Klei Aê Diê Blŭ: I Y-Yôhan 2:15-17
Êlan kliăng: I Y-Yôhan 2:15
“15Đăm khăp kơ lăn ala ôh, kăn khăp kơ mnơ̆ng hlăm lăn ala rei. Tơdah hlei pô khăp kơ lăn ala, klei khăp kơ Ama amâo dôk hlăm ñu ôh.’’
Klei êmuh ksiêm mĭn: Boh blŭ “Lăn ala” hlăm kdrêč klei Aê Diê blŭ anei ya jing? Ya tlâo mta klei mnơ̆ng ai mĭn khăp kơ lăn ala čiăng lač hlăm êlan 16? Ya ngă phung khăp kơ lăn ala snăn amâo dưi khăp ôh kơ ayŏng adei pô? Ya jing klei tŭ mdê hjăn plah wah klei khăp kơ Aê Diê leh anăn klei lăn ala? Ya mta mñă kơ drei mơ̆ng klei hriăm anei?
Boh mơ̆ng Yang Mngăt Jăk hŏng knuih tal êlâo jing “Klei khăp” (Galati 5:22). Khua Yang čiăng kơ phung đaŏ kơ Ñu hdĭp thâo bi khăp, ƀiădah mâo dŭm klei ƀĭng kna Y-Yôhan mtă “Đăm khăp, kăn khăp” anăn jing “Đăm khăp kơ lăn ala ôh, kăn khăp kơ mnơ̆ng hlăm lăn ala rei”. Boh blŭ “Lăn ala” (Grek kosmos) hlăm trăn Klei Aê Diê Blŭ anei lač kơ phung yang jhat, ti gŭ klei gĭt gai mơ̆ng Satan (I Y-Yôhan 5:19), bi kdơ̆ng hŏng Aê Diê (Êphêsô 6:12). Kyua anăn klei khăp kơ lăn ala bi kdơ̆ng hŏng klei khăp kơ Aê Diê (I Y-Yôhan 5:18-19), amâo gưt ngă tui si klei Aê Diê čiăng.
Êlan 16 lač kơ tlâo mta mơ̆ng ai mĭn kơ lăn ala. Tal 1, klei kđeh tluh jing ai tiê khăp ktang kơ klei hơ̆k mơak soh jhat hlăm kđeh asăr msĕ si klei ngă knhông, khăp huă mnăm, ră rañ… Tal dua, klei tluh, klei bi nač, klei tluh čiăng kbiă mơ̆ng klei kdrưh kơang bhiâo knŏng ƀuh mă ti êngao msĕ si čhum ao, pưk sang, êdeh êdâo, klei hing ang… Tal tlâo, klei mgao hlăm klei hdĭp jing klei ktưn hưn kơ dŭm ênoh yuôm mâo mă êjai hlăm lăn ala msĕ bruă knuă hlăm ala ƀuôn, klei mdrŏng sah… Jih jang klei anei mâo mơ̆ng lăn ala amâo djŏ mơ̆ng Aê Diê ôh. Kyua anăn, hlei pô khăp kơ lăn ala snăn hlăm ñu amâo mâo ai tiê khăp kơ Aê Diê. Leh anăn tơdah amâo khăp kơ Aê Diê snăn ăt kăn dưi khăp mơh kơ pô mkăn msĕ si Khua Yang khăp leh kơ drei.
Hlăm êlan 17, Y-Yôhan lŏ mñă klă hlei pô khăp kơ lăn ala knŏng hdĭp kơ lăn ala anei đuč snăn leh diñu djiê bruă knuă diñu ăt rai tuč leh anăn mngăt diñu ăt srăng luč mơh! (Y-Mathiơ 16:26). Mklăk hŏng anăn, klei jăk mơak kơ phung ngă tui si klei Aê Diê čiăng, mđrĭng hŏng klei khăp Aê Diê leh anăn khăp kơ ayŏng adei snăn dôk nanao lă lar kyua leh jih klei hdĭp ti lăn ala srăng dưi dôk hŏng Ama ti ƀuôn ala mtao jăk siam hlŏng lar.
Y-Pôl čih leh dua păn boh mta knuih mơ̆ng Yang Mngăt Jăk hlăm Galati 5:22. Knuih yuôm bhăn ñu lač tal êlâo jing “Klei khăp”. Drei knŏng dưi hdĭp hŏng klei khăp tui si Klei Aê Diê Blŭ mtô sĭt drei khăp kơ Aê Diê leh anăn akâo kơ Yang Mngăt Jăk atăt gai, hlăk anăn boh mơ̆ng Yang Mngăt Jăk srăng dưi mâo hlăm klei hdĭp drei, Mơ̆ng anăn drei dưi hdĭp bŏ hŏng klei khăp djŏ hŏng ayŏng adei pô. Đăm khăp ôh kơ lăn ala ƀiădah jih hŏng ai tiê khăp kơ Aê Diê jing kliăng kơ klei bi êdah knuih klei khăp mơ̆ng Yang Mngăt Jăk hlăm klei hdĭp drei.
Mâo mơ̆ ya mta tluh kơ lăn ala ăt adôk hlăm klei hdĭp drei?
Ơ Khua Yang, akâo kơ ih bi hriăm kâo amâo khăp ôh kơ lăn ala ƀiădah hŏng jih ai tiê khăp kơ Aê Diê leh anăn khăp kơ phung riêng gah msĕ kâo pô. Akâo kơ knuih klei khăp mơ̆ng boh Yang Mngăt Jăk bi êdah hlăm klei hdĭp kâo grăp hruê.
Klei hriăm dưi mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo kl ei blŭ mguôp, akâo kơ di ih mơĭt hră hlăm gmail: radioelansitnik@gmail.com”
