Yelemis 43:1-13
Nqe cim:
“Ces Yauhanas thiab cov thawj tubrog thiaj coj cov pejxeem uas nyob hauv lub tebchaws Yudas thiab cov neeg uas raug ntiab tawm mus nyob lwm tebchaws rov qab los ntawd huv tibsi mus rau nram tebchaws Iziv lawm… Lawv tsis mloog tus TSWV tej lus samhwm, lawv mus nyob rau nram tebchaws Iziv thiab mus nyob rau hauv lub nroog Tapahes” (Yelemis 43:5, 7).
Lus nug rau sawvdaws xav:
– Yauhanas ua licas tomqab uas hnov tus cevlus Yelemis tej lus?
– Tus Tswv hais kom tus cevlus Yelemis ua dabtsi los piv txog nuj nqis ntawm qhov uas tsis mloog tus Tswv lus?
– Peb yuav raug dabtsi thaum hla dhau tus ciam tsis mloog Vajtswv lus?
Tomqab uas tus cevlus Yelemis piav rau sawvdaws txog tej lus tus Tswv txwv tsis pub mus rau nram tebchaws Iziv, Yauhanas, Axaliyas, “thiab cov neeg khavtheeb” txawm hais tias yog Yelemis mus mloog Npalus rau tswvyim hais dag lawv, xav kom lawv poob rau cov Npanpiloos txhais tes (nqe 2-3). Vim li ntawd, Yauhanas thiab nws pab neeg thiaj txiav txim siab hla ciam tebchaws, “lawv tsis mloog tus TSWV tej lus samhwm, lawv mus nyob rau nram tebchaws Iziv thiab mus nyob rau hauv lub nroog Tapahes” (nqe 7). Lawv hnov qab qhov uas tus Tswv cawm lawv dim nram tebchaws Iziv los, nimno lawv tseem xav rov qab mus ua qhev nrad dua!
Thaum nyob ntawm Tapahes, tus Tswv hais kom tus cevlus Yelemis “muab ib cov pobzeb loj los faus rau hauv plawv txojkev uas pua roj hmab uas mus rau ntawm Vajntxwv Falaus lub loog” tomqab ntawd nws qhia rau cov neeg Yudas hais tias Vajtswv yuav txib Nws “tus tubtxib uas yog Vajntxwv Nenpukajnexales” tuaj tua tebchaws Iziv “thiab nws yuav teeb nws lub zwmtxwv thiab tsa nws lub tsevntaub rau saum cov pobzeb” no (nqe 9-10) kom ua tiav raws li tej lus uas tus Tswv twb cogtseg lawm, txawm yog lawv khiav tuaj nkaum nram tebchaws Iziv, los yeej khiav tsis dim tus vajntxwv uas kav cov Npanpiloos txhais tes, lawv yuav raug tua tuag, raug ntes mus ua cev qhev. Zaj no tshwmsim xyoo 568 – 567 TY. Peb saib mus rau qhov uas tus Tswv hu vajntxwv Nenpukajnexales ua “kuv tus tubtxib” qhia pom hais tias “tus Tswv tus tubtxib” tsis yog lub npe uas siv rau ib cov neeg tshwjxeeb xwb, tiamsis yog hais tagnrho cov neeg uas tus Tswv xav siv los ua tiav Nws lub homphiaj, txawm tus ntawd yuav yog Mauxes (Teev Npe 12:7) lossis lwm haivneeg tus vajntxwv.
Ua ntej khiav mus rau nram Iziv tebchaws, Yauhanas thiab nws pab neeg los so ntawm Khihas thov tus cevlus Yelemis taij thov tus Tswv taw qhia. Tiamsis thaum paub tus Tswv lub siab nyiam tsis zoo li lawv lub siab nyiam, ces cov thawjcoj txawm txiav txim siab hla ciam teb mus rau tebchaws Iziv. Lawv hla tus ciam ntawm kev mloog Vajtswv lus mus ua raws tus kheej siab nyiam, rhais ruam taug txojkev tawmtsam tus Tswv, yog txojkev rov mus ua qhev thiab thaum kawg yuav raug kev ploj kev tuag.
Kuj zoo ib yam li tus Tswv haivneeg, peb txhua tus puavleej tau cawmdim ntawm txojkev ua Ntxwgnyoog qhev los ua tus Tswv cov tubtxib. Tiamsis muaj ntau zaug peb hla dhau tus ciam mus ua raws li peb “lub siab xav thiab ntshaw” (Tej Lus Qhia 11:9). Thaum peb tsis zeem paub tus Tswv txojkev yog txoj zoo thiab hla dhau tus ciam tsis mloog tus Tswv lus, ces peb yeej yuav ntsib teebmeem, ntxhov siab. Timthawj Paulus qhia hais tias: “Nimno peb muaj kev ywjpheej, rau qhov Yexus Khetos twb tso peb cov uas ua qhev dim lawm. Yog li ntawd, nej yuav tsum muab siab rau ntseeg tsis txhob pub leejtwg coj nej rov qab mus ua qhev dua” (Kalatias 5:1).
Thov Vajtswv,
Tus Tswv, nyuam yaus ua Koj tsaug vim Koj txojkev hlub loj kawg nkaus pub rau Koj haivneeg thiab nyuam yaus tus kheej. Thov pab nyuam yaus zeem paub tus ciam Koj muab teeb ibncig kom nyuam yaus tsis hla dhau, tsis rov qab mus ua qhev. Amees.
Peb muaj kev txiavtxim siab licas tomqab uas kawm dhau zaj no?
Nyeem Vajluskub hauv peb lub xyoos: Mathais 24:1-35
Kênh Youtube BHKTHN:
