Klei Aê Diê Blŭ: Klei Bi Hriêng 11:14, I Bruă Mtao 12: 12-19.
Êlan kliăng: “Tơdah amâo mâo klei atăt gai ôh phung ƀuôn sang srăng lĕ, ƀiădah mâo klei hơĭt tơdah mâo lu mnuih đru kčĕ” (Klei Bi Hriêng 11:14)
Klei êmuh ksiêm mĭn: Si ngă klei đru kčĕ Mtao Y-Salômôn bi hriăm phung khua gĭt gai brei mâo? Mtao Y-Jêrôbôam hmư̆ klei kčĕ mơ̆ng hlei pô leh anăn ya klei jhat mâo? Mơ̆ng ya tur knơ̆ng čiăng duah pô đru kčĕ amâo dah đru kčĕ kơ pô mkăn?
Mtao Y-Salômôn bi hriăm anak brei mđing duah phung đru kčĕ leh anăn hluê ngă tui si klei đru kčĕ thâo mĭn čiăng dưi mâo klei tŭ jing. Boh blŭ “phung knhâo” amâo dah “pô đru kčĕ” hlăm boh blŭ phŭn jing “bi mklă”, “čih mkra hdră kčah” amâo dah “kčĕ”. Sa djuê ana srăng dlưh rai tơdah amâo mâo khua gĭt gai jăk, mnuih ƀuôn sang hdĭp êđăp ênang tơdah mâo phung đru kčĕ thâo mĭn. Sa knơ̆ng bruă čiăng mnia blei tŭ jing brei mâo klei đru mguôp mơ̆ng êpul hgŭm kriê dlăng. Sa čô mtao čiăng ba klei mdrŏng sah mnuih ƀuôn sang, ala čar ăt brei mâo phung đru kčĕ knhâo knhăk hlăm djăp mta bruă čiăng kčĕ. Sa čô khua gĭt gai mbruă jing mnuih thâo klă klei djŏ, klei soh leh anăn hluê ngă tui si klei kčĕ knhâo knhăk, djŏ klă.
Mtao Y-Jêrôbôam amâo tŭ jing kyua gĭt gai kƀah klei thâo mĭn leh ruah soh klei đru kčĕ (dlăng hlăm I Bruă Mtao 12:1-29). Hlăk mrâo đĭ ngă mtao, mnuih ƀuôn sang Israel akâo kơ mtao bi hrŏ klei ktrŏ. Mtao bi trông leh anăn mâo phung khua mduôn lač kơ mtao brei ngă jăk kơ mnuih ƀuôn sang, ngă bruă kơ digơ̆, snăn digơ̆ srăng jing phung mă bruă kơ mtao lă lar. Ƀiădah phung đru kčĕ mda asei snăn ktrâo lač kơ mrâo mđĭ thiăm klei ktrŏ, ngă măk ƀai čiăng kơ mnuih ƀuôn sang huĭ leh anăn mpŭ. Mtao Y-Jêrôbôam ruah klei kčĕ ba yua klei dưi čiăng gĭt gai hrô kơ bruă yua klei khăp čiăng kơ mnuih ƀuôn sang huĭ mpŭ. Klei jhat jing ala čar bi mbha êpul, mnuih ƀuôn sang Israel bi kdơ̆ng hŏng mtao Y-Jêrôbôam, hlăm sang mtao Y-Đawit, knŏng dôk dua êpul Yuđa leh anăn Benyamin tui hluê mtao.
Grăp čô phung đaŏ jing asei mlei hlăm asei mlei myang mơ̆ng Yang Krist (I Kôrantô 12), drei jing mbĭt leh anăn čiăng thâo bi đru. Êngao kơ wah lač akâo klei ktrâo lač mơ̆ng Yang Mngăt Jăk, ăt brei drei mđing hmư̆ klei đru kčĕ mơ̆ng phung khua gĭt gai hlăm mngăt, phung anak Aê Diê mâo klei Aê Diê brei leh anăn klei knhâo knhăk mơ̆ng Khua Yang čiăng kơ drei mâo klei blŭ mguôp jăk. Tơdah duah klei ktrâo lač, brei drei kpă ênô leh anăn mđing hmư̆ klei blŭ kpă ênuah hlăm klei khăp. Klei yuôm bhăn hĭn jing duah pô đru kčĕ amâo dah kčĕ kơ pô mkăn, drei dlăng mơ̆ng tur knơ̆ng Klei Aê Diê Blŭ, amâo djŏ duah mơ̆ng klei thâo mơ̆ng anak mnuih ôh amâodah knŏng čiăng bi mơak, tui si klei pô čiăng. Brei drei răng wah lač, akâo klei ktrâo lač mơ̆ng Yang Mngăt Jăk hlăm klei bi mklă yuôm bhăn.
Ya tur knơ̆ng čiăng drei bi mklă tui hluê amâo dah amâo hmư̆ tui si klei đru kčĕ?
Ơ Khua Yang, kâo bi mni lač jăk kơ Ih kyua Ih yua phung đru kčĕ thâo mĭn čiăng đru kâo hdĭp tui si klei Khua Yang čiăng. Akâo kơ Ih đru kâo brei thâo gĭr, mđing hmư̆ leh anăn jhŏng bi mlih klei hdĭp pô čiăng tŭ dưn kơ Khua Yang. Akâo kơ Ih ăt brei kơ kâo klei thâo mĭn leh anăn klei khăp čiăng đru kơ ayŏng amai adei pô.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 8
Kênh Youtube BHKTHN:
