Klei Aê Diê Blŭ: Hêbrơ 10:11-18
Êlan kliăng: “Kyuadah hŏng knŏng sa mnơ̆ng myơr Ñu mjing jăk klă leh kơ jih jang ênuk phung Ñu bi doh jăk leh” (Hêbrơ 10:14)
Klei êmuh ksiêm mĭn: Si ngă klei mdê phung khua ngă yang phung Israel hŏng Yang Krist? Mnơ̆ng ngă yang Yang Krist myơr ya boh yuôm mâo? Ya drei ngă čiăng dưi mâo “klei jăk klă kơ jih jang ênuk”?
Leh mñă wĭt mñă nao lu blư̆ kơ klei Khua Yang Yêsu ngă yang klă ênŭm, pô čih hră Hêbrơ bi ruĕ hŏng klei bi msĕ klă leh anăn jăk snăk, sa nah jing phung khua ngă yang phung Israel “dôk dơ̆ng” ngă bruă, tĭng nah dih jing Khua Yang Yêsu, sa čô khua ngă yang ƀiădah lĕ “dôk gŭ” hlŏng lar. Kyuadah mnơ̆ng ngă yang aguah tlam “amâo tuôm dưi lăm hĕ klei soh ôh” ƀiădah jing yuôm knŏng bhiâo, kyuanăn phung khua ngă yang dôk dơ̆ng grăp hruê ngă nanao bruă myơr mnơ̆ng ngă yang anei. Ƀiădah, kyuadah Khua Yang Yêsu myơr leh Ñu pô jing mnơ̆ng ngă yang klă ênŭm snăn ară anei “Ñu dôk gŭ tĭng knhuă kơ Aê Diê” hlŏng lar (êlan 11-12). Tĭng nơhuă jing anôk bŏ hŏng klei mpŭ leh anăn klei dưi. Khua Yang Yêsu dôk gŭ tinăn kiă kriê mbĭt hŏng Aê Diê Ama, čiăng dlăng bruă yang jhat ngă amâo mâo klei dưi ôh leh anăn đru wah lač brei nanao kơ phung đăo kơ Ñu.
Hŏng mnơ̆ng ngă yang Khua Yang Yêsu myơr leh, “Ñu mjing jăk klă leh kơ jih jang ênuk phung Ñu bi doh jăk leh” (êlan 14). “Phung bi doh jăk leh” čiăng lač kơ phung đăo kơ Khua Yang Yêsu, phung Aê Diê pioh brei mdê, mâo djăp hnơ̆ng čuăn čiăng kơ Aê Diê tŭ. Anăn jing phung dôk hlăm klei bi mguôp hŏng Aê Diê (êlan 16), phung Aê Diê lač, “Kâo amâo srăng lŏ hdơr ôh kơ klei soh amâodah klei jhat ƀai diñu” (êlan 17).
Wăt tơdah jing phung doh jăk Aê Diê ƀiădah drei thâo kơ drei pô ăt dôk lu klei kƀah awăt leh anăn mâo lu klei têč hnêč snăn si ngă dưi jing “jăk klă kơ jih jang ênuk” lĕ? Klei Aê Diê Blŭ lač, “Kâo srăng dưm klei bhiăn Kâo hlăm ai tiê diñu, leh anăn Kâo srăng čih klei bhiăn anăn hlăm klei mĭn diñu” (êlan 16). Snăn yơh, amâo djŏ drei gĭr ngă jih klei čih leh hlăm klei bhiăn čiăng dưi truh kơ klei jing “jăk klă kơ jih jang ênuk” ôh, ƀiădah Aê Diê pô yơh dưm klei bhiăn Ñu hlăm ai tiê leh anăn klei mĭn drei. Amâodah lač snei, Aê Diê mjing drei jing mnơ̆ng hrih mrâo hlăm Ñu (II Kôrantô 5:17). Anak mnuih amâo mâo jăk klă ôh ƀiădah Aê Diê jing Pô jăk klă. Kyuanăn, bruă yuôm bhăn brei grăp čô phung đăo ngă jing bi đuôm kjăp ñu pô hŏng Khua Yang Yêsu, amâo bi ktlah mơ̆ng Ñu sa mnĭt mông ôh, čiăng kơ hnoh êrah klei hdĭp Ñu đoh hlăm klei hdĭp drei, brei klei myang čiăng kơ drei hdĭp klei hdĭp mâo klei dưi hlăm Ñu. Hlăk anăn amâo djŏ drei pô ôh dôk hdĭp ƀiădah Khua Yang dôk hdĭp hlăm drei leh anăn klei hdĭp Ñu sĭt nik jing klei hdĭp “jăk klă kơ jih jang ênuk.”
Ya klei drei ngă leh, dôk ngă leh anăn srăng ngă čiăng kơ drei mâo klei bi đuôm kjăp nanao hlăm Khua Yang čiăng kơ klei hdĭp Ñu đoh hlăm klei hdĭp drei?
Wah lač: Ơ Khua Yang, lač jăk kơ Ih pap brei leh klei soh kâo, brei kơ kâo mâo klei bi mguôp hŏng Ih, mjing kâo jing jăk klă čiăng kơ kâo dưi hriê giăm Ih. Kâo thâo kơ kâo êdu awăt, kyuanăn kâo akâo kơ Ih hdĭp hlăm kâo leh anăn Ih pô srăng mjing klei jăk klă kơ klei dôk kƀah awăt hlăm klei hdĭp kâo.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 27:27-28:10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
