Klei Aê Diê Blŭ: Klei Mtô Mñă Klei Bhiăn 25:13-16
Êlan kliăng: “Brei diih mâo boh ktrŏ djŏ leh anăn kpă, brei diih mâo msĕ mơh dŏ mkă djŏ leh anăn kpă, čiăng kơ hruê diih dôk hdĭp dưi jing sui hĭn hlăm ala čar Yêhôwa Aê Diê diih brei kơ diih” (Klei Mtô Mñă Klei Bhiăn 25:15)
Klei êmuh ksiêm mĭn: Ya klei Aê Diê ghă hlăm klei blei mnia? Ya klei Aê Diê ƀuăn kơ phung blei mnia hŏng klei ênuah? Klei bhiăn anei bi êdah si Pô Aê Diê jing? Si ih mă yua klei hriăm anei kơ ih pô?
Aê Diê jing Pô Kpă Ênô kyuanăn Ñu čiăng jih jang phung anak čô Ñu ngă klei sĭt, hdĭp hŏng klei kpă ênô sơăi. Kyuanăn yơh, Aê Diê bi êmut kheh kơ jih jang klei blei mnia hŏng klei amâo kpă. Ksiêm tui si klei bhiăn, trăn Klei Aê Diê Blŭ jing kdrêč pŏk bi ƀai kơ klei bhiăn tal sapăn hlăm Pluh Mta Klei Bhiăn. Klei bhiăn tal sapăn kăm phung ƀuôn sang Aê Diê amâo dưi tlĕ dŏ dô arăng ôh (Klei Mtô Mñă Klei Bhiăn 20:15). Klei phung blei mnia yua knăng mkă soh mplư phung blei leh anăn mă klei tŭ dưn kơ diñu pô jing klei tlĕ, klei ngă anăn yap soh hŏng Pluh Mta Klei Bhiăn. Anăn jing mnuih amâo ênuah, mnuih wê.
Hlăm prăk mâo klei mplư prŏng snăk, tơl mâo lu mnuih hlăm jih jang ênuk kyua khăp kơ prăk snăn amâo uêñ ôh ngă klei soh khă bi mâo prăk. Phung Israel kăn dôk ti êngao klei mplư anei rei. Kyuanăn yơh Aê Diê mtă kơ phung ƀuôn sang Ñu amâo dưi yua knăng mkă soh hlăm klei blei mnia ôh. Amâo djŏ Aê Diê knŏng čiăng phung ƀuôn sang Ñu hdĭp hŏng klei kpă, mkhư̆ klei tluh kơ prăk ôh, ƀiădah klei yuôm hĭn jing brei phung Israel hdơr kơ digơ̆ jing sa găp djuê mâo klei bi mguôp hŏng Aê Diê, anôk bi êdah klei khăp leh anăn klei doh jăk Aê Diê hlăm klei hdĭp digơ̆.
Sĭt nik klei luar leh anăn klei wê hlăm klei blei mnia amâo srăng dưi mkŏ mjing sa phung ƀuôn sang mâo klei ktang, doh jăk leh anăn dưi knang ôh. Kyuadah bruă ngă hŏng klei mplư anăn ngă kơ pô čhĭ duah nanao djăp êlan hrui mă klei tŭ dưn knŏng kơ ñu pô yơh, bi pô blei, srăng răng nanao, đing kơ pô čhĭ. Klei bi mguôp hdơ̆ng mnuih msĕ snăn hlăm phung ƀuôn sang Aê Diê knŏng bi čhŏ kơ Anăn Khua Yang đuč.
Hruê anei, klei luar hlăm klei blei mnia arăng ngă hŏng lu mnêč hgăm mdê mdê. Dưi lač, ti anôk mâo klei blei mnia, tinăn srăng mâo klei luar. Klei luar kbiă hriê mơ̆ng klei khăp kơ prăk, leh anăn ƀiă snăk mnuih dưi hŏng klei mplư ktang anei. Jing phung đăo kơ Krist, hlăm klei hdĭp drei ăt tuôm hŏng klei mplư msĕ snăn mơh. Dôk ti anăp klei prăk bi tluh, brei drei hdơr kơ Aê Diê jing Pô Kpă Ênô, Ñu bi êmut kheh kơ bruă ngă hŏng klei luar, leh anăn Aê Diê srăng brei klei jăk jĭn kơ hlei pô hdĭp hŏng klei kpă leh anăn ênuah ênô.
Drei tuôm mâo mơ̆ klei klei mplư hŏng prăk leh anăn klei tluh kơ prăk?
Wah lač: Ơ Khua Yang, jing Pô Kpă Ênô leh anăn khăp kơ hlei pô hdĭp hŏng klei kpă ênô. Đru kâo dưi hŏng klei mplư mơ̆ng klei tluh kơ prăk čiăng kơ kâo hdĭp hŏng klei kpă ti anăp Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 50
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
