Klei Aê Diê Blŭ: Klei Bi Hriêng 17: 1-6.
Êlan kliăng: “Phung čô čĕ jing đuôn mtao kơ phung mduôn, leh anăn amĭ ama jing klei guh kơang kơ phung anak diñu.” (Klei Bi Hriêng 17: 6)
Klei êmuh ksiêm mĭn: Si ngă mtao Salômôn bi hriăm anak hdĭp hlăm gŏ sang ? Ya klei đru drei hlăm knuih hdĭp gŏ sang mơ̆ng klei drei thâo săng jing phung anak mâo sa ama hlăm adiê ? Si brei drei hdĭp čiăng ba klei ktưn hưn kơ gŏ sang leh anăn bi guh kơang Anăn Aê Diê ?
Hŏng klei thâo mĭn Aê Diê brei, Mtao Salômôn mtô anak ñu hŏng hdră kluôm ênŭm. Êngao kơ knhuah hdĭp, mtao lŏ mtô anak ñu kơ knuih hdĭp brei mâo hlăm gŏ sang. Hlăm trăn Klei Aê Diê Blŭ hruê anei, Mtao Salômôn bi hriăm anak ñu hdĭp thâo mĭn hlăm gŏ sang bi êdah hlăm lu mta bruă. Tal sa, brei anak mđing kơ klei thâo bi djŏ hlăm gŏ sang (êlan 1). Wăt tơdah hdĭp ƀun ƀin ƀiădah jăk mơak ăt yuôm bhăn hĭn kơ bŏ mnơ̆ng ƀơ̆ng huă ƀiădah bi mneh msao. Gŏ sang răng kriê klei êđăp ênang yuôm bhăn hĭn kơ mâo lu ngăn drăp ƀiădah hdơ̆ng bi êmut. Tal dua, brei anak mđing kơ hdră hdĭp thâo mĭn (êlan 2). Hlăm djăp klei mâo brei jih ai tiê mă bruă, kriê dlăng klei thâo mĭn djăp bruă. Wăt tơdah phung jing hlŭn ƀiădah hdĭp thâo mĭn ăt srăng dưi jao kriê dlăng phung anak čô khua. Hĭn mơh, lŏ dưi dưn ngăn drăp hŏng phung ayŏng adei hlăm sang. Tal tlâo, brei anak mđing hlăm knuih hdĭp doh jăk, kpă ênô (êlan 4). Kƀông blŭ klei ƀai, êlah pia klei jhat brei lăm lui hĕ. Tal pă, brei anak mđing kơ klei hdĭp thâo bi khăp (êlan 5). Aê Diê srăng bi kmhal phung mưč mač kơ mnuih ƀun, ƀuh ayŏng adei pô tuôm hŏng klei truh amâo đru ôh ƀiădah lŏ mơak jing ngă soh. Knhal tuč, wăt tơdah aduôn aê, amĭ ama amâodah anak čô, brei thâo klei tŭ jing amâodah hơaĭ phung anak srăng hmaĭ kơ klei hing ang, bi mni, klei hêñ phung hlăm gŏ sang, kyua anăn brei thâo răng hlăm klei blŭ, bruă mă leh anăn knuih hdĭp.
Aê Diê mdưm čiăng grăp čô phung ƀuôn sang Aê Diê hlăm gŏ sang čiăng “lông dlăng aê tiê mnuih” (êlan 3), Ñu yua klei hdĭp, wăt klei truh čiăng lông dlăng leh anăn bi hriăm knuih hdĭp drei hlăm gŏ sang. Wăt tơdah ti anôk drei dôk amâodah mâo bruă klam yuôm bhăn hlăm gŏ sang, ăt brei hdơr ti anăp Aê Diê jih jang drei jing anak mơ̆ng Ama hlăm adiê. Ama hlăm adiê amâo kah mbha hlei pô ôh, grăp čô srăng mâo klei pah mni hlue si bruă jăk pô ngă leh (Êphêsô 6).
Khua ƀĭng kna Y-Pôl mtă kơ grăp čô drei brei sa ai tiê, thâo bi khăp, sa klei mĭn, hdĭp luă gŭ, mpŭ kơ pô mkăn hĭn kơ pô, leh anăn duh klei tŭ dưn kơ pô mkăn mơh. Brei hdĭp hlue si Klei Aê Diê Blŭ mtô leh anăn mâo sa ai tiê msĕ si Krist mâo leh (Phiip 2 : 1-5). Akâo kơ Yang Mngăt Jăk đru grăp čô drei hdĭp bi êdah knuih jăk siam Aê Diê hlăm gŏ sang čiăng amâo djŏ knŏng ba klei jăk mơak kơ anak čô, bi mơak kơ aduôn aê, amĭ ama ôh, ƀiădah lŏ bi guh kơang Anăn Aê Diê hlăm adiê.
Klei hdĭp drei bi mơak kơ găp djuê leh anăn bi guh kơang Anăn Aê Diê leh mơ̆ ka ?
Wah lač: Ơ Khua Yang, kâo bi mni lač jăk kơ Ih kyua Ih khăp leh kơ kâo. Akâo kơ Ih đru kâo hdĭp thâo bi djŏ, thâo mĭn, kpă ênô leh anăn thâo bi khăp hlăm gŏ sang. Akâo kơ Khua Yang đru kâo mâo knuih hdĭp ba klei jăk mơak kơ găp djuê leh anăn bi guh kơang Anăn Aê Diê.
Dlăng Klei Aê Diê Blŭ hlăm tlâo thŭn: Klei Mmuñ Hđăp 125:1-5; 126:1-6; 127:1-5; 128:1-6; 129:1-8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
