Klei Aê Diê Blŭ: Klei Bi Hriêng 21:24; 22:10
Êlan kliăng: “Suôt hĕ mnuih kreh mưč leh anăn klei bi mneh msao srăng ruê̆, klei bi tăng leh anăn klei dlao wač srăng tuč.” (Klei Bi Hriêng 22:10)
Klei êmuh ksiêm mĭn: “Mnuih kreh mưč” bi djŏ mguôp hŏng ya mta klei? Mtao Y‑Salômôn mtô, ya knhuah brei mâo hŏng “mnuih kreh mưč”? Ya klei tŭ dưn mơ̆ng klei ƀuah mkra hlăm klei kiă kriê Phung Sang Aê Diê ba kơ êpul êya?
“Mnuih kreh mưč” bi djŏ mguôp hŏng “klei mneh msao” leh anăn “klei bi tăng”, jing phŭn knhal kơ klei bi tăng mgăl leh anăn klei dleh dlan hlăm djăp êpul êya, mâo wăt hlăm Phung Sang Aê Diê mơh. Phŭn knhal hưn klă leh hlăm Klei Bi Hriêng 21:24 kyuadah “mnuih kreh mưč” jing pô mgao, dlăng kơ ñu pô yơh jing phŭn ti krah jih jang, amâo mđing uêñ kơ ai tiê, klei tŭ dưn pô mkăn leh anăn êpul êya ôh. Klei mgao ngă kơ “mnuih kreh mưč” mĭndah ñu pô yơh jing djŏ nanao leh anăn thâo săng pô mkăn klă hĭn kơ jih jang mnuih. Mnơ̆ng bi blah jhat ƀai hĭn “mnuih kreh mưč” yua jing klei blŭ yơh, kyuadah, klei blŭ mưč mač, klei blŭ mgao ênưih bi čuih ai truh klei bi mneh msao hĭn kơ sa blư̆ čăm.
Mtao Y‑Salômôn mtô, brei suôt mnuih kreh mưč kbiă đuĕ hĕ mơ̆ng êpul êya, kyuadah hlăm lu klei rŭng truh mơ̆ng mnuih, snăn “mnuih kreh mưč” yơh jing phŭn knhal nanao. Blŭ mdê hĭn, brei ksiêm dlăng amâodah krơ̆ng hĕ “mnuih kreh mưč”, tơdah klei krơ̆ng anăn amâo tŭ yua ôh snăn suôt hĕ ñu kbiă đuĕ mơ̆ng êpul êya. Khua Yang Yêsu mtô msĕ mơh, tơdah Phung Sang Aê Diê mtô lač mtă mtăn leh, ƀiădah pô anăn ăt čŏng čiăng ngă soh nanao “brei ih yap ñu msĕ si sa čô amâo đăo amâodah sa čô rĭng jia” (Y‑Mathiơ 18:17; Y‑Tit 3:10-11).
Boh tŭ dưn mơ̆ng klei “suôt hĕ mnuih kreh mưč” kbiă đuĕ mơ̆ng êpul êya jing amâo lŏ adôk ôh “klei bi mneh msao”, “klei bi tăng”, amâo lŏ mâo klei rŭng, klei bi kah. Boh nik jih tuč leh “klei dlao wač”, klei hêñ, kyuadah “mnuih kreh mưč” jing sa klei hêñ hŏng phung tui duah klei hdĭp kpă ênô, leh anăn klei toh lui anăn srăng mă mđuĕ hĕ klei dlao wač kơ phung ƀuôn sang Aê Diê.
Lu mnuih lač bruă kiă kriê Phung Sang Aê Diê, brei thâo bi gĭr tŭ wăt tơdah klei dôk dơ̆ng ƀơ̆ng huă soh wê tŭ mơh. Lu blư̆ drei mpŭ kơ klei dhar kreh hĭn kơ Klei Aê Diê Blŭ, kyuanăn Phung Sang Aê Diê ăt kơ̆ng pioh nanao “mnuih kreh mưč”, amâo jhŏng ƀuah mkra ôh kyuadah huĭ hing amâo mâo klei khăp, knŏng hlue klei bhiăn. Ƀiădah lĕ, bruă djă kơ̆ng phung “kreh mưč” anăn, ba truh klei bi kah phung, klei phĭ, klei dleh ktrŏ hlăm Phung Sang Aê Diê, ngă bi têč hnêč lu mnuih, boh nik nak kơ mnuih mrâo leh anăn mnuih mda, leh anăn ngă kơ Phung Sang Aê Diê mâo rup jhat ti anăp ală phung ka đăo. Klei Aê Diê Blŭ brei thâo “Ñu mưč kơ phung mưč” (Klei Bi Hriêng 3:34) snăn si ngă drei lĕ ăt lŏ kơ̆ng nanao “mnuih kreh mưč”. Pô mblang Klei Aê Diê Blŭ, Derek Kidner čih hlăm hdruôm hră ñu mblang Klei Bi Hriêng snei: “Bruă čiăng kơ sa êpul brei ngă hĕ, tăp năng amâo djŏ bi mlih ôh, ƀiădah brei suôt hĕ sa čô mơ̆ng êpul anăn.” Akâo kơ Khua Yang brei drei kiă kriê Phung Sang Aê Diê hŏng klei thâo mĭn čiăng dưi ba klei tŭ dưn kơ êpul êya.
Si drei ngă hŏng mnuih kreh mưč hlăm Phung Sang Aê Diê?
Wah lač: Ơ Khua Yang, akâo Ih brei kâo dôk hdĭp hlăm Phung Sang Aê Diê hŏng klei khăp hlăm klei atăt gai mơ̆ng Klei Sĭt Nik, hŏng klei gĭr, klei êdu êun, ƀiădah mpŭ nanao kơ klei doh jăk, leh anăn hŏng klei thâo mĭn mơ̆ng Khua Yang čiăng dưi bi knar jih jang klei anăn êjai hdĭp hrăm mbĭt hlăm Phung Sang Aê Diê. Kâo wah lač hlăm anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 10:1-11:1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
