Klei Aê Diê Blŭ: Klei Yap 27:15-23
Êlan kliăng: “Akâo kơ Yêhôwa, Aê Diê kơ phung mngăt jih jang mnuih ruah sa čô mnuih jing khua kơ phung bi kƀĭn, pô srăng kbiă nao ti anăp diñu leh anăn lŏ mŭt ti anăp diñu, pô srăng atăt diñu kbiă leh anăn atăt diñu mŭt; čiăng kơ phung Yêhôwa bi kƀĭn amâo jing msĕ si phung biăp amâo mâo mgăt ôh.” (Klei Yap 27:16-17)
Klei êmuh ksiêm mĭn: Čiăng mâo mnuih lŏ čuê ngă bruă kơ Khua Yang, ya klei Y‑Môis ngă leh, tơdah ñu dơ̆ng wĭt hŏng phung aê aduôn? Hlei pô Khua Yang ruah leh, leh anăn ya klei Y‑Môis ngă hŏng pô lŏ čuê ñu? Ya klei brei Phung Sang Aê Diê ngă čiăng jao bruă khua gĭt gai kơ gưl ênuk lŏ čuê djŏ tui si klei Khua Yang čiăng?
Hŏng bruă djă jing khua gĭt gai phung ƀuôn sang Israel ktuê jih 40 thŭn, Y‑Môis thâo kơ ñu dơ̆ng wĭt hŏng Khua Yang, snăn ñu čiăng jao bruă khua gĭt gai kơ pô mkăn lŏ čuê. Ñu akâo kơ Aê Diê brei sa čô khua kiă kriê klei hdĭp mngăt phung ƀuôn sang Khua Yang, kyuadah diñu jing biăp leh anăn phung biăp čiăng mâo mgăt kiă (êlan 17; Y‑Sakari 10:2). Khua Yang wĭt lač kơ klei ñu akâo, hưn klă Y‑Yôsuê yơh “mnuih mâo mngăt myang hlăm ñu”, srăng jing pô năng hĭn. Ñu ktrâo brei Y‑Môis ngă tui si klei bhiăn jao klei dưi jing khua kiă kriê kơ Y‑Yôsuê. Êlâo hĭn, brei ñu “ênă kngan” ti Y‑Yôsuê. Êdei tinăn, atăt Y‑Yôsuê nao dôk dơ̆ng ti anăp khua ngă yang Y‑Êlêasar leh anăn jih jang phung Israel dôk bi kƀĭn, Y‑Môis ngă ênŭm jih tui si klei Khua Yang mtă brei ngă.
Amâo mâo klei bi kngăr ôh tơdah Aê Diê ruah Y‑Yôsuê lŏ čuê Y‑Môis, kyuadah Y‑Yôsuê mă bruă leh mbĭt hŏng Y‑Môis suôr tliêr dơ̆ng mơ̆ng hlăk phung ƀuôn sang Israel kbiă mơ̆ng čar Êjip. Ñu mâo bruă jao jing khua gĭt gai phung kahan Israel bi blah dưi hŏng phung Amalek (Klei Kbiă 17:8-16). Jing sa čô hlăm phung pluh dua čô knuă, Y‑Yôsuê mbĭt hŏng Y‑Kalep yơh bi mđĭ ai phung ƀuôn sang mŭt mă čar (Klei Yap 14:6-9). Ñu bŏ hŏng Yang Mngăt Jăk (êlan 18; Klei Mtô Mñă Klei Bhiăn 34:9). Hlăm jih jang kdrêč bruă, ñu yơh jing pô čuê hrô kơ Y‑Môis djŏ jăk kluôm hĭn. Leh ênă kngan leh anăn jao kơ Y‑Yôsuê klei dưi mơ̆ng Aê Diê brei leh kơ ñu, đơ dŭm hruê kăm êdei tinăn, Y‑Môis dơ̆ng jao kơ Y‑Yôsuê ƀrư̆ ƀrư̆ lu hĭn êjai bruă klam čiăng kơ phung ƀuôn sang hriăm mpŭ leh anăn gưt asăp kơ ñu, hlăm bruă klam Aê Diê ruah leh ñu brei jing khua kiă kriê.
Čiăng mâo pô lŏ čuê ngă bruă kơ Khua Yang, Y‑Môis êlâo hĭn wah lač akâo kơ Khua Yang kyuadah ñu thâo săng pô djă bruă khua kiă kriê klei hdĭp mngăt, jing mnuih Khua Yang ruah amâo djŏ tui si ñu pô čiăng ruah ôh. Klei čhuai drei jing ruah mnuih tui si klei drei khăp čiăng, djŏ hŏng ai mĭn drei amâodah ruah mnuih thâo gưt ngă tui si klei drei pô čiăng. Leh kơnăn, Y‑Môis hmiêt mkăp jao klei dưi jing khua kiă kriê čiăng kơ Y‑Yôsuê čuê ngă bruă, ñu amâo djă pioh kơ ñu pô ôh klei dưi jing khua, ngă bi dleh kơ Y‑Yôsuê tơdah mă tŭ bruă Khua Yang jao. Hruê anei, sa hlăm lu mta bruă klam yuôm kơ phung khua kiă kriê phung đăo kơ Krist jing rơ̆ng kơ ênuk lŏ čuê klei mprăp ăt ngă bruă nanao (II Y‑Timôthê 2:2). Phung Sang Aê Diê hlăm ƀuôn sang brei wah lač hŏng jih ai tiê, mâo hdră bruă bi hriăm mjuăt phung khua kiă kriê mrâo leh anăn hmiêt mkăp jao klei dưi jing khua kiă kriê kơ ênuk lŏ čuê.
Si ngă Phung Sang Aê Diê hruê anei mâo klei mprăp kơ bruă jao klei dưi jing khua kiă kriê tui si klei Khua Yang čiăng mơ̆?
Wah lač: Ơ Khua Yang, akâo kơ Ih mñă kơ kâo pô wăt kơ jih jang phung khua kiă kriê hlăm Phung Sang Aê Diê, hdơr wah lač kơ bruă duah mnuih lŏ čuê ngă bruă leh anăn hmiêt mkăp jao klei dưi jing khua kiă kriê kơ pô lŏ čuê tui si klei Khua Yang ruah. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Hêbrơ 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
