Mathiơ 20:1-7
“Lu bơ̆n âu boih ‘Bok Kei-Dei ‘mêm mơnat, na rơih iŏk bơ̆n, wă kơ bơ̆n jing kon Sư…” (Kôlôsse 3:12a)
Nơ̆r jet tơchĕng pơwao:
– Kră Yang Yêsu pơtih gia dêh char ‘Bok Kei-Dei thoi yơ?
– Yua kơ kiơ tơ’ngla mir oei chă hơnơ̆ng bơngai jang lăm pơgar hơmu Sư đơ̆ng pơge truh kơsơ̆?
– Bơ̆n kăl kơ pơkăm kiơ kơplah băt kơ Kră Yang ‘mêm mơnat kơ bơ̆n?
Kră Yang pơtih gia dêh char ‘Bok Kei-Dei thoi tơ’ngla năm chă bơngai jang lăm mir hơmu Sư. Yua kơ lăm dêh Juđê sơ̆ đei minh anih đe krao anih mơdro tơ kơchơ chă bơngai bơ̆jang, lơ bơngai năm tơ noh gô lu tơ’ngla năm chă bơ̆n jang. Lu sư bơngai mă ưh kơ đei chŭn mir, chang chă đe krao jang wă kơ đei jên rong akâu kơdih păng hnam dơnŏ. Kơsô̆ jên apah noh bơngai jang păng tơ’ngla pơma dơnuh dih băl. Lăm tơdrong 2, tơdrong đei pơma dơnuh pơdrơ̆ng ăn minh năr minh hlak jên so sơ̆ gơh wei rong akâu kơdih păng hnam dơnŏ lăm minh năr.
Tơdrong tơ’ngla năm chă hơnơ̆ng bơngai jang đơ̆ng pơge truh kơsơ̆ wă chă thim bơngai jang lăm pơgar hơmu yua kơ đei lơ tơdrong wă jang. Truh ‘năr pơđăm jơ kơsơ̆. Tơ’ngla mir lĕch lăng dơ̆ng tơ anih đe mơdro oei ‘bôh lơ bơngai ngôi đĕch yua kơ ưh kơ đei bu chă lu sư jang. Hăm jơhngơ̆m mơnat. Tơ’ngla mir iŏk đĭ lu bơngai âu năm mơ̆t jang lăm mir hơmu sư. Bơyan pơtăm plei hơmu tơ dêh Juđê đei jô̆ đơ̆ng kơplah hơmu lĕch pơkao truh tơ phĕ plei dang kiơ̆ ‘bar khei, tơ’ngla kăl kơ chă bơngai jang wă bơwei ‘long hơmu sư, đơ̆ng bơyan phĕ kăl dêh kơ bơngai jang wă sơ̆k kro păng hmĕt iŏk đak adrol kơ bơyan ‘mi truh. Kơlih kơ thoi noh, rai wă jê̆ tôch bơyan tơ’ngla kăl dêh bơngai jang mă lơ wă phĕ plei hơmu wă kơ mă tam.
Đơ̆ng tơdrong hơ’mon ‘nâu, bơ̆n ‘bôh bơ̆n kơdih. ‘Bok Kei-Dei bơih ‘mêm mơnat, rơih iŏk bơ̆n păng ăn kơ bơ̆n gơh mơ̆t lăm tơdrong tơ’bưh hăm Kră Yang. Lăm khul bơngai lui đei lơ bơngai lui kơ Kră Yang đơ̆ng sơ̆, mălei kư̆m đei bơngai ‘nao lui kơ Kră Yang, đĭ đăng jơ̆ bơngai mă Kră Yang ‘mêm mơnat păng rơih iŏk. Tơdrong bơ̆n kăl kơ pơkăm noh mă khan lui kơ Kră Yang dang yơ, kư̆m athei đĭ jơhngơ̆m bơ̆jang kơ Kră Yang hăm tơdrong hiơ̆k tih dêh. Tơdrong pơhlŭ hăm lu đĭch đam noh alah kơplah tơchĕng khan bơ̆n jang lơ dêh dah mă ưh kơ ‘bôh tơ’ngla năm chă lăng, druh kiơ̆ akhan. Bơ̆n kăl kơ bơ̆jang kơ Kră Yang đĭ jơhngơ̆m yua kơ băt bơnê kơ Kră Yang krao bơ̆n thoi jơhngơ̆m ‘bok Pôl lăm kơthơ I Timôthê 1:16, “Mălei ‘Bok Kei-Dei oei mơnat kơ inh na pơklaih inh yua kơ Kră Yang Yêsu Krist wă tơbăt kơ kon bơngai Sư mơnat tơpă kơ inh mă pơm yoch hloh kơ đĭ đăng bơngai nai…” Rim ‘nu kơ bơ̆n kăl kơ ‘blŏk nơ̆r Kră Yang khan, “’Ba lơ ră mălei hui bơngai năm kĕch ăn” wă kơ wang hơdai tơgŭm ră roi Tơdrong ‘Nao ‘Lơ̆ng hăm tơdrong hơpơi wă kơ lơ bơngai băt Kră Yang păng gơh klaih.
Kơkuh kơ Kră Yang, inh bơnê kơ Ih yua kơ Ih đei rơih păng ăn kơ inh mơ̆t lăm pơgar hơmu noh khul bơngai lui kơ Ih, apinh Ih ăn kơ inh băt bơnê kơ Kră Yang wă kơ đĭ jơhngơ̆m bơ̆jang kơ Kră Yang mă tơnăp. Yua anăn Kră Yang Yêsu Krist, Amen!
Bơ̆n hăm trŏ kơ đĭch đam bơ̆jang hăm tơdrong hiơ̆k hloh tơpă wă bơnê kơ Kră Yang ăn kơ bơ̆n gơh mơ̆t tơ dêh char ‘Bok Kei-Dei ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 18
Kênh Youtube BHKTHN:
