II Xwmtxheej 22:1-4
Nqe cim:
“Kuv nco ntsoov hais tias koj muab siab rau ntseeg ib yam li koj pog Lau-is thiab koj niam Enikes. Nimno kuv cia siab hais tias koj tseem muab siab rau ntseeg” (II Timautes 1:5).
Lus nug rau sawvdaws xav:
– Pog Athaliyas ua tsuas tej yam phem twg rau nws tus tub uas yog Vajntxwv Ahaxiyas?
– Leej niam ua neej muaj kev cuam tshuam rau tej menyuam licas?
– Koj tau qhuab ntuas licas hauv kev ua ib leej niam?
Thaum sib yuav, tus txivneej pheej nug hais tias: Tus no puas yog tus pojniam zoo rau kuv? Tiamsis kuj yuav tsum nug lwm lo lus tseemceeb hais tias: Tus no puas yog ib leej niam zoo rau kuv cov menyuam? Yog hais tias Vajntxwv Yehaulas kuj nug tej lo lus zoo li ntawd ces tej zaum tebchaws Yudas twb tsis poob mus rau ntu uas tsaus ntuj nti! Keebkwm sau tseg hais tias pog Athaliyas tsis yog ua yam phem tsuas rau nws tus txiv uas yog Vajntxwv Yehaulas xwb, nws tseem coj nws tus tub uas yog Vajntxwv Ahaxiyas mus rau txojkev phem kev qias uas yog “coj raws nraim li Vajntxwv Ahaj tsevneeg tus yamntxwv” (nqe 3), thaum kawg coj nws tus menyuam mus rau kev ploj kev tuag.
Nyob hauv lub cuabyig tej uas niam thiab txiv ua yuav kis ntau heev rau lawv tej menyuam tiamsis kev kis tsuas ntawm leej niam ces loj dua. Xws li Vajntxwv Amoos thiab Vajntxwv Ahas yog ob tug vajntxwv siab phem (II Vajntxwv 21:19-20; II Vajntxwv 16:2-4), tiamsis nkawd cov menyuam uas yog Vajntxwv Yauxiyas thiab Vajntxwv Hexekiyas ho yog cov vajntxwv uas hwm tus Tswv. Dua li ntawd leej niam siab phem zoo li Athaliyas ces yog tus ua rau Vajntxwv Ahaxiyas lub neej raug kev puastsuaj. Qhov vimchiv yog tej menyuam muaj lub siab xav nyob ze leej niam heev dua leej txiv, thiab leej niam yog tus ua qauv rau me nyuam xyaum. Leejtxiv coj lub tsevneeg, tiamsis leej niam muaj qabhau heev nyob hauv kev qhuab ntuas tej menyuam, xws li Mauxes niam thiab Timautes niam uas tau tseb ib txojkev ntseeg ruaj khov rau nkawd.
Niaj hnub nimno, neeg ntiajteb txhawb kom pojniam muaj vajhuam sib luag li txivneej, kuj tawm mus nrhiav nyiaj li txivneej. Cov menyuam tsimnyog tau leej niam cob qhia Vajtswv Txojlus thiab txhim kho lub neej ntseeg puag thaum tseem me los zoo li pog Yaukhenpes tau qhia Mauxes, tiamsis tiam nimno lawv ho coj tej me nyuam hnub nyoog 1, 2 xyoo mus rau hauv tsev zov me nyuam thiab tau cob qhia tej yam uas tsis yog Vajluskub qhia. Yuav tsum nco ntsoov hais tias nyiaj txiag peb nrhiav tau yooj yim tiamsis thaum peb cov menyuam lub neej sab ntsujplig puastsuaj lawm ces peb yuav tsis yooj yim kho tau.
Yog cov uas ua raws li Vajtswv Txojlus qhia, peb tsis txhob saib tsis taus lossis xaiv pojniam ntsej muag, tiamsis yuav tsum nco ntsoov hais tias txawm yog pojniam thiab txivneej los puavleej muaj nqis ib yam nkaus tabmeeg Vajtswv, tiamsis Vajtswv pub rau pojniam thiab txivneej nyias muaj nyias qabhau rau lub cuabyig. Thaum leej niam tseg ntau sijhawm rau menyuam, tej zaum yuav nrhiav tsis tau nyiaj ntau tiamsis ho tu thiab cob qhia tau tej menyuam lub neej sab ntsujplig. Yog li ntawd, cov uas yog niam yuav tsum tseg sijhawm los txhim kho tus kheej thiab tej menyuam lub neej sab ntsujplig.
Thov Vajtswv
Tus Tswv, thov pub koob hmoov rau cov ua niam nyob hauv Pawg Ntseeg kom txhua tus muaj tswvyim tu thiab cob qhia tej menyuam ua neej hwm tus Tswv thiab ua neej muaj nqis rau Koj. Amees.
Peb puas quavntsej cob qhia txog kev ntseeg rau peb tej menyuam?
Nyeem Vajluskub hauv peb lub xyoos: Lukas 18:1-34
Kênh Youtube BHKTHN:
