I Petus 2:21-24
Nqe cim:
“Kuv yog tus uas muaj siab dawb siab zoo; yog li ntawd, nej cia li los kwv kuv tus quab thiab kawm tej uas kuv qhia, nej thiaj yuav tau so” (Mathais 11:29)
Lus nug rau sawvdaws xav:
– Cov ntseeg Yexus tau hu kom kawm raws tus Tswv dabtsi? Vim li cas?
– Tswv Yexus qhia zaj kawm tiv txomnyem li cas?
– Peb cheemtsum kawm raws tus Tswv zoo li cas?
Txojkev nrog tus Tswv mus yog txojkev txomnyem (Lukas 24:25-26). Cov ntseeg Yexus yuav tsum taug Tswv Yexus tus hneev taw tiv kev txomnyem. Timthawj Petus twb raug tiv txomnyem ib yam li Tswv Yexus, yog li Petus nqua hu kom cov neeg uas nrog tus Tswv mus yuav txaus siab hlo tiv txomnyem li tus Tswv Txojlus qhia, “Yog leejtwg xav nrog kuv mus, tus ntawd yuav tsum tswj nws lub siab thiab kwv nws tus ntoo khaublig nrog kuv mus” (Malakaus 8:34). Peb tiv txomnyem los ntawm ntau lub vim chiv, tej zaus yog nqi zog ntawm txojkev txhaum yus ua. Tiamsis Timthawj Petus tabtom nqua hu cov ntseeg Yexus tiv txomnyem vim txojkev ua zoo. Vajtswv Txojlus nqua hu kom peb kawm tau zaj kawm tiv txomnyem no vim “Yexus Khetos twb raug kev tsimtxom this nej…” (nqe 21). Tswv Yexus yog ib tug “tubqhe tiv txomnyem”, ntawm lub meejmom yog Vajtswv, Nws tso lub meejmom tseg kam los ua ib tug tubqhe thiab mloog lus mus txog thaum tuag (Filipis 2:7-8). Peb tabtom ua neej nyob rau tiam uas puv npho txojkev tsis ncaj, “txhua tus uas xav ua lub neej kom Vajtswv tau ntsejmuag, lawv yeej raug kev tsimtxom” (II Timautes 3:12). Tus Tswv twb tiv txomnyem cawm peb, ces peb kuj txaus siab hlo raug txomnyem.
Tswv Yexus yog “Xibhwb”, Nws qhia zaj uas tiv txomyem rau Nws haivneeg los ntawm qhov uas“Yexus Khetos twb raug kev tsimtxom this nej thiab ua yam ntxwv rau nej xyaum lawm, nws ua li ntawd nej thiaj yuav ua tau li nws ua” (nqe 21). Tus Tswv qhia zaj tiv txomnyem no los ntawm Nws kev ua neej, “Yexus tsis tau ua ib qho txhaum, thiab tsis muaj leejtwg hnov nws hais ib lo lus dag li” (nqe 22). Thaum ntsib kev ua tsis ncaj, raws li peb xav ces yuav teb tej lus tsis zoo, mob siab, hais phem lossis ua pauj. Tiamsis tus Tswv ua qauv txog qhov kev tiv txomnyem thiab txo hwjchim, “thaum luag thuam nws, nws tsis teb luag ib los li; thiab thaum luag tsimtxom nws, nws tsis foom luag” (nqe 23). Tus Tswv twb muab Nws fij rau Vajtswv tus uas txiav txim ncaj ncees lawm.
Peb cheemtsum kawm raws tus Tswv tus qauv ntsigtxog tiv kev txomnyem vim lwm tus, thiab tus Tswv lub npe. Tswv Yexus tiv txomnyem kom this tau neeg lub txim, cawm tau cov ntseeg Nws dim lub txim txhaum, thiab pub muaj lub neej tshiab (nqe 24). Qhov uas Nws raug nplawm, nqaij ntuag ntshav nrog yog kho kom neeg ntiajteb tus mob kev txhaum zoo. Cov ntseeg Yexus cheemtsum zeem paub yus yog tus yaj uas yuam kev, ua li lub siab qub, kev txhaum. Tiamsis vim ntseeg, peb tau rov los cuag tus Tswv yug yaj, yog tus Tswv tswj tuav txojsia. Peb cheemtsum nco ntsoov tias txojkev mus txog kev kaj siab yuav tsum mus dhau tus ntoo khaublig. Yog li cia li kawm raws tus Tswv Yexus ua siab ntev tiv txomnyem vim Vajtswv lub npe.
Thov Vajtswv,
Vajtswv tus uas siab ntev, thov Koj hlub nyuam yaus uas yog tus menyuam yaj ploj lawm tau cawm rov los ntawm tus Tswv txojkev tuag txhiv. Thov pab kom nyuam yaus kawm raws tus Tswv, tiv txomnyem vim tus Tswv lub npe, ua qauv zoo, kom cawm tau tej neeg nyob ib ncig. Nyuam yaus tuav Tswv Yexus lub npe thov, Amees.
Peb kawm raws tus Tswv tus qauv tiv txomnyem zoo li cas?
Nyeem Vajluskub hauv peb lub xyoo: Tes Haujlwm 8
Kênh Youtube BHKTHN:
