II Kevcai 31:9-13
Nqe cim:
“Nej cia li hu sawvdaws, tsis hais pojniam txivneej, tus hlob tus yau thiab lwm haivneeg uas nrog nej nyob tuaj huv tibsi; sawvdaws thiaj hnov thiab hwm tus TSWV uas yog nej tus Vajtswv thiab muab siab npuab ua raws li nws tej lus.” (II Kevcai 31:12)
Lug nug rau sawvdaws xav:
– Mauxes samhwm cov thawjcoj yuav tsum saib xyuas haivneeg Yixalayees lubneej sab ntsujplig licas?
– Qhov no qhia pom hais tias lawv muaj feemxyuam licas rau tus Tswv haivneeg lubneej sab ntsujplig?
– Peb qhia tshwm kev hwm tus Tswv dhau ntawm tej haujlwm twg?
Tomqab uas txhawb Yausuas thiab cov pejxeem lub zog, Mauxes qhuab ntuas cov thawjcoj sab ntsujplig txog tej haujlwm lawv yuav tsum ua rau tus Tswv haivneeg thaum mus nyob hauv Tebchaws Coglus Tseg. Yam xubthawj Mauxes ua yog sau Vajtswv tej kevcai tseg thiab muab cob rau cov povthawj, cov Levis tej xeebntxwv thiab cov Yixalayees tej thawjcoj. Tej kevcai no tau muab ntim rau hauv lub Phijxab, cov Levis yuav kwv lub Phijxab no thiab mus ua cov pejxeem ntej thaum mus hauv Tebchaws Coglus Tseg ua ib lub cim txog qhov uas Vajtswv nrog nraim Nws haivneeg nyob.
Tiamsis, muaj ib qhov tseemceeb tus Tswv haivneeg yuav tsum paub, ntawd yog qhov uas lawv muaj ib yam ua lub cim txog Vajtswv kev tshwmsim nyob nrog, tsis tau muaj lub ntsiab hais tias tus Tswv yuav nrog nraim lawv nyob mus li. Qhov uas yuav tau tus Tswv nyob nrog ces nyob txij ntawm lawv lubneej sab ntsujplig thiab lawv nplooj siab hwm tus Tswv, ua raws li Nws tej lus cogtseg. Vim li ntawd, Mauxes thiaj samhwm kom cov thawjcoj sab ntsujplig yuav tsum nyeem Vajtswv tej kevcai thaum ua Kevcai nyob Tsev Pheebsuab rau cov pejxeem thiab lwm haivneeg uas nyob hauv tebchaws Yixalayees mloog. Lub homphiaj yog cia kom cov Yixalayees kawm xyaum hwm tus Tswv thiab xyuamxim ua raws Vajtswv Txojlus qhia. Hais tau hais tias, raws li cov Yixalayees, ces tsis muaj yam dabtsi tseemceeb npaum lawv txojkev hwm tus Tswv. Vim thaum cov pejxeem ua neej hwm tus Tswv, Nws thiaj nyob nrog nraim, foom koob hmoov, tiv thaiv, thiab pub rau lawv tau nyob hauv Tebchaws Coglus Tseg. Ntawm no yog yam uas tus Tswv haivneeg tau qhuab ntuas mus mus los los ntau zaug nyob hauv phau II Kevcai.
Ntu Vajluskub no pab peb zeem paub ib txojcai tseemceeb, ntawd yog yuav kom paub hwm tus Tswv tsis yog tsuas nyob ntawm kev coglus xwb, tiamsis yam xubthawj yog yuav tsum kawm paub Vajtswv Txojlus, muab tej uas yus paub ntawd hloov ua tes haujlwm raws li Vajtswv Txojlus qhia. Peb yuav tsis hwm tus Tswv yog hais tias tsis paub Nws lub siabnyiam, lossis thaum paub lawm ho tsis ua raws. Qhov no qhia pom hais tias, cov ntseeg Yexus yuav tsum xub tseg sijhawm los kawm Vajtswv Txojlus, thiab qhov sim siab dua ntais yog yuav tsum ua raws li tej uas tau kawm hauv lubneej txhua hnub. Tsis muaj leejtwg nyob nyob cia li xwbtim paub hwm tus Tswv, yuav tsum muaj kev sim hauv lubneej sab ntsujplig kom “muab siab npuab ua raws li Nws tej lus” (nqe 12).
Thov Vajtswv,
Tus Tswv, thov pub nyuam yaus nqhis nqhawv ua lubneej hwm Koj. Thov kom qhov uas nyuam yaus hwm thiab ua raws li Koj tej lus tsis yog vim dabtsi, tiamsis vim zeem paub ntawd yog txoj koob hmoov rau nyuam yaus lubneej. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb lubneej puas yim hnub yim hwm tus Tswv heev dua qub?
Nyeem Vajluskub hauv peb lub xyoos: Loos 6
Kênh Youtube BHKTHN:
