Klei Aê Diê Blŭ: I Têsalônik 4:1-8
Êlan kliăng: “Kyuadah snei klei Aê Diê čiăng, klei diih jing doh jăk; đăm brei diih ngă klei knhông ôh; čiăng kơ grăp čô diih thâo kiă kriê asei mlei ñu pô hlăm klei doh jăk leh anăn hlăm klei mpŭ” (I Têsalônik 4:3-4)
Klei êmuh ksiêm mĭn: Khua ƀĭng kna Y-Pôl “kwưh leh anăn mtrŭt diih …ngă snăn kdlưn hĭn” ya čiăng lač? Ñu mtô kơ phung đăo Sang Aê Diê Têsalônik si ngă hdĭp čiăng bi mơak kơ Aê Diê? Si diih răng kriê klei hdĭp doh jăk hlue si klei Aê Diê čiăng?
Rŭng răng kơ phung đăo Sang Aê Diê Têsalônik knŏng mơak hŏng boh tŭ hlăm klei hdĭp mngăt digơ̆ snăn Khua ƀĭng kna Y-Pôl hur har leh anăn êdu êun mñă kơ diñu klei mtô bi hriăm digơ̆ hriăm leh mơ̆ng Khua Yang Yêsu mtô, ñu “kwưh leh anăn mtrŭt diih hlăm Khua Yang Yêsu, msĕ si diih hriăm leh mơ̆ng hmei si klei djŏ diih dôk hdĭp leh anăn bi mơak kơ Aê Diê, msĕ si diih dôk ngă, brei diih ngă snăn kdlưn hĭn” (êlan 1). Boh blŭ “snăn kdlưn hĭn” jing “ƀrư̆ hruê kdlưn lu hĭn, ƀrư̆ jăk hĭn”. Klei hdĭp mngăt phung đăo brei hriê kơ prŏng nanao amâo mdei tơl truh hruê bi tuôm hŏng Khua Yang.
Khua ƀĭng kna Y-Pôl brei thâo čiăng hdĭp bi mơak kơ Aê Diê, phung ƀuôn sang Aê Diê ti Sang Aê Diê Têsalônik brei djă pioh klei bhiăn Aê Diê čiăng mđing kơ knuih hdĭp doh jăk. Ti krah sa ala ƀuôn klei đăo mkăn hlăk ênuk anăn hŏng knuih hdĭp phưi tha, boh nik bi dôk êkei mniê mtŭk mtŭl hlăm sang yang kkuh kơ phung yang soh lŏ dưi dlăng jing klei kkuh mpŭ, snăn klei Aê Diê čiăng kơ phung đăo jing “…đăm brei diih ngă klei knhông ôh; 4čiăng kơ grăp čô diih thâo kiă kriê asei mlei ñu pô hlăm klei doh jăk leh anăn hlăm klei mpŭ, 5amâo djŏ ôh hŏng klei tluh msĕ si phung tue amâo thâo kral Aê Diê” (êlan 3-5). Khua ƀĭng kna Y-Pôl iêô mthưr ktang tĭt grăp čô phung đăo Têsalônik jing phung đăo kơ Khua Yang Yêsu brei hdĭp hlue si klei Aê Diê čiăng, amâo hlue si knuih hdĭp phung ti lăn ala anei ôh. Phung đăo brei răng kriê pô bi doh jăk leh anăn mpŭ, đăm hdĭp ôh hlue si kđeh, lĕ hlăm klei bi dôk êkei mniê mtŭk mtŭl, ƀiădah hdơr nanao drei dưi mâo Aê Diê iêô kơ klei doh jăk amâo djŏ kơ klei čhŏ mrŏ ôh. Ñu bi mklă, “Snăn hlei pô hngah klei mtă anei, ñu hngah amâo djŏ kơ mnuih ôh, ƀiădah kơ Aê Diê yơh, Pô brei leh kơ diih Yang Mngăt Jăk Ñu” (êlan 8). Klei hưn brei răng anei đru kơ phung đăo Sang Aê Diê Têsalônik brei thâo răng hlăm knuih hdĭp leh anăn gĭr hdĭp doh jăk hlue si klei Aê Diê čiăng.
Hruê anei, klei doh jăk hlăm klei hdĭp bi dôk êkei mniê amâo yap yuôm ôh, lu mnuih lŏ mtrŭt leh anăn tŭ ư kơ klei lông hdĭp mbĭt, bi dôk êkei mniê êlâo kơ klei bi kuôl ung mô̆, tlĕ piu, bi lui ung mô̆, dlăng kơ klei bi dôk ung mô̆ jing hơăi mang. Kyua anăn, čiăng snăk kơ drei ƀuh bruă klam brei hdĭp hlue si klei Aê Diê čiăng, răng kriê asei mlei drei pô doh jăk leh anăn năng mpŭ. Tơdah drei hngah kơ klei tui tiŏ klei hdĭp doh jăk jing drei hngah kơ Aê Diê yơh, Pô iêô leh drei kơ klei hdĭp doh jăk leh anăn bi luč hĕ ênoh yuôm klei jing phung đăo kơ Krist.
Drei mđing uêñ răng kriê klei hdĭp doh jăk leh anăn năng mpŭ mơ̆?
Wah lač: Ơ Aê Diê Doh Jăk! Ti krah lăn ala kƀah klei huĭ mpŭ kơ klei doh jăk hlăm klei bi dôk ung mô̆, akâo kơ Ih brei klei dưi čiăng kơ kâo djă pioh klei hdĭp doh jăk leh anăn năng mpŭ, amâo jao ôh pô hlăm klei bi dôk êkei mniê mtŭk mtŭl. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
