Luka 23:44-49
“Yêsu pơma ‘bơ̆r re khan: Ơ ‘Bă, Inh pơjao ăn kơ Ih Bơhngol Inh.” Na lăp Sư pơma đang boih, na Yêsu kơtĕch jơhngơ̆m hloi.” (Luka 23:46)
Nơ̆r jet tơchĕng pơwao:
– Kơplah jơ Kră Yang wă kơtĕch jơhngơ̆m thoi yơ?
– Nơ̆r Kră Yang Yêsu pơma tuch luch wă khan kiơ?
– Lu bơngai mă lăng ‘bôh tơdrong âu jơhngơ̆m lu sư thoi yơ?
Năr pơđăm, đe pơ̆ng Kră Yang Yêsu tơ ‘long pơglang. Lăp ‘năr dơ̆ng ‘bôh glĭp kơ măng mu pă đei hơdah jơ̆p kơ teh đak truh tơ pêng jơ kơsơ̆ (trong 44). Lăm năr ‘noh trŏ sư tŏ dêh mălei jing măng mu, yua kơ jơ ‘noh trŏ kơ ‘Bok Kei-Dei ăn tơdrong phak, jơ mă Sư pơm kơ đĭ đăng teh đak ngăn hreh ‘bơ̆t tơdrong Sư sek tơlang. Hăm tơdrong măng mu, đei minh tơdrong hlĭch truh. Che đe pơgăn tơ hnam akŭm ‘Bok Kei-Dei tơm kư̆m tơ hek chuơ̆ng tŏk bŏk hloi mơ̆n, ưh kơ ăn kơ kon bơngai lăng ‘bôh anih ‘Bok Kei-Dei kơpal teh, tơ hek chuơ̆ng tŏk bŏk hloi (trong 45). Tơdrong Kră Yang Yêsu lôch đei pơrăm lê̆ tơdrong pơgăn lăm ‘Bok Kei-Dei păng kon bơngai, wă kơ bơngai gơh năm ‘bơ̆t anăp ‘Bok Kei-Dei ‘lơ̆ng rơgoh.
Adrol kơ kơtĕch jơhngơ̆m, Kră Yang pơma nơ̆r tuch luch, “Ơ ‘Bă, Inh pơjao ăn kơ Ih bơhngol Inh” (trong 46). Nơ̆r khan tơbăt ‘nâu tơ’bôh tơdrong lui gơnang păng pơjao tôm tơdrong kơ ‘Bă, mă khan ‘bơ̆t jơ wă kơ tĕch jơhngơ̆m. Kư̆m wă tơbăt Kră Yang Yêsu đei jang keh tơdrong jang Yang ‘Bă pơjao, Sư wă brŏk tơ Yang ‘Bă. Tơdrong tơdă gah tơdrong Dŏng pơklaih đei pơm keh bơih. Tôm tơdrong đang bơih!
Lăng ‘bôh jơ kơplah Kră Yang Yêsu chu lôch, khul mă mônh ‘noh lu bơngai ‘bôh Sư lôch lăm noh đei ‘bok tih linh, sư ưang kơ ‘Bok Kei-Dei khan, Kră Yang Yêsu ‘lơ̆ng tơpăt ưh kơ đei pơm yoch kiơ ôh (trong 47). Tơdrong Kră Yang Yêsu lôch tơgŭm kơ lu sư băt sĭt. Khul mă ‘bar ‘noh lu kon pơlei lu sư ơh sơ’ngon tơpă na tŭr kơtơh brŏk hloi tơ anih hnam sư kơdih (trong 48). Tơplih kơ tơdrong chơt hiôk lăp đon hăm tơdrong lu sư wă adrol noh, pơ̆ng pơlôch Sư tơ ‘long pơglang, lei na tơdrong Kră Yang Yêsu lôch pơm kơ lu sư ưh kơ hiôk. Khul mă pêng ‘noh lu buăl juăt Kră Yang Yêsu. Lu sư dơ̆ng đơ̆ng ataih ‘biơ̆ wă răp lăng dôm tơdrong đe pơm kơ Kră Yang Yêsu (trong 49).
Jơ hnơ̆r chăl Kră Yang Yêsu chu pơmat lôch noh jơ hnơr pơm lơ tơdrong tơplih, đơ̆ng plĕnh teh truh tơ jơhngơ̆m kon bơngai. ‘Noh bơih jơ mă đei pơm keh tơdrong dŏng pơklaih, păng kon bơngai gơh đei jơ wă lăng hơmet ming jơhngơ̆m kơdih. ‘Bôh Kră Yang Yêsu lôch, lu bơngai mă ‘bôh oei tơ lăm noh đei jơhngơ̆m phara pha, mă khan ưh tam mă tôm mălei đei tơ’bôh tơdrong tơplih tih đơ̆ng jơhngơ̆m lu sư. Apinh Kră Yang tơgŭm kơ bơ̆n ‘nĕ ăn kơ năr ‘blŏk kơ Kră Yang chu pơmat hlôi hloh hrĕnh tĕnh, mălei jơhngơ̆m ‘maih wă tơpă pơm tơwih đơ̆ng tơdrong chu pơmat lôch noh.
Kơkuh kơ Yang ‘Bă mă ‘lơ̆ng rơgoh, bơnê kơ Yang ‘Bă đei ăn Kon Ih lôch tơ ‘long pơglang. Apinh Ih tơgŭm ăn kơ inh băt, tơchĕng ‘blŏk gah jơ Kră Yang chu lôch, wă kơ pơchŭt kơ jơhngơ̆m inh adrin bơ̆jang kơ Ih. Krao khan yua anăn Kră Yang Yêsu Krist, Amen.
Tơdrong Kră Yang Yêsu lôch đei tơplih kiơ lăm jơhngơ̆m bơ̆n?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 11
Kênh Youtube BHKTHN:
