Yelemis 12:1-6
Nqe cim
“Yog koj qaug zog thaum raug kev ntxhov siab, ces yog koj siab yau heev” (Pajlug 24:10).
Lus nug rau sawvdaws xav:
– Tus cevlus Yelemis tabtom nrog tus Tswv sib hais txog yam dabtsi?
– Lub sijhawm ntawd nws hnov licas? Vajtswv teb nws tej lus licas?
– Kev sim siab tus Tswv pub rau Yelemis qhuab ntuas koj txog yam dabtsi?
Tus cevlus Yelemis yeej paub tseeb hais tias Vajtswv yog tus ncaj ncees (nqe 1a). Tiamsis nws yeej tseem xav nrog tus Tswv sib hais vim nws tabtom ntsib tej kev nyuaj siab thaum muaj tej kev txomnyem puag ncig (nqe 1b). Nws nug tus Tswv hais tias, “Vim li cas cov neeg siab phem tsuas muaj vammeej zuj zus xwb? Vim li cas cov neeg siab tsis ncaj ua dabtsi los tiav?” (nqe 1c). Tej zaug nyob hauv nws lub siab tabtom nphau nphwv kev iab siab vim pom tej kev tsis ncaj ncees. Nws txojkev xav tabtom puv npo tej duab hais txog cov neeg uas tau txais tus Tswv txoj koob hmoov tiamsis lawv ua tej yam dag tus Tswv. Hais ncaj nraim ces ntawd yog cov neeg Anathaus. Lawv yog tus cevlus Yelemis ib xeem, thiab yog tus Tswv haivneeg, tus Tswv yog tus “cog” lawv (nqe 2, 6), tiamsis lawv ho tabtom tawmtsam tus Tswv thiab nrhiav kev txo tus cevlus Yelemis txojsia (Yelemis 11:21). Vim li ntawd, nws thov kom tus Tswv ua tiav txojkev ncajncees tamsid (nqe 3). Nws ua tsis taus siab ntev tos lawm. Nws tabtom qaug zog thaum ntsib kev tsimtxom.
Vajtswv tau teb tus cevlus Yelemis los ntawm ib lo lus nug sim siab: “Yelemis, yog koj nrog neeg sibtw, koj twb qaug zog lawm, koj yuav ua li cas nrog nees sibtw khiav? Yog hais tias koj twb tsis tau luag nyob hauv tej tiaj nrag no, koj yuav ua li cas tau luag nyob hauv lub havzoov ntawm ntug dej Yauladees?” (nqe 5). Tus Tswv ua rau Yelemis nco hais tias thaum nws tej kwvtij ntxeev siab twb ua rau nws qaug zog lawm, ces thaum raug cov yeebncuab loj dua xws li tej vajntxwv, tej nom loj tawmtsam, ces nws yuav ua licas sawv taus? (nqe 5-6). Los ntawm tus Tswv tej lus sim siab no txhawb tus cevlus Yelemis lub zog kom cia siab ntsoov rau tus Tswv, ua siab tawv qhia Nws tej lus. Txawm yuav raug tej kwvtij ntxeev siab, los tus Tswv yeej yuav ua raws li tus Tswv tej lus cogtseg. Txawm nws twb qaug zog lawm, los tus Tswv yuav tsa nws sawv thiab qhia rau nws paub hais tias: tus Tswv paub, tus Tswv nkag siab thiab tus Tswv yuav ua haujlwm thaum txog tus Tswv lub sijhawm.
Niaj hnub nimno, kuj muaj coob tus ntseeg nug hais tias: “Vim li cas cov neeg siab phem tsuas muaj vammeej zuj zus xwb?” Thaum peb taij kom muaj kev ncajncees yeej tsis txhaum, tiamsis txhaum yog thaum peb pom tej kev tsis ncajncees peb ho qaug zog thiab yws tus Tswv. Txhaum yog thaum peb xav hais tias peb tus kheej muaj cuabkav sawv los nrhiav kev ncajncees raws li yus lub siabnyiam. Yog peb tas siab ntsws hwm tus Tswv thiab ntseeg hais tias peb tus Tswv yog tus ncajncees, ces peb yuav tsum ua siab ntev tos Nws ua haujlwm raws li Nws lub sijhawm teem tseg. Kev sim siab rau peb yog ua siab tawv qhawv kom zoo li lo lus pivtxwv, “nrog nees sibtw khiav”, thiab ntseeg hais tias: “Tus Tswv saib xyuas cov neeg ncaj ncees thiab coj lawv txoj hau kev, tiamsis cov neeg ua phem tabtom taug txojkev puastsuaj” (Ntawv Nkauj 1:6).
Thov Vajtswv
Tus Tswv, thov qhia kom nyuam yaus nco ntsoov hais tias Koj yog tus ncaj ncees thiab tsis txawj pauv hloov. Thov pab nyuam yaus ruaj siab ntseeg Koj, tsis qaug zog thaum ntsib kev tsimtxom kom nyuam yaus pom txog Koj tej koob hmoov hauv ntiajteb no. Nyuam yaus tuav Cawmseej Yexus lub npe thov, Amees.
Peb puas tabtom qaug zog vim ib txojkev tsis ncajncees twg? Peb zeem paub hais tias tus Tswv tabtom siv yam dabtsi los sim peb siab?
Nyeem Vajluskub hauv peb lub xyoo: Chivkeeb 32
Kênh Youtube BHKTHN:
