Klei Aê Diê Blŭ: Klei Mphŭn Dơ̆ng 12:10-20
Êlan kliăng:“Msĕ snăn mơh, brei phung êkei mâo mô̆ khăp kơ mô̆ diñu msĕ si kơ asei mlei diñu pô” (Êphêsô 5:28a)
Klei êmuh ksiêm mĭn: Ya boh klei jhat gŏ sang Y-Abram dôk tlă anăp? Ya boh ñu mă tŭ mơ̆ng hdră êlan ñu mgaih mkra klei dleh dlan? Ya ngă Y-Abram wơr bĭt hĕ klei Aê Diê ƀuăn pioh brei kơ ñu? Ya klei brei dua ung mô̆ ngă tơdah tlă anăp hŏng klei dleh dlan?
Čar Kanaan mâo klei ư̆ êpa prŏng truh kyuanăn Y-Abram čuăn trŭn nao dôk êjai ti čar Êjip čiăng tlaih mơ̆ng klei ư̆ êpa ƀiădah amâo êmuh ôh si klei Aê Diê čiăng. Tơdah dơ̆ng mŭt hlăm lăn čar mdrŏng sah anei, ñu lŏ tlă anăp hŏng sa mta klei huĭ hyưt prŏng hĭn mơh, kyua H’Sarai jing mniê siam snăk, năng ai hŏng klei anăn yơh ñu srăng djiê! Snăn Y-Abram mgaih mkra klei ñu huĭ hyưt, mtă kơ mô̆ ñu brei blŭ ƀhêč ƀhŭm hưn mă knŏng mkrah klei sĭt lač gơ̆ jing adei mniê ñu. Boh klei truh jing djŏ msĕ si ñu bi mĭn. Tơdah diñu mŭt truh hlăm čar Êjip, phung khua Pharaôn ƀuh ñu, digơ̆ bi mni klei siam H’Sarai ti anăp Pharaôn. Leh anăn arăng atăt ba ñu mŭt hlăm sang Pharaôn, ñu hưn ñu jing adei mniê Y-Abram, kyuanăn mtao ngă jăk kơ Y-Abram brei kơ ñu lu hlô mnơ̆ng rông leh anăn phung dĭng buăl êkei mniê.
Kyua huĭ đei kơ luč klei hdĭp ngă kơ Y-Abram wơr bĭt hĕ klei Aê Diê ƀuăn pioh brei kơ ñu (Klei Mphŭn Dơ̆ng 12:1-3). Hrô kơ klei ñu srăng jing “klei jăk jĭn” kơ lu mnuih, mmông anei ñu jing hĕ “klei jhat” kơ lu mnuih, kyua bruă ñu ngă soh wê, snăn klei jhat truh leh kơ sang Pharaôn. Klei Y-Abram mgaih mkra soh wê lŏ ba truh lu klei dleh dlan mkăn prŏng hĭn mơh. Năng ai ñu srăng luč mô̆, leh anăn tŭ klei sa čô mtao amâo mâo đăo ƀuah kyua klei blŭ luar, năng gơ̆ ñu yơh jing pô ngă klei bi hmô jăk kơ mtao. Mtao suôt jih jang sang ñu đuĕ mơ̆ng čar (êlan 18-20). Sa mta boh tŭ amâo mâo klei mơak điêt đuôt ôh kơ sa čô mnuih Aê Diê ruah, đăo knang kơ Aê Diê nanao yơh, ƀiădah knŏng kyua klei huĭ mgaih mkra hĕ klei dleh dlan hlăm gŏ sang tui si klei mĭn ñu pô.
Hlăm klei phung đăo kơ Krist jing ung mô̆, Klei Aê Diê Blŭ mtô phung ung jing khua kơ gŏ sang kyuanăn brei tui duah klei Khua Yang čiăng, čiăng mâo klei čuăn ngă thâo mĭn răng mgang kơ mô̆ anak. Klei yăl dliê anei brei ƀuh, kyua mâo hĕ ƀiă klei huĭ snăn Y-Abram tĭng yap tui si klei mĭn ñu pô yơh, amâo êmuh ôh si êlan Aê Diê čiăng kyuanăn atăt kơ klei čuăn ngă soh wê. Huĭ luč klei hdĭp ñu pô ƀiădah amâo uêñ ôh luč mỗ. Ñu dlăng kơ mô̆ ñu msĕ si mnơ̆ng hrô mgơ̆ng pioh kơ ñu dưi dôk hdĭp. Khua ƀĭng kna Y-Pôl mtô “brei phung êkei mâo mô̆ khăp kơ mô̆ diñu msĕ si kơ asei mlei diñu pô” (Êphêsô 5:28a), ƀiădah Y-Abram lĕ khăp kơ asei mlei ñu pô hĭn khăp kơ mô̆!
Êjai tlă anăp hŏng klei dleh dlan, tơdah knŏng uêñ mĭn răng mgang kơ asei mlei pô ƀiădah thiê myơr mô̆, ung amâodah anak pô snăn klei dleh dlan srăng lŏ mđua ti dlông klei dleh dlan hĭn mơh. Klei mgaih mkra jăk hĭn brei jih dua ung mô̆ sa ai tui duah klei Aê Diê čiăng leh anăn ngă hlue si klei Yang Mngăt Jăk ktrâo atăt, čiăng mâo klei čuăn ngă thâo mĭn, djŏ hdră dưi răng mgang gŏ sang pô tui si Klei Aê Diê Blŭ mtô. Pô mkŏ mjing klei jing ung mô̆ leh anăn kiă kriê klei hdĭp drei mâo nanao hdră êlan mkra msir jăk hĭn kơ gŏ sang drei.
Si ngă tơdah tlă anăp hŏng klei huĭ, drei srăng ngă msĕ si Y-Abram amâodah mdê hĭn?
Wah lač: Ơ Khua Yang, pap brei kơ kâo đa lu blư̆ kyua klei huĭ đei, kâo bi luč hĕ klei knang kơ Khua Yang. Akâo Khua Yang brei kâo tui duah klei Ih čiăng hlăm jih jang klei kâo čuăn ngă leh anăn khut khat đăo knang nanao kơ klei sĭt suôr leh anăn klei Ih răng mgang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 4-6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
