê anei?” (êlan 5b). Klei tŭ jing phung gưl khua gĭt gai Israel mâo phung khua kơ sang ama, phung khua găp djuê, phung khua kơ sa êbâo čô leh anăn phung khua kơ sa êtuh čô, leh anăn khua prŏng kiă kriê bruă mtao, jih jang hluê ngă, mơak myơr kơ bruă rŭ mdơ̆ng Sang Aê Diê (êlan 6-8). Knhal tuč jing jih jang mnuih ƀuôn sang ăt hơ̆k mơak, jih ai tiê myơr ngă kơ mtao Y-Đawit hơ̆k mơak kyua ênoh myơr mơ̆ng grăp čô mnuih lu hĭn ênoh myơr mơ̆ng sang mtao (êlan 9).
Kyua ya klei dŭm gưl phung khua gĭt gai ala čar leh anăn mnuih ƀuôn sang mơak myơr snăn? Êlâo hĭn, jih jang mnuih thâo săng klei myơr jing myơr kơ Khua Yang leh anăn hŏng ai tiê khăp kơ Khua Yang, khăp kơ sang yang Aê Diê. Boh blŭ “mơak myơr” dưi lač lu blư̆ lač kơ ai tiê čŏng myơr kyua diñu thâo săng hdră kñăm mơ̆ng klei myơr. Tal dua, êlâo kơ iêu mthưr dŭm gưl phung khua gĭt gai leh anăn mnuih ƀuôn sang myơr, mtao bi hmô. Kyua klei mơak myơr mơ̆ng mtao jing klei mđĭ ai grăp čô mnuih jih ai tiê myơr. Pô ksiêm hriăm Klei Aê Diê Blŭ J. A. Thompson čih leh: “Phung khua gĭt gai srăng amâo ƀuh ôh klei myơr mơ̆ng phung biăp diñu tơdah amâo ba akŏ hlăm bruă anei.”. Anei jing klei hriăm prŏng prĭn kơ klei myơr leh anăn iêu mthưr klei myơr mơ̆ng Sang Aê Diê hruê anei.
Drei ih ai tiê mơ̆ sĭt myơr kơ Khua Yang?
Ơ Khua Yang, bi mni lač jăk kơ Ih kyua brei leh kâo đru mguôp hlăm bruă rŭ mdơ̆ng Sang Yang Aê Diê ăt msĕ mơh lu bruă mkăn. Akâo kơ Ih đru kâo amâo djŏ knŏng iêu mthưr hŏng boh blŭ đuč ôh ƀiădah bi hmô myơr jih ai tiê kơ Sang Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
