II Pajlug 20:29
29 Peb qhuas cov hluas lub zog
Thiab hwm cov laus uas plaubhau dawb paug.
Lus nug rau sawvdaws xav:
– Vajntxwv Xalumoos qhia paub yam zoo ntawm cov hluas yog dabtsi?
– “Plaubhau dawb paug” muaj lub ntsiab licas?
– Nqe Pajlug no qhia paub qhov tseeb twg txog kev sib txuas sib pab ntawm tej phaum neeg?
– Peb ua tej no licas hauv kev siv tej koob hmoov tus Tswv pub lawm?
Tiam neej peb nyob yim hnub yim raug cais mus rau ntau sab, tshwjxeeb yog kev cais ntawm tej phaum neeg. Qhov kev sib cais no ntau tsawg kuj nkag los rau hauv Pawg Ntseeg. Niaj hnub nimno, cov hluas nyob hauv Pawg Ntseeg yim hnub yim muaj kev xav cais tus kheej tawm hauv “Pawg Ntseeg cov laus”, lossis tsis mus pehawm vim hnov tsis phim lawm.
Tiamsis Vajntxwv Xalumoos qhia hais tias txhua ntu caijnyoog puavleej muaj nyias qhov tsimtxiaj, cov hluas thiab cov laus yuav tsum sib pab thiab sib hwm. “Cov hluas” muaj “lub zog” thiab lub siab kub ntawm lub neej hluas tiamsis yuav tsum xam pom tej yam tsis tau txaus ntawm tus kheej thiab nrhiav tswvyim dhau ntawm kev mloog thiab kawm tswvyim ntawm cov laus, vim lub tswvyim yuav tsum siv sijhawm ntau thiaj kawm tau. Tshuav “cov laus” kuj txhob nyuaj siab vim tsis muaj “lub zog”. Thaum caij laus los txog ces “lub zog” tau tej“plaubhau dawb paug” los hloov – plaub hau dawb yog lub cim ntawm lub tswvyim – nyob hauv Pajlug ces tsis muaj yam dabtsi muaj nqis dua lub tswvyim.
Tiamsis nqe Pajlug no yuav tsum totaub raws li lub ntsiab deb dav. Vim nyob hauv qee tug, ces tsis yog txhua tus “hluas” puavleej muaj txaus “lub zog” thiab ua tau lub neej muaj nqis rau tus Tswv, thiab tsis yog txhua tus “laus” uas muaj “plaubhau dawb paug” puav leej muaj tswvyim. Pivtxwv li tus tub hluas Yauhas Malakaus tau cia tej kev txomnyem cuamtshuam kev ua tus Tswv haujlwm, ua rau nws thim rov qab nyob hauv Timthawj Paulus ncua kev qhia Txojmoo Zoo zaum tim ib (Tes Haujlwm 13:13). Tshuav Yauj peb tug phoojywg khav txog qhov uas laus, muaj plaubhau dawb (Yauj 15:10) tiamsis lawv ho yog cov neeg uas hais tej lus txhawb zog tsis haum tus Tswv siab.
Qhov tseemceeb yog txawm yuav nyob ntu caijnyoog twg los yuav tsum paub hwm tus Tswv, nrhiav tus Tswv, kawm Vajtswv Txojlus, ua neej txo hwjchim (Yelemis 9:23-24). Yog li ntawd, txawm yog hluas thiab laus, los yuav tsum siv tej koob hmoov uas tus Tswv muab pub rau yus kom ua haujlwm tawg paj txi txiv thiab haum tus Tswv siab. Yuav tsum paub sib hwm thiab sib pab ua tiav tej uas tus Tswv muab pub rau txhua tus. Tsis tas li ntawd xwb, txhua ntu caijnyoog yuav tsum zeem paub tus kheej lub zog, cov hluas tsis txhob ua neej npau suav, thiab cov laus kuj tsis txhob tuav rawv tej koob npe dhau los. Txhua tus yuav tsum siv tej sijhawm thiab tej koob hmoov uas tus Tswv pub kom muaj nqis rau kev nthuav dav Vajtswv Lub Tebchaws los ntawm nplooj siab tos nrhw hnub Tswv Yexus rov qab los.
Thov Vajtswv,
Tus Tswv, nyuam yaus ua Koj tsaug vim lub sijhawm Koj pub nyuam yaus muaj hauv ntiajteb no. Thov Koj pub nyuam yaus muaj tswvyim suav caijnyoog kom ua tau lub neej muaj nqis, siv tej koob hmoov Koj pub los ua rau Koj tau koobmeej thiab muaj nqis rau lwm tus. Amees.
Peb puas sib pab ua tiav lub luag haujlwm tus Tswv muab pub lawm tau?
Nyeem Vajluskub hauv peb lub xyoo: Xefaniyas 2
Kênh Youtube BHKTHN:
