Yelemis 31:31-34
Nqe cim:
“Cov lus cog tseg tshiab uas kuv cog rau cov Yixalayees yog li no: kuv yuav ua kom lawv nco ntsoov kuv tej kevcai rau nruab siab. Kuv yuav ua lawv tus Vajtswv thiab lawv yuav ua kuv haivneeg”(Yelemis 31:33).
Lus nug rau sawvdaws xav:
- Vajtswv tej lus cog tseg rau cov Yixalayees thiab cov Yudas yog li cas?
- Tus Tswv haivneeg tau rhuav cov lus cog tseg ntawd licas?
- Cov lus cog tseg tshiab uas tus Tswv cog rau lawv muaj yam dabtsi tseemceeb dua cov lus cog tseg qub?
- Peb yuav txais Vajtswv Txojlus zoo licas?
Ib tsoom cov mloog txhua tus,
Thaum cawm cov neeg Yixalayees dim kev ua cev qhev nram tebchaws Iziv los, tus Tswv muaj lus coglus tseg rau Nws haiv neeg. Cov lus cog tseg ntawd qhia kom Vajtswv haivneeg yuav tsum hlub tus Tswv kawg siab kawg ntsws, coj raws nraim li txhua nqe kevcai thiab tus Tswv tej lus samhwm, yog lawv coj li ntawd ces Nws yuav ua lawv tus Vajtswv thiab lawv yuav yog Nws haivneeg (Khiavdim 19:5). Tiamsis, haivneeg Yixalayees tsis coj raws li ntawd, lawv rhuav tej lus cog tseg tsis pehawm tus Tswv kawg siab kawg ntsws thiab tsis mloog Nws tej lus qhia. Qhov tu siab tshaj yog lawv tseem mus pe lwm haivneeg tej mlom (Yelemis 11:10). Thiab qhov ntawd kuj yog lub vimchiv uas ua rau lawv raug tus Tswv rau txim mus ua cev qhev nyob tim tebchaws Npanpiloos. Tiamsis txog lub sijhawm uas tus Tswv teem tseg, Nws yuav pub Nws haiv neeg rov qab los. Thaum lawv tau rov los, lawv yuav tsis siv zog ua raws tej lus cog tseg qub lawm, tiamsis tus Tswv yuav muab Nws ib cov lus cog tseg tshiab rau lawv coj, cov lus ntawd yuav tsis muab txaug saum daim txiagzeb lawm, tiamsis yuav muaj raws li tus Tswv hais: “Kuv yuav muab kuv txoj kevcai tso rau hauv lawv, thiab sau cia rau hauv lawv lub siab. Kuv yuav ua lawv tus Vajtswv thiab lawv yuav ua kuv haivneeg”(nqe 33b HMOWSV). Txhais tau hais tias, lawv yuav tsis hnov qab Vajtswv tej lus cog tseg, vim Nws txoj kevcai tau muab sau cia rau hauv lawv lub siab lawm. Thiab nyob ntu caijnyoog ntawd, tsis muaj leejtwg yuav tso Vajtswv tseg, tsis liam hais tias kuv tseem yau tsis paub tej uas tus Tswv ua rau kuv cov yawgkoob, kuv thiaj tsis paub Nws thiab tsis pehawm Nws, tiamsis qhov kev zeem paub tus Tswv yuav puv ntoob nyob hauv tus Tswv haivneeg (nqe 34).
Puas yog vim Vajtswv txoj kevcai nyob hauv lub Tuamtsev xwb, thaum lawv mus hauv lub Tuamtsev thiaj kawm nco, thaum tawm hauv Tuamtsev mus lawv tsis nco tus Tswv txoj kevcai lawm, lawv thiaj mus ua neej zoo li lwm haivneeg ua? Nimno, peb txhua tus, txhua tsevneeg puavleej muaj phau Vajluskub, tiamsis puas muaj tej zaum twg peb xav hais tias tus Tswv txoj kevcai tsuas yog sau ua ntawv xwb, thaum nthuav phau Vajluskub thiaj yog peb nco ntsoov Nws tej lus samhwm, thaum kaw Vajluskub ces peb ua raws li yus lub siab nyiam los tau? Thov Vajtswv qhia rau peb paub khaws tus Tswv tej lus rau nruab siab kom peb nco ntsoov thiab ua raws li ntawd, peb thiaj tsis ua txhaum rau tus Tswv (Phau Ntawv Nkauj 119:11).
Thov Vajtswv,
Tus Tswv! Thov Koj muab Koj Txojlus cog rau hauv nyuam yaus lub siab, nyuam yaus thiaj tsis hnov qab Koj tej lus. Thov Koj pab kom nyuam yaus ua tau raws li Koj tej lus samhwm thiab ua haum Koj siab. Amees.
Ib tsoom cov mloog uas hmov thiab tshua,
Peb puas tau nco ntsoov tus Tswv Txojlus hauv peb lub siab?
Nyeem Vajluskub hauv peb lub xyoo: Nehemis 12:27-13:5
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
