I Thexalaunikes 1:2-4
Nqe cim:
“Thaum peb thov Vajtswv tus uas yog peb Leej Txiv, peb nco ntsoov hais tias nej tsis yog cov uas ntseeg ntawm lub ncauj xwb, tiamsis nej ua nej tes haujlwm rau sawvdaws pom thiab. Nej zoo siab hlo pab lwm tus. Txawm yog nej yuav ua haujlwm khwv npaum li cas los nej yeej tsis khuvxim nej lub zog li, thiab nej cia siab ntsoov rau peb tus Tswv Yexus Khetos.” (I Thexalaunikes 1:3).
Lus nug rau sawvdaws xav:
– Timthawj Paulus ua Vajtswv tsaug vim dabtsi?
– Qhov uas ib tug neeg tau Vajtswv hlub thiab xaiv yog dabtsi?
– Peb siv zaj kawm no rau yus tus kheej zoo li cas?
Thaum xav txog cov ntseeg hauv lub nroog Thexalaunikes, Timthawj Paulus, Xilas thiab Timautes muaj kev zoo siab thiab tau kev txhawb zog. Lawv qhia paub hais tias cov kwvtij ntseeg nyob Thexalaunikes yog qhov keebtiv rau tej lus ua lawv ua Vajtswv tsaug thaum lawv thov Vajtswv pab rau cov ntseeg. Vimchiv Timthawj Paulus zoo siab ua tus Tswv tsaug vim nws tsis hnov qab tej haujlwm uas cov ntseeg Thexalaunikes ua los ntawm kev ntseeg, tej kev khwv uas lawv ua thiab kev loj hlob, qhia tawm los ntawm tej haujlwm zoo, sib hlub tabtom muaj nyob hauv lawv lub siab. Yog li, txawm yog yuav ntsib tej kev txomnyem, tsimtxom los thaum lawv txiav txim siab ntseeg Tswv Yexus Khetos, ces lawv tsis poob siab li, tiamsis lawv ua taus siab ntev vim lawv muaj kev cia siab rau tus Tswv Yexus tej lus cog tseg lawm (nqe 3). Hauv cov tsab ntawv uas Timthawj Paulus sau, nws niaj hnub hais txog txojkev ntseeg, kev cia siab thiab kev hlub, yog li thaum muaj peb yam tseemceeb no, yuav ua tau lub neej haum tus Tswv siab thiab ua lub neej tawg paj txi txiv rau tus Tswv (I Kauleethaus 13:13).
Hauv nqe 4, Timthawj Paulus hais tias: “peb paub hais tias Vajtswv hlub nej thiab xaiv nej cia ua Nws haivneeg lawm.” Qhov uas cia kom tau tus Tswv hlub thiab xaiv tsis yog ua neeg zoo, tsis ua txhaum tiamsis yog tus neeg uas muaj txaus peb yam: kev ntseeg, kev hlub thiab kev cia siab zoo ib yam li cov ntseeg hauv Thexalaunikes. Dua li ntawd, tus neeg twg tawm lus tias yus tau tus Tswv xaiv tiamsis lub neej tsis qhia tawm peb yam hais saud los ntawm tes haujlwm ua ces yog nws rov dag nws tus kheej xwb.
Nimno, yog peb hais tias yus muaj kev ntseeg tiamsis tsis ua haujlwm tawm ces yog kev ntseeg tuag (Yakaunpaus 2:26). Yog peb hais txog kev hlub tiamsis peb tsis qhia tawm kev hlub rau yus cov kwvtij ces qhov ntawd tsis yog kev hlub tseeb (I Kauleethaus 13:4-12). Yog peb hais tias kuv tabtom ua neej nyob hauv txojkev cia siab thiab tos ntsoov hnub tus Tswv rov los tiamsis peb pheej npaj txhua yam rau lub neej no ces peb tabtom tawmtsam yus tus kheej. Peb txhua tus cheemtsum ua tib zoo saib thiab muab yus txojkev ntseeg, kev hlub thiab kev cia siab piv rau cov ntseeg nyob hauv nroog Thexalaunikes thaum ub, yog hnub no Timthawj Paulus sau tsab ntawv no tuaj rau peb, nws yuav hais li cas txog peb txojkev ntseeg, kev cia siab thiab kev hlub?
Thov Vajtswv,
Vajtswv, Koj yog tus hlub thiab xaiv nyuam yaus. Thov Koj pab nyuam yaus ua neej txhua hnub qhia tawm txojkev ntseeg, kev hlub thiab kev cia siab ruaj khov, kom qhia rau txhua tus paub hais tias nyuam yaus yog tus uas tau Koj xaiv thiab Koj hlub. Amees.
Peb puas ntseeg tias yus tau Vajtswv hlub thiab xaiv? Vim li cas?
Nyeem Vajluskub hauv peb lub xyoo: Loos 15:14-33
Kênh Youtube BHKTHN:
