Klei Aê Diê Blŭ: I Kôrantô 14:26-40.
Êlan Kliăng: “Ƀiădah brei diih ngă jih jang klei hŏng klei kpă leh anăn djŏ pruê̆.” (I Kôrantô 14:40)
Klei êmuh ksiêm mĭn: Ya klei Khua ƀĭng kna Y-Pôl bi hriăm dưi ngă leh anăn amâo dưi ngă ôh hlăk êjai bi kƀĭn kkuh mpŭ kơ Aê Diê? Si ngă phung Sang Aê Diê Kôrantô wĭt lač? Ya ngă? Ya jing klei bi hriăm kơ klei djŏ hdră brei ngă sĭt yua klei Yang Mngăt Jăk brei hlăm Sang Aê Diê đưm dih ăt msĕ mơh hruê anei?
Klei Khua ƀĭng kna Y-Pôl bi hriăm hlăm trăn Klei Aê Diê Blŭ I Kôrantô14: 26-35 mâo dŭm klei dưi ngă leh anăn amâo dưi ngă hlăk êjai bi kƀĭn. Dŭm bruă dưi ngă jing mmuñ bi mni kơ Aê Diê hlăm klei mmuñ, klei bi êdah, klei mtô mblang, klei bi êdah klei đaŏ knang, blŭ klei tue, mblang klei tue… hŏng klei brei ngă: Tal sa, brei ngă djŏ pruê̆ čiăng rơ̆ng kơ klei êđăp ênang hlăm mmông kkuh mpŭ kơ Aê Diê (êlan 27). Tal dua, brei ba klei tŭ dưn kơ phung nao hgŭm (êlan 17,26). Kơ klei amâo dưi ngă jing phung mniê amâo gưt ôh kơ klei dưi ung pô tơdah blŭ ti krah sang Aê Diê hlăm mông kkuh mpŭ (êlan 34).
Hŏng klei bi hriăm klă mngač msĕ snăn, ƀiădah msĕ si lu phung đaŏ ti Sang Aê Diê Kôrantô ăt hngah mđing hmư̆ hŏng klei mgao čiăng ngă tui klei pô čiăng msĕ si êpul lu diñu sa anăn ti lăn ala. Klei Khua ƀĭng kna Y-Pôl êmuh hlăm êlan 36 mñă klei diñu brei ba yua klei bhiăn mbĭt hlăm jih Phung Sang Aê Diê phung doh jăk (êlan 33b), leh anăn hĭn mơh tơdah phung đaŏ ti Kôrantô lač pô jing khua pô hưn êlâo amâo dah mâo Yang Mngăt Jăk mtrang mngač snăn brei thâo anei amâo djŏ jing klei bi hriăm kbiă mơ̆ng klei ñu pô čiăng ôh ƀiădah jing klei Aê Diê mtă (êlan 37). Tơdah amâo thâo răng snăn năng ai diñu dôk hlăk tui pô čiăng. Leh anăn hŏng phung mgao snăn, Khua ƀĭng kna Y-Pôl lač: “Ƀiădah brei diih ngă jih jang klei hŏng klei kpă leh anăn djŏ pruê̆.” (êlan 38).
Hlăm êlan 39 -40, sa blư̆ dơ̆ng Khua ƀĭng kna Y-Pôl lŏ mđĭ ai phung đaŏ brei čang hmăng thâo blŭ klei tue čiăng bi mđĭ ai hlăm Sang Aê Diê. Ƀiădah ñu amâo mdei tinăn ôh, ñu mñă kơ grăp čô mnuih snei, “Snăn Ơ phung ayŏng adei kâo, čiăng bĕ kơ klei dưi hưn êlâo, leh anăn đăm ghă arăng blŭ klei blŭ amâo mâo pô thâo ôh”(êlan 39). Hŏng ñu, djăp klei Aê Diê brei hlăm mngăt kơ grăp čô mnuih brei yua čiăng bi mđĭ ai hlăm Sang Aê Diê, “Ƀiădah brei diih ngă jih jang klei hŏng klei kpă leh anăn djŏ pruê̆”(êlan 40), jing brei ngă hŏng klei mpŭ, djŏ guôp leh anăn djŏ hdră. Brei hdơr “Kyuadah Aê Diê amâo jing Aê Diê kơ klei mtŭk mtŭl ôh, ƀiădah kơ klei êđăp ênang.” (êlan 33a). Anăn jing hdră brei kriê pioh hlăm “jih Sang Aê Diê phung doh jăk” đưm dih leh anăn ară anei.
Ya klei drei ngă čiăng mguôp răng mgang klei êđăp ênang hlăm Sang Aê Diê?
Ơ Aê Diê jing Khua Sang Aê Diê! Kâo bi mni lač jăk kơ Ih kyua klei êđăp ênang Ih brei kơ Sang Aê Diê hlăm klei mtă brei phung ƀuôn sang Ih hluê ngă, akâo kơ Ih đru kâo mâo ai tiê hluê gưt klei Ih mtă, bi mpŭ hdơ̆ng hmei čiăng mguôp răng mgang klei êđăp ênang hlăm Sang Aê Diê Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 3
Kênh Youtube BHKTHN:
