Nkauj Quaj Ntsuag 4:17-22
Nqe cim:
“Peb lub qhovmuag ntsia ntsoov mus txog thaum uas tsis muaj txojkev pab li lawm. Peb pheej tos kev pab ntawm ib haivneeg uas tsis muaj ib yam dabtsi pab peb.” ( Nkauj Quaj Ntsuag 4:17)
Peb saib rau phau txhais 2004 hais li no
“Peb lub qhov muag pheej nrhiav nrhw txojkev pab, tos liab muag tag los nrhiav do xwb, peb nyob tos lub tebchaws uas tuaj pab los kuj pab tsis tau li.” (nqe 17 HMOWSV)
Lus nug rau sawvdaws xav:
– Vajtswv haivneeg tso siab rau leejtwg thiab thaum kawg zoo li cas?
– Haivneeg Edoos yuav raug Vajtswv rau txim li cas?
– Peb tabtom tso siab hauv kev ntseeg rau qhov twg?
Lolus “nrhiav do xwb”, “pab tsis tau li”, qhia txog kev xaus ntawm Vajtswv haivneeg, thaum uas lawv tig lawv lub qhovmuag mus saib rau ib lub tebchaws uas cawm tsis tau lawv dim ntawm tej kev txomnyem tam sim no, uas yog Iziv. Nqe 20 kuj hais txog “tus vajntxwv uas tus TSWV xaiv,” hais txog vajntxwv Xedekiyas, tiamsis vajntxwv tsis yog ib qhov kev cia siab rau Vajtswv haivneeg lawm. Yog tus tau Vajtswv xaiv twb tsimnyog vajntxwv tau txais tej koob hmoov uas Vajtswv pub tshwjxeeb rau nws (Phau Ntawv Nkauj 23:5, 92:10), yog ib tug uas raug xaiv los rau lub meejmom tshwjxeeb kom ua tiav Vajtswv lub homphiaj (Yaxayas 45 :1) tiamsis tu siab vim raug Vajtswv muab tso tseg. Tseeb tiag yeej muaj cov uas tau Vajtswv xaiv tiamsis raug Vajtswv tso tseg zoo li Xa-ules. Ib yam li ntawd, Xedekiyas txawm yog tau Vajtswv xaiv, thiab tau tej pejxeem qhuas hais tias yog ib tug vajntxwv tswj kav tebchaws tau zoo, tiamsis nimno nws kov tsis yeej nws cov yeebncuab thiab raug ntes ciaj mus lawm.
Kev tso siab ntawm Vajtswv haivneeg rau ib lub tebchaws uas lawv xav hais tias muaj hwjchim, muaj zog zoo li tebchaws Iziv, ces yuav pab tau lawv dim Npanpiloos, tiamsis thaum kawg tas kev cia siab, Vajtswv haivneeg raug poob mus ua cev qhev, thiab lub Tuamtsev raug rhuav puastsuaj tas. Vajtswv haivneeg muab lawv txojsia tso rau tus neeg uas Vajtswv xaiv, saib vajntxwv Xedekiyas zoo li “lub hauvpaus txojsia” tiamsim pab tsis tau dab tsi li vim nws tsis mus raws li Vajtswv txoj kev, thiab tsis kam mloog txais yuav Vajtswv Txojlus dhau ntawm tus cevlus Yelemis.
Haivneeg Edoos yog rov hais txog tus duab ntawm “cov ntxhais Edoos” tsis yog tau txais kev qhuas tiamsis yuav raug Vajtswv rau txim vim lawv ua phem ua qias, tsis pab Vajtswv haivneeg tiamsis tseem koom nrog lwm tus sab nraud ua kom Vajtswv haivneeg uas yog lawv cov kwjtij raug txomnyem heev dua ntxiv. Cov Edoos cia li luag zoo siab rau hnub uas cov Yudas poob kev txomnyem tiamsis Vajtswv Txojlus qhia ua ntej hais tias “Edoo tus ntxhais e, nws yuav rau txim rau koj tej kev txhaum, nws yuav nthuav koj txojkev txhaum txim tshwm los” (HMOWSV) tiamsis “Xi-oos tus ntxhais”, tom qab uas raug txim txaus lawm, lawv yuav rov tau hlub dua, kho dua thiab tsis raug ua cev qhev ntxiv lawm (nqe 21–22).
Cov ntseeg yuavtsum tso siab rau ntawm Vajtswv Vaj Peb Leeg. Tej zaus hauv kev ua neej, qee lub sijhawm peb kuj tso siab tsis yog chaw. Tej zaum ntawd yog nyiaj txiag, dag zog hwjchim zoo ib yam li Iziv hnub thaud, tej zaum yog tus neeg uas muaj meejmom hwjchim zoo li Xedekiyas… Vajtswv tsis xav kom peb ua neej poob siab thaum peb tso siab rau lwm yam sab nraud uas tsis yog Vajtswv. Cia li lees txim thiab rov qab los ua ntej uas yuav lig dhau lawm.
Thov Vajtswv:
Vajtswv, Thov cia Koj Txojlus ci rau nyuam yaus lub neej kom pom qhov tseeb, kom nyuam yaus tsis tso siab rau txhua yam uas nyob rau lub ntiajteb no, mus yuam kev thiab raug Koj rau txim tiamsis thov pab nyuam yaus paub tso siab rau Vajtswv tus uas yog qhov tseeb, ncaj ncees mus li. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Puas muaj yam dab tsi tav peb kev tso siab rau Vajtswv Vaj Peb Leeg?
Nyeem Vajluskub hauv peb lub xyoos: Cov Thawjtswj 12
Kênh Youtube BHKTHN:
