Klei Aê Diê Blŭ: Klei Kbiă 3:1-12
Êlan kliăng: “Aê Diê lač, “Kâo srăng dôk mbĭt hŏng ih, leh anăn anei klei bi knăl kơ ih kâo jing pô tiŏ nao ih: leh ih atăt ba phung ƀuôn sang kbiă mơ̆ng čar Êjip, diih srăng kkuh mpŭ kơ Aê Diê ti dlông čư̆ anei.” (Klei Kbiă 3:12)
Klei êmuh ksiêm mĭn: Ya mta phŭn Y‑Môis hngah kơ asăp Aê Diê iêô? Si klei ñu thâo săng čhuai snăn amâo jhŏng ngă ôh bruă klam? Si klei Aê Diê ƀuăn mđĭ ai drei hlăm thŭn mrâo hlue si mlan ƀlĕ?
Hlăm tlâo hruê Tết hlue mlan ƀlĕ thŭn anei, drei hrăm mbĭt ksiêm mĭn klei yăl dliê Aê Diê iêô Y‑Môis, čiăng mâo klei mđĭ ai mă bruă kơ Aê Diê jăk hĭn hlăm thŭn mrâo.
Y‑Môis hriăm leh hlăm sang mtao Êjip hlăk jing sa čô anak êkei mtao, ñu jing leh sa čô mnuih mbruă leh anăn mâo lu klei thâo. Ƀiădah mâo sa klei truh ngă kơ ñu đuĕ leh anăn hơĭt ai tiê kiă biăp kơ gŏ sang kmha ñu ti krĭng Madian. Mâo sa hruê, Aê Diê bi êdah hlăm êlah pui ti krah sa bĭt ƀur amâo thâo ram, iêô ñu lŏ wĭt bi mtlaih phung ƀuôn sang Israel tlaih mơ̆ng klei jing hlŭn leh anăn gĭt gai phung ƀuôn sang Ñu kbiă mơ̆ng Êjip, ñu kĭ kơ̆ leh anăn duah klei čiăng hngah. Ñu wĭt lač hŏng Aê Diê ñu huĭ kơ phung ƀuôn sang amâo đăo, ñu huĭ kơ pô amâo thâo blŭ dleh mă ai mtao Pharaôn, ñu huĭ amâo tŭ jing kyua bruă Aê Diê jao prŏng đei…
Hlăk Y‑Môis lač “Hlei kâo jing” tơl jhŏng ngă bruă prŏng prĭn snăk? Snăn Aê Diê wĭt lač “Kâo srăng dôk mbĭt hŏng ih”. Hlăk Y‑Môis bi mĭn “Kâo ngă” snăn Aê Diê mñă kơ ñu snei, amâo mâo djŏ ih ngă ôh, ƀiădah Kâo ngă mbĭt hŏng ih, brei klei dưi kơ ih, bi blah mbĭt hŏng ih, ƀiădah brei ih kgŭ leh anăn kčưm ngă. Kyua thâo săng čhuai, snăn ñu hngah kơ bruă Aê Diê jao.
Sa thŭn mrâo hlue mlan ƀlĕ dôk truh ti ală mta, grăp čô drei mâo dŭm hruê mlan găl ênưih ƀiădah ăt srăng amâo kƀah ôh hruê mlan dleh dlan, srăng mâo klei lông dlăng prŏng, srăng mâo klei ênguôt hnĭng hŏng klei mơak, srăng mâo mmông jăk mơak dleh dlan hlăm klei hdĭp… Dlăng phă anăp lu blư̆ drei ƀuh ai ktang pô dleh snăk dưi găn jih, lu mmông ăt čiăng kdŭn tluôn mơh. Bi mni kơ Khua Yang kyua jih jang klei anăn Aê Diê thâo jih, Aê Diê ƀuh leh, Aê Diê hmư̆ leh (êlan 7). Hŏng drei thŭn mrâo hlue mlan ƀlĕ jing êdei anăp ƀiădah ti anăp Aê Diê knŏng jing sa hruê mlan ară anei hĭn. Drei jưh knang hlăm hruê mmông ƀiădah Ñu amâo mâo ôh. Khua Yang Yêsu ƀuăn leh hŏng phung ƀĭng kna êlâo kơ đĭ hlăm adiê snei: “Leh anăn nĕ anei, kâo dôk mbĭt hŏng diih nanao tơl knhal tuč lăn ala” (Y‑Mathiơ 28:20). Klă sĭt năng mđing, Aê Diê dôk mbĭt nanao hŏng drei, hrăm mbĭt mă bruă hŏng drei, Ñu amâo tuôm đuĕ kbưi, lui ôh drei. Brei hrăm mbĭt ƀuăn hŏng Khua Yang leh anăn hdơ̆ng drei hlăm thŭn mrâo anei, grăp čô drei bi mklă srăng kgŭ păn kjăp kơ Khua Yang leh anăn Klei Aê Diê Blŭ čiăng sa ai tiê mă bruă kơ Aê Diê.
Ơ ƀĭng dôk hmư̆ khăp hơiêng,
Drei thâo kral Khua Yang dôk mbĭt nanao hŏng pô čiăng mă bruă kơ Aê Diê mơ̆?
Wah lač: Ơ Khua Yang, kâo bi mni kơ Ih kyua klei Aê Diê ƀuăn bŏ hŏng klei mđĭ ai jing Ih dôk mbĭt nanao hŏng kâo. Akâo kơ Ih đru kâo jih ai tiê mă bruă kơ Ih, hiu hưn klei pap Ih hlăm thŭn mrâo hŏng ai ktang Khua Yang brei. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 24
Kênh Youtube BHKTHN: