Klei Aê Diê Blŭ: Klei Čŏk Hia 4:17-22
Êlan kliăng: “Ală drei dliu, kăp dlăng nanao hơăi mang kơ klei đru; ti sang tum drei kăp dlăng kơ sa găp djuê amâo dưi bi mtlaih drei ôh.” (Klei Čŏk Hia 4:17)
Klei êmuh ksiêm mĭn: Phung ƀuôn sang Aê Diê dưm klei đăo kơ hlei pô leh anăn si boh tŭ? Phung ƀuôn sang Êđôm srăng tŭ klei Aê Diê bi kmhal? Drei dôk dưm klei đăo pô kơ hlei pô?
Boh blŭ “hơăi mang”, “amâo dưi bi mtlaih” lač kơ klei knhal tuč phung ƀuôn sang Aê Diê tơdah diñu kngưr ală dlăng kơ sa djuê ana amâo dưi bi mtlaih ôh diñu mơ̆ng klei knap mñai ară anei, jing Êjip. Êlan 10 ăt lač kơ “Pô Yêhôwa trôč leh êa ƀâo mngưi”, lač kơ Mtao Y-Sêđêkia, ƀiădah mtao ăt kăn lŏ jing klei čang hmăng mơ̆ng phung ƀuôn sang Aê Diê ruah rei. Ênguôt snăk kyua pô Aê Diê trôč leh êa ƀâo mngưi boh sĭt brei jing mnuih mâo Aê Diê pioh hjăn čiăng dưi dưn klei pap Ñu (Klei Mmuñ Hđăp 23:5, 92:10), jing pô dưi ruah hlăm anôk yuôm bhăn čiăng ngă hdră kñăm Aê Diê (Y-Êsai 45:1). Khădah snăn ăt mâo mơh mnuih mâo trôč êa ƀâo mngưi ƀiădah Yêhôwa lui msĕ si Mtao Y-Sôl, leh anăn tinei, Mtao Y-Sêđêkia, wăt tơdah mâo trôč leh êa ƀâo mngưi leh anăn mâo mnuih ƀuôn sang ktưn hưn mâo sa čô mtao gĭt gai thâo mĭn, snăn ară anei lĕ hlăm klei phung roh mplư leh anăn arăng mă hdĭp.
Ai tiê phung ƀuôn sang Ñu dưm hlăm sa lăn čar diñu mĭn jing jhŏng ktang msĕ si Êjip, mĭndah srăng bi mtlaih diñu mơ̆ng Ƀaƀilôn, ƀiădah knhal tuč luč jih klei čang hmăng, phung ƀuôn sang Aê Diê tŭ klei arăng krư̆ kđăl, Sang Yang arăng bi rai. Klei hdĭp phung ƀuôn sang Aê Diê lŏ dưm hlăm pô Aê Diê trôč leh êa ƀâo mngưi, dlăng Mtao Y-Sêđêkia msĕ si “klei bi êwa drei” ăt kăn ba boh tŭ jăk siam mơh kyua mtao amâo êbat tui hlue êlan Yêhôwa ôh, leh anăn ăt kăn tŭ mă Klei Aê Diê Blŭ mơ̆ng Khua pô hưn êlâo Y-Yêrêmi rei.
Djuê ana Êđôm mâo lač hlăm rup “anak mniê čar Êđôm” amâo djŏ čiăng bi mni ôh ƀiădah srăng jing klei Yêhôwa bi kmhal kyua diñu ngă soh, amâo djŏ knŏng amâo dưi đru phung ƀuôn sang Aê Diê tơdah tuôm hŏng klei truh ôh ƀiădah lŏ bi mguôp hŏng phung ti êngao čiăng thiăm klei dleh dlan kơ ayŏng adei pô. Êđôm hơ̆k mơak bĕ hlăm hruê Yuđa lĕ hlăm klei truh, ƀiădah Klei Aê Diê Blŭ hưn êlâo, “Ơ anak mniê čar Êđôm, ñu srăng bi kmhal klei wê ih, ñu srăng bi êdah klei soh ih”. Hjăn “anak mniê čar Siôn” leh tŭ klei bi kmhal leh diñu srăng mâo klei pap brei, bi mrâo leh anăn amâo lŏ tŭ klei jing mnă ôh (êlan 21-22).
Phung đăo brei dưm klei đăo hlăm Aê Diê Tlâo Yang. Khădah snăn hlăm klei hdĭp, lu blư̆ drei ăt dưm klei đăo amâo djŏ anôk. Dưi lač anăn jing prăk mah, klei dưi hlăm klei hdĭp anei msĕ si ai ktang mơ̆ng Êjip hlăk đưm, dưi lač jing phung mâo klei dưi msĕ si mtao Y-Sêđêkia hlăk đưm… Aê Diê amâo čiăng drei luč klei čang hmăng tơdah dưm klei đăo hlăm Aê Diê amâo djŏ kơ ya mta mkăn ôh. Brei kmhal leh anăn lŏ wĭt êlâo kơ hnui đei.
Diih dưm klei đăo kluôm ênŭm hlăm Aê Diê Tlâo Yang mơ̆?
Wah lač: Akâo kơ Klei Aê Diê Blŭ mtrang mngač čiăng kâo thâo răng klei hdĭp, amâo đăo ôh kơ mnơ̆ng dhơ̆ng hlăm klei hdĭp anei ngă kơ kâo soh čhuai leh anăn tŭ klei Aê Diê bi kmhal. Kâo wah lač hlăm Anăn Khua Yang Yêsu Krist, Amen!
Dlăng Klei Aê Diê Blŭ hlăm tlâo thŭn: Phung Khua Phat Kđi 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
