Klei Aê Diê Blŭ: Y‑Yêrêmi 31:31-34
Êlan kliăng: “Ƀiădah snei jing klei bi mguôp Kâo srăng ngă hŏng sang Israel leh êgao ênuk anăn,” Yêhôwa lač: “Kâo srăng dưm klei bhiăn Kâo hlăm lam diñu, leh anăn Kâo srăng čih klei bhiăn anăn ti ai tiê diñu; leh anăn Kâo srăng jing Aê Diê diñu leh anăn diñu srăng jing phung ƀuôn sang Kâo. (Y‑Yêrêmi 31:33)
Klei êmuh ksiêm mĭn: Ya klei bi mguôp hđăp Aê Diê ngă leh hŏng sang Israel leh anăn sang Yuđa? Si ngă phung ƀuôn sang Aê Diê bi kruh klei bi mguôp anei? Ya klei mdê mơ̆ng Klei bi mguôp mrâo hŏng klei bi mguôp hđăp Yêhôwa srăng ngă hŏng diñu? Si knuih drei ngă hŏng Klei Aê Diê Blŭ?
Leh mtlaih phung ƀuôn sang Israel kbiă mơ̆ng klei jing hlŭn ti čar Êjip, Yêhôwa mjing leh hŏng diñu sa klei bi mguôp. Klei bi mguôp anei brei phung ƀuôn sang Aê Diê brei jih ai tiê khăp kơ Ñu, hlue ngă djăp klei bhiăn leh anăn klei mtă Yêhôwa mtrŭn leh snăn Ñu srăng jing Aê Diê kơ diñu leh anăn diñu srăng jing phung ƀuôn sang jing hjăn kơ Aê Diê (Klei Kbiă 19:5). Khădah snăn, phung ƀuôn sang Israel amâo hlue ngă ôh, diñu bi rai klei bi mguôp leh amâo thơ̆ng kkuh mpŭ kơ Yêhôwa ôh leh anăn amâo hlue ngă ôh Klei Aê Diê Blŭ mtô. Kjham hĭn diñu lŏ kkuh kơ rup yang mkăn mơ̆ng phung ƀuôn sang ti êngao (Y‑Yêrêmi 11:10). Leh anăn anei ăt jing mta phŭn ngă kơ diñu tŭ klei Yêhôwa bi kmhal, jing hlŭn ti čar Ƀabilôn. Khădah snăn, hlăm wưng Yêhôwa kčah leh, Aê Diê srăng bi mrâo diñu wĭt kơ ƀuôn sang. Leh wĭt, diñu srăng amâo lŏ gĭr djă pioh ôh klei bi mguôp hđăp ƀiădah Yêhôwa jing pô srăng mjing klei bi mguôp mrâo, klei bi mguôp anei amâo ktur hlăm boh tâo ôh ƀiădah msĕ si Klei Aê Diê Blŭ lač leh: “Kâo srăng dưm klei bhiăn Kâo hlăm lam diñu, leh anăn Kâo srăng čih klei bhiăn anăn ti ai tiê diñu; leh anăn Kâo srăng jing Aê Diê diñu; leh anăn diñu srăng jing phung ƀuôn sang Kâo.” (êlan 33b). Jing diñu srăng amâo wơr ôh klei bi mguôp hŏng Aê Diê kyua klei bhiăn Ñu dưi čih hlăm ai tiê diñu. Leh anăn hlăm wưng anei, amâo mâo ôh pô dưi hngah kơ Aê Diê, lač kyua kâo dôk mda asei anăn amâo thâo ôh dŭm klei Ñu ngă leh kơ aduôn aê kâo, kyua anăn kâo amâo thâo ôh Aê Diê leh anăn amâo kkuh mpŭ ôh kơ Ñu, ƀiădah klei thâo kral Yêhôwa mâo ti krah phung ƀuôn sang Aê Diê (êlan 34).
Hlăk êlâo dih, djŏ mơ̆ kyua klei bhiăn Aê Diê knŏng mâo hlăm Sang Yang anăn phung ƀuôn sang Aê Diê knŏng hdơr kơ klei bi mguôp Ñu sĭt mŭt hlăm Sang Yang đuč ƀiădah sĭt kbiă mơ̆ng Sang Yang diñu amâo lŏ hdơr ôh kơ klei bhiăn Aê Diê leh anăn hdĭp msĕ si phung amâo đăo? Hruê anei, grăp čô drei, grăp boh sang mâo sơăi Klei Aê Diê Blŭ, ƀiădah drei tuôm bi mĭn mơ̆ klei bhiăn Aê Diê knŏng čih hlăm hdruôm hră anăn knŏng sĭt pŏk Klei Aê Diê Blŭ kơh drei hdơr kơ Klei Aê Diê Blŭ, leh anăn sĭt pioh Hdruôm hră Klei Aê Diê Blŭ, drei hdĭp tui si pô čiăng leh anăn kđeh tluh? Akâo kơ Aê Diê đru drei dưm Klei Aê Diê Blŭ hlăm lam ai tiê čiăng hdơr leh anăn hlue ngă čiăng amâo ngă soh ôh hŏng Aê Diê (Klei Mnuñ Hđăp 119:11).
Drei čih Klei Aê Diê Blŭ hlăm ai tiê mơ̆?
Wah lač: Ơ Aê Diê! Akâo kơ Ih dưm Klei Aê Diê Blŭ hlăm ai tiê, klei mĭn kâo čiăng kâo amâo wơr ôh klei Ih blŭ. Akâo kơ Ih đru kâo hlue ngă Klei Aê Diê Blŭ čiăng bi mơak kơ Ih kơ klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 12:27-13:5
Kênh Youtube BHKTHN:
