Klei Aê Diê Blŭ: Klei Bi Hriêng 9:9-12
Êlan kliăng: “Klei huĭ mpŭ kơ Yêhôwa jing klei kčưm kơ klei thâo mĭn, leh anăn klei thâo kral Pô Doh Jăk jing klei thâo săng” (Klei Bi Hriêng 9:10).
Klei êmuh ksiêm mĭn: Ya mta klei bhiăn mtao Salômôn hưn mdah hlăm êlan 9? Mơ̆ng mphŭn mâo klei thâo mĭn klei thâo mĭn? Ya klei tŭ dưn mâo mơ̆ng klei thâo mĭn? Si drei ngă čiăng dưi mâo knhuah hdĭp thâo mĭn leh anăn bi mơak kơ Khua Yang? Si êlan brei drei hriăm leh anăn tui duah klei thâo mĭn?
Mtao Salômôn hưn êdah sa mta klei bhiăn, tơdah brei mmông găl kơ sa čô thâo mĭn, ñu srăng jing thâo mĭn hĭn, leh anăn tơdah bi hriăm sa čô mnuih kpă ênô, ñu srăng jing thâo lu hĭn (êlan 9). Klei thâo mĭn kčưm dơ̆ng mơ̆ng Aê Diê kyuadah Ñu jing phŭn kơ klei thâo mĭn (Y-Yakơ 1:5). Kyuanăn, tơdah sa čô thâo huĭ mpŭ kơ Aê Diê klei anăn yơh jing kčưm kơ klei thâo mĭn.
Mtao Salômôn ăt lŏ hưn mdah thiăm mơh: “leh anăn klei thâo kral Pô Doh Jăk jing klei thâo săng” (êlan 10b). Klei thâo kral Khua Yang amâo djŏ ôh knŏng jing mâo klei thâo săng kơ Khua Yang ƀiădah wăt dôk hlăm klei bi mguôp hŏng Khua Yang hŏng ai tiê mpŭ mni leh anăn kkuh mpŭ kơ Ñu. Čiăng mâo klei thâo kral Khua Yang, amâo lŏ mâo klei mkăn hĭn kơ klei dlăng leh anăn hriăm Klei Aê Diê Blŭ ôh. Čiăng tui duah leh anăn hriăm klei thâo mĭn mơ̆ng Khua Yang, brei drei mâo klei êpa mhao hriăm Klei Aê Diê Blŭ. Kyua hŏng klei anăn yơh srăng dưi thâo kral êlan leh anăn klei Aê Diê čiăng hlăm klei Ñu Blŭ kăp tui ngă hlue, mbĭt anăn srăng đru drei mâo klei khăp hĭn leh anăn huĭ mpŭ kơ Khua Yang lu hĭn. Ktang hriăm čiăng thâo kral Aê Diê msĕ snăn, drei srăng thâo mĭn hĭn, knhâo hĭn leh anăn klei thâo săng ƀrư̆ jing ƀơ̆ng mta hĭn tơdah tlă anăp hŏng ya mta klei truh hlăm klei hdĭp leh anăn mâo klei čuăn ngă djŏ hlăm djăp mta klei truh.
Klei mtô hlăm Klei Bi Hriêng tinei ăt hưn klă: “Tơdah ih thâo mĭn, klei thâo mĭn jing yuôm kơ ih pô; tơdah ih kreh mưč, hjăn ih pô srăng klam klei bi kmhal” (êlan 12). Klei thâo mĭn đru anak mnuih thâo dôk dơ̆ng ƀơ̆ng huă bi jăk hdơ̆ng găp leh anăn ba klei tŭ dưn kơ drei pô wăt kơ phung riêng gah msĕ mơh. Ƀiădah klei thâo mĭn tinei amâo djŏ jing klei thâo mĭn tui si klei mĭn mnuih ôh, ƀiădah tui si Aê Diê, jing phŭn kơ klei thâo mĭn. Kyuanăn, brei drei hriăm klei thâo mĭn mơ̆ng Klei Aê Diê Blŭ. Hlei pô khăp kơ Aê Diê snăn čang hmăng dưi hriăm čiăng thâo kral Ñu leh anăn hriăm mơ̆ng Ñu grăp hruê. Bi hlei pô amâo uêñ ôh kơ klei hriăm đơ mta klei jing dŏ Aê Diê, klei anăn bi knăl kơ phung amâo thâo kral Aê Diê leh anăn kƀah klei thâo mĭn.
Jing phung anak Aê Diê, Ñu brei kơ drei Klei Blŭ thâo mĭn jing Klei Aê Diê Blŭ yơh. Brei drei hriăm klei thâo mĭn mơ̆ng Hdruôm Hră Klei Aê Diê Blŭ čiăng mâo knhuah hdĭp thâo mĭn leh anăn bi mơak kơ Aê Diê. Phung anak Aê Diê amâo djŏ knŏng hmư̆ Klei Aê Diê Blŭ grăp hruê kăm sa blư̆ mơ̆ng phung dĭng buăl Aê Diê mtô jing djăp leh yơh ôh, ƀiădah brei djă pioh klei kpĭ mjuăt klei hdĭp mngăt drei hriăm Klei Aê Diê Blŭ grăp hruê hlăm mmông pioh dôk hjăn hŏng Khua Yang. Grăp čô phung đăo brei ngă klei bi mjuăt anei čiăng hriăm klei thâo mĭn kơ klei hdĭp drei pô.
Si drei tui duah leh anăn hriăm klei thâo mĭn grăp hruê?
Wah lač: Ơ Khua Yang, bi mni kơ Ih brei leh kơ kâo Klei Blŭ thâo mĭn Ih jing Hdruôm Hră Klei Aê Diê Blŭ. Akâo kơ Khua Yang đru kâo djă pioh klei kpĭ mjuăt klei hdĭp mngăt hŏng jih ai tiê hriăm Klei Ih Blŭ čiăng mâo klei thâo mĭn dưi hdĭp bi mơak kơ Ih.
Dlăng Klei Aê Diê Blŭ hlăm tlâo thŭn: Y-Yôp 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
