Klei Aê Diê Blŭ: Klei Bi Hriêng 19: 13-15
Êlan kliăng: “Sa čô anak êkei mluk jing klei bi rai kơ ama ñu, leh anăn klei mô̆ bi mneh msao jing msĕ si êa hjan rôč nanao” (Klei Bi Hriêng 19:13)
Klei êmuh ksiêm mĭn: Si Mtao Salômôn bi hriăm kơ sa čô anak êkei mluk, si ngă jing mô mâo klei thâo săng? Ya klei brei drei bi mlih čiăng mâo sa gŏ sang jăk mơak leh anăn bi guh kơang anăn Aê Diê?
Gŏ sang dưi mâo klei mdrŏng sah leh anăn jăk mơak mơ̆ amâodah hơăi, sa kdrêč ăt jưh kơ mô̆ leh anăn anak mơh. Hlăm dŭm êlan 13-15, Mtao Salômôn yua dua rup čiăng bi hriăm anak hdĭp thâo mĭn hlăm gŏ sang. Tal sa, ñu lač kơ klei truh mơ̆ng sa čô ama sĭt anak êkei mluk. Pưk sang leh anăn ngăn drăp jing mnơ̆ng dhơ̆ng aê ama suăi ai tiê mkŏ mjing, ƀiădah tơdah lĕ hlăm kngan phung anak mluk snăn srăng luč rai jih. Sa čô anak snăn “bi ênguôt ama ñu, leh anăn brei klei phĭ kơ mniê kkiêng kơ ñu leh” (Klei Bi Hriêng 17:25). Hlăm êlan 15, pô čih hră lač kơ rup sa čô anak êkei mluk, hrô kơ brei thâo mkăm pioh hlăm yan bhang, ñu lŏ pĭt hlăm yan puôt (Klei Bi Hriêng 10:5). Klei alah klư̆ anak êkei mluk hlăm klei đih pĭt tơl kơ ñu amâo lŏ thâo săng ôh boh klei kjham pô leh anăn amâo dưi čŏng rŭ pô ôh. Tal dua, mtao lač kơ mô̆. Tơdah anak dôk djŏ hĕ sa čô mô̆ mluk snăn hrô kơ huĭ mpŭ, ñu srăng bi tăng mgăl amâo mdei. Klei bi tăng mgăl anei dưi lač msĕ si ênai êa rôč nanao êjai hjan (Klei Bi Hriêng 27:15). Tơdah sa mô̆ blŭ duñ duñ nanao kơ ung ñu, amâo thâo gĭr ư̆ ăn ôh snăn ênưih đĭ ai snăk êngao kơ đuĕ mơ̆ng sang. Bi sa čô mô̆ thâo săng srăng thâo huĭ mpŭ kơ Aê Diê, kriê dlăng djăp mta bruă hlăm gŏ sang, leh anăn mpŭ kơ ung pô. Sa čô êkei mâo mô̆ thâo săng srăng mpŭ kơ gơ̆ leh anăn bi mni kơ Aê Diê kyua thâo “mô̆ mâo klei thâo săng jing mnơ̆ng Yêhôwa brei” (êlan 14).
Klei Aê Diê Blŭ brei ƀuh gŏ sang amâo dưi mđao ôh tơdah hjan rôč nanao, gŏ sang amâo dưi êđăp ênang, jăk mơak ôh tơdah ung mô̆ bi mneh msao nanao. Klei thâo mĭn mơ̆ng sa čô mô̆ brei dưi bi êdah hlăm klei thâo mbruă leh anăn mâo klei thâo gĭr. Sa čô mô̆ thâo mĭn thâo kriê dlăng bruă knuă êjai, kriê dlăng anak čô êjai, leh anăn ăt thâo gĭr čiăng kơ gŏ sang jăk mơak, trei mđao nanao. Anak thâo săng brei thâo huĭ mpŭ kơ Aê Diê, gưt asăp amĭ ama, kriăng hriăm hră mơar, mă bruă knuă, leh anăn mâo bruă klam hŏng gŏ sang. Sa čô ung thâo săng brei thâo khăp, mpŭ kơ mô̆ anak kyua mô̆ thâo săng jing mơ̆ng Aê Diê brei. Tơdah jih gŏ sang thâo bi mpŭ leh anăn mđĭ kyar klei đăo, klei hing ang yuôm bhăn mơ̆ng aê ama, hŏng ngăn drăp snăn srăng hdĭp nanao hlăm klei jăk mơak Aê Diê brei.
Drei jing sa čô ung, sa čô mô̆, sa čô anak thâo săng hlăm gŏ sang mơ̆?
Ơ Khua Yang, kâo bi mni lač jăk kơ Ih brei leh kơ kâo dưi mâo ama, mâo amĭ bi hriăm nanao kâo hdĭp thâo mĭn hlue si klei Khua Yang ktrâo lač. Akâo kơ Khua Yang đru kâo jing sa čô ung, sa čô mô̆, sa čô anak thâo săng, ba klei jăk mơak, ktưn hưn kơ gŏ sang leh anăn bi guh kơang Anăn Khua Yang ti krah anak mnuih.
Dlăng Klei Aê Diê Blŭ hlăm tlâo thŭn: Y-Êsêkiêl 48
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
