Yakơ 3:13-18
“Na gah tơdrong hơgei, bơngai bu hơgei đơ̆ng ‘Bok Kei-Dei ăn, bơngai noh bơ̆n ‘bôh sư pơm tôm tơdrong ‘lơ̆ng, sư bơngai dim gơh găt hăm đe, băt chu yom kơ lu bơngai tih kơ sư, băt mơnat kơ đe, băt asong băl tơmam; sư bơngai tơpăt tơpă, ưh kơ sĭ sư chă pơm đĕch ôh.” (Yakơ 3:17)
Nơ̆r jet tơchĕng pơwao:
– Hơgei đơ̆ng ‘Bok Kei-Dei ‘noh kiơ păng phara kơ tơdrong hơgei tơ ala teh thoi yơ?
– Tơdrong hơgei đei ‘bơm truh tơdrong arih lu bơ̆n thoi yơ?
– Pơm thoi yơ gơh chă tơdrong hơgei đơ̆ng ‘Bok Kei-Dei?
Đơ̆ng chă adrol sơ̆ truh tơ chăl bơ̆n dang ei, kon bơngai bơ̆n oei nŏng kơ chă tơdrong hơgei. Lơ bơngai hơwơ̆l tơdrong hơgei hăm tơdrong hlôh.
Tơdrong hơgei ưh kơsĭ dơ̆ng ‘bơ̆t tơdrong hlôh đĕch ôh, mălei gah tơdrong tơchĕng, tơ’bôh hăm jơhngơ̆m păng tơlĕch trong rơih iŏk. Bơ̆n jing kon pơlei Kră Yang bơih, lu bơ̆n athei arih mă hơgei đơ̆ng ‘Bok Kei-Dei ăn noh, wă khan tơdrong hơgei noh đơ̆ng ‘Bok Kei-Dei, pơma pơdah lăm Kră Yang păng pơm tơdrong Kră Yang lăp đon.
Lăm nơ̆r ‘Bok Kei-Dei ‘nâu, Yakơ ‘bôh rơđah dêh gah tơdrong hơgei đơ̆ng ‘Bok Kei-Dei păng hơgei kiơ̆ tơdrong ala teh. Tu tơm sư tơdrong hơgei đơ̆ng ‘Bok Kei-Dei ăn, kơlih kơ thoi noh “bơngai ‘noh bơ̆n ‘bôh sư pơm tôm tơdrong ‘lơ̆ng, sư bơngai dim gơh găt hăm đe, băt chu yom kơ bơngai tih kơ sư, băt mơnat kơ đe, băt asong băl tơmam, sư bơngai tơpăt tơpă, ưh kơsĭ chă pơm đĕch ôh (trong 17). Tu tơm tơdrong hơgei tơ ala teh âu, sư hơgei đơ̆ng khul yang kơnê̆, sư hơgei kiơ̆ tơdrong ala teh, kiơ̆ kơ sĕch akar (trong 15). Sư oei đei ‘nhĕng đe, oei ‘maih tơgar băl (trong 14). Tơdrong hơgei đơ̆ng ‘Bok Kei-Dei ăn păng yak kiơ̆ Kră Yang lăp đon, na lăm noh tơdrong hơgei tơ ala teh tơchĕng kiơ̆ kơdih đĕch, wă chă lơi kơdih akâu đĕch.
Lăng lăm chăl arih kơdih akâu bơ̆n păng lu bơngai jum dăr lăm hnam dơnŏ khul bơngai lui, tơ hnam trưng, anih bơ̆jang, lu bơ̆n ‘bôh rơđah hơđăl dêh gah ‘bar tơdrong hơgei ‘nâu. Kơplah bơ̆n arih đei tơdrong hơgei đơ̆ng ‘Bok Kei-Dei ăn lei bơ̆n athei hŭt lê̆ tơdrong pơang bơ̆n na tơchĕng kơ Kră Yang đĕch, bơ̆n ‘bôh mơn anih gah bơhngol păng băt pơhiôk đe. Tơplơ̆ dơ̆ng, dah bơ̆n nŏng kơ tơchĕng chă lơi bơ̆n kơdih, ‘nhĕng băl, tơgar băl, anih noh đe pơjah pơjăng băl dêh păng pơm tôm tơdrong kơnê̆ (trong 16).
Kon pơlei Kră Yang athei đĭ jơhngơ̆m chă, păng kiơ̆ tơdrong hơgei đơ̆ng ‘Bok Kei-Dei, nơ̆r ‘Bok Kei-Dei bơtho: “Tơ̆ng đei lăm lu iĕm bơngai bu ưh tam gah hlôh tơdrong ‘Bok Kei-Dei, bơngai noh athei ‘Bok Kei-Dei ăn kơ sư hlôh. Na ‘Bok Kei-Dei gô ăn kơ sư hlôh tơpă,” (Yakơ 1:5). Yua kơ tơdrong hơgei đơ̆ng ‘Bok Kei-Dei ăn, thoi noh trong wă sơng iŏk noh đơ̆ng tơdrong tơ’bưh hăm Kră Yang. Rai jê̆ Kră Yang đơ̆ng tơdrong krao khan, đŏk, pơhrăm nơ̆r ‘Bok Kei-Dei, pơm hloi pơtơ̆p pơjuăt gah bơhngol, lu bơ̆n gô ‘bôh tơdrong hơgei đơ̆ng ‘Bok Kei-Dei tuh ăn lăm chăl arih bơ̆n. Rim ‘nu kơ bơ̆n athei yua nơ̆r Kră Yang pơchrang lăng lăng tơdrong arih sa bơ̆n păng tơdrong pơma dơnuh sa hăm bơngai nai tơ’bôh tơdrong hơgei đơ̆ng ‘Bok Kei-Dei ăn dah tơdrong hơgei đơ̆ng kon bơngai ala teh âu? Athei bơnê kơ Kră Yang na arih tơpăt dih băl, ‘nĕ arih chă pơm đĕch wă kơ tơdrong hơgei đơ̆ng ‘Bok Kei-Dei ăn rim ‘nu kơ bơ̆n.
Ơ Kră Yang, inh kơkuh ‘bơ̆t anăp Ih, apinh tơdrong hơgei đơ̆ng Ih mă Ih đei pơkă wă ăn kơ bơngai bu mă đĭ jơhngơ̆m chơ chă. Apinh Ih tuh tơdrong hơgei Ih ăn kơ lăm đon tơchĕng păng jơhngơ̆m, wă kơ inh arih tơ’bôh tơdrong ‘lơ̆ng rŏ Ih păng arih pơhiôk dih băl, ‘mêm dih băl, krao khan yua anăn Kră Yang Yêsu Krist, Amen.
Lu bơ̆n hăm đĭ jơhngơ̆m yak kiơ̆ tơdrong hơgei đơ̆ng Kră Yang ăn ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 19
Kênh Youtube BHKTHN:
