Klei Aê Diê Blŭ: Klei Mtô Mñă Klei Bhiăn 31:9-13
Êlan kliăng: “Bi kƀĭn bĕ phung ƀuôn sang, êkei, mniê, phung hđeh, leh anăn pô dôk jưh bhiâo hlăm ƀuôn diih, čiăng kơ diñu dưi hmư̆, leh anăn hriăm huĭ mpŭ kơ Yêhôwa, Aê Diê diih, leh anăn răng brei ngă tui hlue jih jang klei blŭ hlăm klei bhiăn anei” (Klei Mtô Mñă Klei Bhiăn 31:12)
Klei êmuh ksiêm mĭn: Hŏng ya êlan Y-Môis mtă kơ phung khua gĭt gai, răng kriê klei hdĭp myang phung Israel? Klei anăn brei ƀuh ya bruă klam brei diñu mâo hŏng klei hdĭp myang phung ƀuôn sang Aê Diê? Hŏng ya mta bruă ngă klă drei srăng bi êdah klei huĭ mpŭ kơ Aê Diê?
Leh bi mđĭ ai Y-Yôsuê leh anăn phung ƀuôn sang, Y-Môis lŏ mtă kơ phung gĭt gai klei hdĭp myang kơ bruă digơ̆ srăng ngă hŏng phung ƀuôn sang Aê Diê tơdah mŭt dôk leh hlăm Lăn Aê Diê Ƀuăn. Bruă tal êlâo hĭn Y-Môis ngă jing čih jih klei bhiăn leh anăn jao kơ phung khua ngă yang phung anak êkei Lêwi leh anăn phung khua mduôn Israel. Hră klei bhiăn anei srăng dưm hlăm lam Hip Klei Bi Mguôp, phung Lêwi srăng kkung Hip Klei Bi Mguôp anei leh anăn êbat nao êlâo kơ phung ƀuôn sang čiăng nao phă anôk Lăn Aê Diê Ƀuăn jing msĕ si sa klei bi knăl kơ klei Aê Diê dôk ti krah phung ƀuôn sang Aê Diê.
Ƀiădah lĕ, klei yuôm hĭn brei phung ƀuôn sang Aê Diê thâo jing: klei mâo sa mta mnơ̆ng bi hmô kơ klei Aê Diê dôk mbĭt amâo djŏ ôh Aê Diê dôk mbĭt nanao hŏng phung ƀuôn sang Ñu. Kyuadah klei anăn tui hlue si klei hdĭp myang leh anăn klei phung ƀuôn sang huĭ mpŭ kơ Aê Diê, djŏ tui si klei bi mguôp plah wah Aê Diê hŏng phung ƀuôn sang Ñu. Kyuanăn Y-Môis mtă brei phung gĭt gai klei hdĭp myang dlăng hră klei bhiăn Aê Diê hlăm hruê knăm Sang Čhiăm kơ jih jang phung ƀuôn sang, wăt kơ phung tue jưh bhiâo hlăm čar Israel. Čiăng hŏng klei anăn phung Israel hriăm huĭ mpŭ kơ Aê Diê leh anăn răng tui hlue ngă jih klei Ñu mtă. Dưi lač, hŏng phung Israel amâo mâo ôh klei mkăn jing yuôm hĭn kơ klei diñu huĭ mpŭ kơ Aê Diê. Kyuadah knŏng tơdah phung ƀuôn sang huĭ mpŭ kơ Aê Diê kơh Aê Diê srăng dôk mbĭt, răng mgang, brei klei jăk jĭn leh anăn brei diñu dưi dôk nanao hlăm anôk Lăn Aê Diê Ƀuăn. Anei jing klei mñă wĭt mñă nao kơ phung ƀuôn sang Aê Diê hlăm hră Klei Mtô Mñă Klei Bhiăn.
Trăn Klei Aê Diê Blŭ anei đru drei thâo kral sa êlan hdră atur anăn jing, čiăng dưi huĭ mpŭ kơ Aê Diê amâo djŏ knŏng ƀuăn jing djăp leh ôh, klei êlâo hĭn jing thâo kral Klei Aê Diê Blŭ, mơ̆ng klei thâo kral anăn nao truh kơ klei ngă tui hlue Klei Aê Diê Blŭ. Drei amâo dưi huĭ mpŭ kơ Aê Diê ôh tơdah amâo thâo klei Aê Diê čiăng, amâodah tơdah thâo kral leh klei Aê Diê čiăng ƀiădah amâo hlue ngă. Klei anei brei ƀuh brei phung đăo pioh mmông hriăm Klei Aê Diê Blŭ êlâo hĭn, leh anăn klei dleh hĭn jing brei drei yua klei drei hriăm leh hlăm klei dôk dơ̆ng ƀơ̆ng huă grăp hruê. Amâo mâo ôh pô čŏng čiăng jing mă sa čô huĭ mpŭ kơ Aê Diê, jih jang čoh čuăn mâo bi klei hriăm mjuăt klei hdĭp myang sơăi, “răng brei ngă tui hlue jih jang klei blŭ hlăm klei bhiăn anei” (êlan 12).
Klei hdĭp drei ƀrư̆ hruê ƀrư̆ huĭ mpŭ kơ Khua Yang hĭn mơ̆?
Wah lač: Ơ Khua Yang, đru kâo êpa mhao kơ klei dôk dơ̆ng ƀơ̆ng huă huĭ mpŭ kơ Ih. Brei mnơ̆ng mtrŭt kâo huĭ mpŭ kơ Ih leh anăn tui hlue ngă Klei Ih Blŭ amâo djŏ kyua sa mta klei mkăn ôh ƀiădah kyua klei kâo thâo kral anăn jing klei Ih brei kơ klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Rôm 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
