Pajlug 9:9-12
Nqe cim:
“Tus uas muaj tswvyim yog tus uas paub hwm tus Tswv. Yog koj paub Vajtswv tus uas Dawbhuv, koj thiaj yog tus totaub tiag.” (Pajlug 9:10).
Lus nug rau sawvdaws xav:
- Vajntxwv Xalumoos tau hais ib nqe lus yog cai li cas hauv nqe 9?
- Lub tswvyim pib muaj thaum twg? Thiab tswvyim muaj qab hau li cas?
- Yuav ua cas thiaj tau lub neej muaj tswvyim uas ua haum Vajtswv siab?
- Peb yuav tau kawm xyaum thiab nrhiav lub tswvyim li cas?
Ib tsoom mloog txhua tus,
Vajntxwv Xalumoos hais ib nqe lus yog cai hais tias, yog koj tseg sijhawm rau tus neeg txawj ntse nws yuav muaj tswvyim ntxiv, yog koj qhia tus neeg ncaj ncees yuav ntxiv kom nws muaj kev txawj ntse (nqe 9). Muaj tswvyim yog pib los ntawm fwm tus Tswv rau qhov tus Tswv yog lub hauvpaus ntawm lub tswvyim (Yakaunpaus 1:5). Yog li ntawd, thaum ib tug tibneeg paub fwm Vajtswv ces yog tus ntawd pib muaj tswvyim.
Vajntxwv Xalumoos tseem hais ntxiv tias: “Yog koj paub Vajtswv tus uas Dawbhuv, koj thiaj yog tus totaub tiag” (nqe 10b). Paub Vajtswv tsis yog tsuas paub los ntawm kawm txog Vajtswv xwb tiamsis yog hais txog muaj kev sib raug zoo nrog Vajtswv los ntawm ua lub siab fwm thiab pehawm Vajtswv. Yuav kom paub Vajtswv, tsuas muaj tib txoj hau kev rau peb uas yog los nyeem thiab kawm Vajtswv Txojlus xwb. Yuav nrhiav tau lub tswvyim ntawm Vajtswv, peb yuav tsum nqhis nqhawv kev kawm xyaum Vajtswv Txojlus. Yog peb ua li ntawd, peb yuav paub yam uas Vajtswv nyiam thiab ua raws li ntawd, dhau ntawd peb yuav ua rau peb paub hlub Vajtswv thiab fwm Nws ntau heev ntxiv. Peb yim kawm paub Vajtswv peb yim muaj tswvyim, yim txawj ntse thiab yim totaub ntxiv, paub ua neej twb taubhau nrog txhua yam xwm txheej thiab txiav txim siab mus rau qhov uas yog.
Tus Tswv tej lus hauv Pajlug no kuj qhia hais tias: “Yog koj muaj tswvyim, koj yuav muaj koob muaj meej” (nqe 12). Muaj tswvyim pab tau tibneeg paub ua zoo nrog lwm tus, muaj nqis rau tus kheej thiab rau tej neeg ib ncig. Lub tswvyim no tsis yog muaj tswvyim raws li tibneeg kev ntaus nqi, tiamsis raws li Vajtswv tus uas yog lub hauvpaus tswvyim kev ntau nqi. Yog li ntawd, peb yuav tau kawm xyaum lub tswvyim los hauv Vajtswv Txojlus. Leejtwg hlub Vajtswv ces yeej ntshaw kawm paub Vajtswv thiab kawm xyaum ntawm Vajtswv txhua hnub. Tiamsis yog leejtwg tsis quavntsej kawm xyaum Vajtswv Txojlus ces qhov ntawm yog lub cim qhia hais tias, yog cov uas tsis paub Vajtswv thiab tsis muaj tswvyim.
Yog Vajtswv cov menyuam, peb tau Vajtswv pub tej lus muaj tswvyim uas yog Vajtswv Txojlus. Peb yuav tau kawm xyaum tswvyim hauv phau Vajluskub kom tau lub neej muaj tswvyim ua haum Vajtswv siab. Vajtswv haiv neeg tsis yog tsuas mloog Vajtswv Txojlus hauv txhua hnub kaj los ntawm Vajtswv cov tub txib qhuab qhia ces txaus, tiamsis peb yuav tau yoog cai ntawm sab ntsujplig los kawm kawm Vajtswv Txojlus txhua hnub ntawm tus kheej nrog Vajtswv. Txhua tus ntseeg Yexus yuav tau ua raws tus cai tswj ntawm sab ntsujplig, los kawm xyaum lub tswvyim pub rau nyias lub neej.
Thov Vajtswv,
Tus Tswv, nyuam yaus ua tsaug vim Koj pub cov lus tswvyim uas yog phau Vajluskub rau nyuam yaus. Thov Koj pab nyuam yaus tas siab yoog cai tswj ntawm sab ntsujplig ntawm kev kawm xyaum Koj Txojlus kom nyuam yaus muaj tswvyim ua lub neej haum Koj siab. Amees.
Ib tsoom mloog uas hmov thiab tshua,
Peb nrhiav thiab kawm xyaum tej lus muaj tswvyim zoo li cas lawm?
Nyeem Vajluskub hauv peb lub xyoo: Yauj 6
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
