Klei Aê Diê Blŭ: Y-Đaniel 9:20-27
Êlan kliăng: “Kơ Pô dưi ngă kdlưn êgao hĭn kơ jih klei drei akâo amâodah mĭn, tui si klei myang dôk mă bruă hlăm drei” (Êphêsô 3:20).
Klei êmuh ksiêm mĭn: Hlăm êlan 24-27, ya klei dĭng buăl jăk Y-Gabriel lač hŏng khua pô hưn êlâo Y-Đaniel? Si klei djŏ tuôm Klei Blŭ hưn êlâo anăn hŏng klei khua pô hưn êlâo Y-Đaniel wah lač êlâo kơ anăn? Ya jing klei phung đăo čang hmăng prŏng hĭn?
Kčưm pŏk kdrêč 9, khua pô hưn êlâo Y-Đaniel brei thâo ñu dlăng dŭm hdruôm hră khua pô hưn êlâo čih leh anăn duah ƀuh ênoh thŭn phung ƀuôn sang Aê Diê tŭ klei jing hlŭn mnă jing kjuh pluh thŭn (êlan 2), leh anăn hruê bi kčah anăn giăm ruê̆ leh. Kyuanăn, ñu hưn klei soh leh anăn akâo kơ Khua Yang “ñăk hĕ klei Ih ăl leh anăn klei Ih ngêñ mơ̆ng ƀuôn Ih, ƀuôn Yêrusalem” (êlan 16). Boh tŭ mơ̆ng klei akâo anăn, Aê Diê tiŏ nao dĭng buăl jăk ba kơ ñu klei wĭt lač mâo leh “tơdah ih dơ̆ng wah lač” (êlan 23).
Si jing Klei Blŭ dĭng buăl jăk hưn êlâo wĭt lač kơ klei khua pô hưn êlâo Y-Đaniel kwưh akâo? Tơdah khua pô hưn êlâo Y-Đaniel dôk guôn tơl tuč ruê̆ 70 thŭn jing hlŭn mnă snăn Khua Yang wĭt lač hŏng klei hưn lač kơ “kjuh pluh hruê kăm” amâodah “kjuh pluh blư̆ kjuh”. Êlan 25 lač kơ “klei mtă lŏ mkra leh anăn mdơ̆ng ƀuôn Yêrusalem” leh anăn kñăm “Arăng srăng lŏ mdơ̆ng ƀuôn êrusalem”. Ƀiădah êlan 26 brei thâo, ƀuôn Yêrusalem hlăm kđeh lŏ mdơ̆ng ăt arăng srăng bi rai mơh, klei ƀuôn doh jăk arăng dưi lŏ mkra mdơ̆ng knŏng jing sa gơ̆ng bi knăl kơ klei čang guôn prŏng prĭn hĭn: Čang guôn klei lŏ mdơ̆ng ƀuôn Yêrusalem hlăm mngăt, amâo djŏ êdei kơ 70 thŭn ôh ƀiădah êdei kơ “kjuh pluh hruê kăm” amâodah kjuh pluh blư̆ kjuh, jing 490 thŭn. Hlăk ƀuôn Yêrusalem dơ̆ng lŏ mdơ̆ng, Khua Yang bi wir ală khua pô hưn êlâo Y-Đaniel brei thâo ƀuh kbưi hĭn kơ ƀuôn prŏng hlăm kđeh anăn čiăng kơ ñu dưi ƀuh sa boh ƀuôn prŏng kjăp rơ̆ng, arăng amâo dưi bi rai ôh. Anei jing klei lŏ mdơ̆ng ƀuôn prŏng doh jăk leh anăn lŏ rŭ mdơ̆ng phung ƀuôn sang Aê Diê kluôm dhuôm hlăm ênuk knhal tuč.
Klei khua pô hưn êlâo Y-Đaniel uêñ mĭn mrô dua jing – klei soh phung ƀuôn sang Aê Diê – ăt msir mkra găn hŏng knhuang kjuh pluh hruê kăm mơh. Êlan 24 brei thâo kjuh pluh hruê kăm anăn kñăm kơ tlâo mta klei amâo mơak (“čiăng bi ruê̆ hĕ klei gao klei bhiăn, bi ruê̆ klei soh, bi doh klei wê”), leh anăn tlâo mta klei mơak (“bi truh klei kpă ênô hlŏng lar, bi sĭt klei bi ƀuh leh anăn klei hưn êlâo, leh anăn trôč êa ƀâo mngưi kơ Pô doh jăk hĭn”). Anei jing klei wĭt lač yuôm bhăn kơ klei khua pô hưn êlâo Y-Đaniel wah lač hưn klei soh dlông snăk. Pô tŭ klei Trôč Êa Ƀâo Mngưi, jing Khua Yang Yêsu, srăng hriê leh anăn “arăng srăng bi mdjiê” čiăng ba klei bi doh kơ klei soh leh anăn bi truh klei kpă ênô hlŏng lar.
Hlăm klei thâo ƀuh mâo knhal pô, khua pô hưn êlâo Y-Đaniel jih ai tiê kwưh akâo kơ Khua Yang lŏ mdơ̆ng ƀuôn prŏng Yêrusalem. Aê Diê wĭt lač leh klei ñu wah lač, leh anăn kdlưn êgao hĭn, Aê Diê lŏ đru ñu dưi ƀuh bruă lŏ mdơ̆ng yuôm bhăn: Klei pap brei klei soh, klei bi doh phung ƀuôn sang Aê Diê leh anăn ƀuôn prŏng Yêrusalem hlăm mngăt srăng lŏ mdơ̆ng hlŏng lar hŏng Pô Ñu Trôč Êa Ƀâo Mngưi, jing Khua Yang Yêsu. Klei Aê Diê brei kdlưn êgao hĭn kơ klei drei akâo amâodah bi mĭn.
Si ngă drei čang guôn klei lŏ mdơ̆ng hlăm kđeh amâodah hlăm mngăt lu hĭn?
Wah lač: Ơ Khua Yang, bi mni kơ Ih brei kơ kâo klei jăk jĭn kdlưn êgao hĭn kơ klei kâo akâo nanao. Akâo kơ Khua Yang đru kâo hdĭp hlăm klei wah lač leh anăn čng hmăng klei lŏ mdơ̆ng hlăm mngăt hlŏng lar.
Dlăng Klei Aê Diê Blŭ hlăm tlâo thŭn: Y‑Êsai 2:12 – 3:15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
