Klei Aê Diê Blŭ: Klei Bi Hriêng 20:29
Êlan kliăng: “Klei ktang phung êkei hlăk ai jing klei guh kơang diñu, ƀiădah ƀŭk kô̆ jing kdrăp kơ phung mduôn.” (Klei Bi Hriêng 20:29)
Klei êmuh ksiêm mĭn: Mtao Y‑Salômôn brei thâo ya jing klei kdlưn hĭn mơ̆ng phung hlăk ai? “Ƀŭk kô̆” ya čiăng lač? Ya klei sĭt nik êlan Klei Bi Hriêng anei brei thâo kơ klei bi mguôp mbĭt bi đru plah wah phung hlăk ai hŏng phung mduôn? Si ngă drei mă yua klei anei hlăm bruă yua jih jang klei brei mơ̆ng Aê Diê?
Yang ƀuôn drei dôk hdĭp hruê anei ƀrư̆ hruê ƀrư̆ mâo klei bi kah mbha ktang hlăm lu mta klei, boh nik nak klei bi kah plah wah wưng ênuk mdê mdê. Klei bi kah anei ƀiă lu ăt mŭt kma leh mơh hlăm klei Phung Sang Aê Diê bi kƀĭn. Hruê anei, phung hlăk ai ƀrư̆ hruê ƀrư̆ čiăng bi kah mdê hŏng “Phung Sang Aê Diê mnuih khua”, tơl truh lui klei bi kƀĭn mơh kyuadah diñu lač amâo mâo lŏ guôp ôh.
Ƀiădah lĕ Mtao Y‑Salômôn mtô snei, grăp ênuk thŭn mâo sa klei tŭ dưn, brei mâo klei bi đru leh anăn bi mpŭ hdơ̆ng phung hlăk ai hŏng phung khua mduôn. Phung “êkei hlăk ai” mâo “klei ktang” leh anăn klei kriăng kơêñ ênuk hlăk ai ƀiădah brei thâo ƀuh mơh klei dôk kƀah pô leh anăn tui duah klei thâo mĭn găn hŏng klei mđing hmư̆ leh anăn hriăm klei bi knal mơ̆ng phung khua mduôn. Kyuadah klei bi knal jing klei knŏng dưi hriăm găn sui thŭn mlan. Bi “phung mduôn” đăm ênguôt ôh kyua luč leh “klei ktang”. Tơdah mduôn leh, “ƀŭk kô̆” srăng hrô “klei ktang” – jing rup bi knal kơ klei thâo mĭn – tui si Klei Bi Hriêng amâo lŏ mâo ôh klei mkăn jing yuôm hĭn kơ klei thâo mĭn.
Sĭt nik brei drei săng kơ êlan Klei Bi Hriêng anei hŏng klei mblang kluôm. Boh nik gơ̆ amâo djŏ jih jang “phung êkei hlăk ai” mâo lu “klei ktang” leh anăn hdĭp hŏng klei mơai mâo klei tŭ dưn kơ Khua Yang sơăi ôh, leh anăn kăn djŏ lei hlei “mnuih mduôn” mâo “ƀŭk kô̆” jing mnuih mâo klei thâo mĭn sơăi. Msĕ si êkei êdam Y‑Yôhan lŏ bi anăn Y‑Markôs brei leh klei dleh dlan hlăm klei mă bruă kơ Khua Yang bi hmăi tơl ñu kdŭn wĭt mkrah wah êlan ktuê êlan nao hưn Klei Mrâo Mrang Jăk gưl tal sa (Bruă Phung Khua Ƀĭng Kna 13:13). Bi tlâo čô mah jiăng Y‑Yôp dê bi mni kơ diñu pô jing mnuih khua mduôn, čăt ƀŭk kô̆ (Y‑Yôp 15:10) ƀiădah diñu jing hĕ phung brei klei kčĕ amâo bi mơak kơ Aê Diê ôh.
Klei yuôm hĭn jing măng ai ya ênuk thŭn drei jing dưn mơh ăt brei drei hŏng jih ai tiê huĭ mpŭ kơ Aê Diê, tui duah Aê Diê, hur har hriăm Klei Ñu Blŭ leh anăn hdĭp hŏng klei luă gŭ (Y‑Yêrêmi 9:23-24). Kyuanăn, wăt tơdah dôk hlăk ai amâodah mduôn leh dưn, yua bĕ jih jang klei brei mơ̆ng Aê Diê pioh mă bruă mâo boh tŭ dưn leh anăn bi mơak kơ Ñu. Brei thâo bi mpŭ leh anăn bi đru hdơ̆ng găp čiăng bi leh jih klei Aê Diê brei leh kơ grăp čô. Ti djiêo anăn, brei grăp ênuk thŭn thâo ƀuh knhal pô, phung hlăk ai đăm hdĭp hŏng klei duah bi mĭn ƀuh hơăi mang ôh, phung khua mduôn kăn djă păn klei guh kơang êgao leh rei. Brei grăp čô yua bi jăk mông Khua Yang brei, yua bi jăk jih jang klei brei mơ̆ng Aê Diê čiăng đru bi mguôp bi lar ƀuôn ala mtao Aê Diê êjai dôk guôn hruê Yêsu Krist Khua Yang drei lŏ trŭn hriê.
Si ngă drei bi đru leh mơ̆ hdơ̆ng drei čiăng bi leh bruă răng čuăn Aê Diê jao?
Wah lač: Ơ Khua Yang, kâo lač jăk kơ Ih kyua jih jang hruê Ih brei kâo dôk hdĭp ti lăn ala anei. Brei kơ kâo klei thâo mĭn thâo yap jih jang hruê kâo dôk hdĭp čiăng kơ kâo hdĭp jăk leh anăn yua jih klei Ih brei leh kơ kâo pioh bi guh kơang kơ Ih leh anăn ba klei tŭ dưn kơ lu mnuih.
Dlăng Klei Aê Diê Blŭ hlăm tlâo thŭn: Y‑Sôphôni 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
