Mathiơ 19:27-30
“Yêsu khan: Inh khan kơ iĕm tơpă, bơngai bu achăng lê̆ hnam sư, ‘nhŏng oh sư, mĕ ‘bă sư, kon sư, mir ‘ba sư, yua kơ sư wă jang tơdrong Inh păng ră-roi tơdrong ‘nao ‘lơ̆ng kơ đe, 30 bơngai ‘noh dang ei ‘Bok Kei-Dei tơgŭm sư hloh loi kơ sư tam mă lui sơ̆, mă hnam, mă ‘nhŏng oh, mă mĕ ‘bă, mă kon, mă mir ‘ba, sư gô đei lơ hloh kơ sơ̆ tơpă. Sư kư̆m đei tơdrong anat anot yua kơ jang tơdrong Inh kơplah dang ei mơ̆n. Mă-lei ning-mônh sư gô arih ling lang ưh kơ đei layơ tôch.” (Markôs 10:29-30)
Nơ̆r jet tơchĕng pơwao:
– Pêtrôs jet Kră Yang tơdrong kiơ?
– Yua kơ kiơ sư jet thoi noh?
– Kră Yang Yêsu đei tơl nơ̆r lu bơngai pơhrăm păng Sư thoi yơ?
– Đơ̆ng ‘bai pơhrăm ‘nâu tơ’blŏk kơ bơ̆n tơdrong kiơ?
Đơ̆ng rŏng kơ mơ̆ng nơ̆r Kră Yang bơtho gah bơngai mơdrŏng păng Dêh char ‘Bok Kei-Dei, ‘bok Pêtrôs tang măt lu buăl sư jet Kră Yang, “Na Pêtrôs khan kơ Sư: Lu nhôn achăng lê̆ tôm tơdrong yua kơ kiơ̆ Ih, na lu nhôn gô đei kiơ?” (trong 27 BTTHĐ). Lu bơngai pơhrăm, lu sư hăm gơh mơ̆t tơ Dêh char ‘Bok Kei-Dei ưh? Păng lu sư achăng lê̆ tơdrong jang, hnam dơnŏ, buăl juăt, dôm tơdrong nai, păng pơhrăm iŏk tôi ‘long pơglang wă kơ kiơ̆ Kră Yang (Mathiơ 16:24). Lei na lu sư gô đei kiơ? Kră Yang sut lê̆ dôm tơdrong hiơ̆k tơtăm, tơdrong ưh kơ lui ngeh đơ̆ng lu bơngai pơhrăm păng Sư kơplah Kră Yang khan lu sư gô oei kơpal tang dŏ pơtao mơ̆n păng pơgơ̆r hơdai hăm Kră Yang kơplah Kră Yang jur, mă khan lei ră, ưh kơsĭ gô năr tuch luch lu sư ‘bôh tơdrong pŭn hiôk đơ̆ng lu sư achăng lê̆ tôm tơdrong wă kiơ̆ Kră Yang ôh, na mă lăm chăl dang ei, lu sư kư̆m mơn đei lơ tơdrong pŭn hiôk, tơdrong asong ăn đĕch, tơdrong dŏng tơgŭm ưh kơ băt dôm yơ đơ̆ng Kră Yang, dah lu sư tơnăp kiơ̆ Kră Yang păng bơ̆jang kơ Sư. Kră Yang kư̆m khan tơbăt hơđăl kơ lu sư dah lu sư tơnăp truh tôch, lu sư gô đei tơdrong arih ling lang.
Mă khan lei ră, Kră Yang kư̆m tơbăt kơ lu bơngai pơhrăm păng Sư, “Kư̆m đei lơ bơngai pơm tih dang ei, ning mônh sư jing iĕ. Kư̆m lơ bơngai jang tơdrong iĕ dang ei, ning mônh gô jang tơdrong jang tih.” (trong 30). Kră Yang wă tơ’blŏk kơ lu bơngai pơhrăm păng Sư ‘nĕ pơang khan kơdih đei mŭk tơmam lơ, ‘nĕ kơ pơang hli kơ bơ̆n jing pơ̆k huŏng păng ưh kơ keh jing, yua kơ tơdrong Kră Yang ăn kơjung kơđeh lăm chăl ‘nâu phara kơ tơdrong Kră Yang ăn tơ pơlei ‘lơ̆ng. Athei adrin lăm tơdrong yak năm kiơ̆ Kră Yang, ‘nĕ kơ yua kơ đơ̆ng tơdrong pơjei băl jing ba ăn tơdrong pơgăn kơ bơ̆n.
Dang ei, đei lơ bơngai lui lăm hnam akŭm lơ sơnăm bơih mălei ưh kơ băt hơđăl kơdih gơh mơ̆t tơ Dêh char ‘Bok Kei-Dei dah ưh? Tơdrong hiơ̆k tơtăm, ưh kơ lui ngeh pơm kơ bơ̆n bơ̆l hăl kơplah kiơ̆ Kră Yang yua kơ ưh kơ ‘bôh tơdrong pŭn hiôk păng nơ̆r Kră Yang ‘măn kơ bơ̆n. Bơ̆n kăl kơ băt hơđăl kơdih bơ̆n tơbral tơpă bơih păng lui sơng iŏk Kră Yang ưh? Kơplah băt hơđăl tơpă bơih đon lui bơ̆n hăm Kră Yang, bơ̆n kư̆ kiơ̆ Kră Yang kơjăp păng pơyơ̆r chăl arih bơ̆n kơ Sư, chu iŏk tơdrong đe pơm kơnê̆, chu tơplih minh ‘bar tơdrong tơ’bưh hăm Kră Yang chu iŏk achăng lê̆ lu tơdrong lơi yua lăm teh đak wă kiơ̆ Kră Yang păng pơm kiơ̆ thoi Kră Yang wă. Thoi ei na bơ̆n huay kơ đei tơdrong pơhlŭ păng huay kơ đei pơm glăi hăm tơdrong Kră Yang mơnat ăn.
Kơkuh kơ Kră Yang, apinh Ih tơgŭm inh kiơ̆ Ih kơjăp păng pơyơ̆r kơ Ih, đon lui huay kơ ngĭl ngŭl, kư̆m thoi lu tơdrong pŭn hiôk Kră Yang pơkă ăn kơ lu đe bu đĭ jơhngơ̆m bơ̆jang kơ Ih ding truh tôch, Krao khan yua anăn Kră Yang Yêsu Krist, Amen!
Bơ̆n hăm hơđăl bơ̆n lui kơ Kră Yang Yêsu păng gô iŏk tơmam apah ling lang đơ̆ng Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 17
Kênh Youtube BHKTHN:
