Markôs 2:1-12
“Sư mơnat ăn dôm tơdrong yoch đêl ih pơm, Pơklaih dôm tơdrong jĭ-jăn ih.” (Hơriso 103:3)
Nơ̆r jet tơchĕng pơwao:
– Yua kơ kiơ puăn ‘nu buăl sư tung bơngai hơwen hơwo tŏk tơ bơbŭng hnam, ‘bok bơbŭng hnam na tơ jur bơngai hơwen păng anhŭn ‘bơ̆t anăp Yêsu?
– Kră Yang Yêsu pơm kiơ kơ bơngai hơwen noh?
– Bơ̆n pơhrăm iŏk tơdrong kiơ đơ̆ng tơdrong Kră Yang pơklaih bơngai hơwen hơwo noh?
Tơdrong hơ’mon ‘nâu bơ̆n ‘bôh đei lơ bơngai năm tơ hnam mă Kră Yang Yêsu oei bơtho nơ̆r ‘Bok Kei-Dei. Lăm lu tơpôl âu kư̆m đei lu thây bơtho tơdrong juăt đe Juđê (trong 6). Đei lăm tơdrong roi hơ’mon ‘nâu mă kăl dêh noh jơ̆ puăn ‘nu bơngai tung ba minh ‘nu bơngai hơwen hơwo anhăk tơ Kră Yang. Lu sư kơtơ̆ng ang Kră Yang Yêsu bơih ‘Bok mă gơh pơklaih dôm tơdrong jĭ jăn na lu sư wă tơgŭm bơngai hơwen noh. Mălei, yua kơ đei lơ bơngai dêh lăm hnam ei, kiơ̆ ‘nguaih ‘măng hnam kư̆m ưh kơ đei anih rơwơn, tuch luch, lu sư tơchĕng pha ‘biơ̆ na lu sư bŏk bơbŭng hnam ei tơ jur bơngai hơwen păng anhŭn ‘bơ̆t anăp Yêsu, ‘Nâu bơih pơm tơ’bôh đei đon lui păng jơhngơ̆m ‘mêm mơnat khŏm wă tơgŭm bơngai hơwen noh.
Mălei, Kră Yang Yêsu ưh kơ pơklaih bơngai jĭ hơwen noh hloi ôh, na Sư khan kơ bơngai hơwen ei: “Ơ dăm, tơdrong yoch ih Inh pơklaih đĭ bơih.” (trong 5). Hơdrol kơ wă pơklaih jĭ gah sĕch akar, Kră Yang Yêsu wă kơ bơngai hơwen noh băt tơdrong yoch sư mơnat bơih, gơh oei hiôk hăm ‘Bok Kei-Dei păng đei tơdrong hơđơ̆ng lăm jơhngơ̆m. Tơdrong ‘nâu kăl hloh kơ tơdrong gơh klaih đơ̆ng jĭ hơwen. Kră Yang khan gah bơhngol kăl hloh kơ gah sĕch akar.
Đĭ đăng kon bơngai weh ataih đơ̆ng ‘Bok Kei-Dei kiơ̆ tơdrong yoch ngăl (Rôm 3:23). Bơngai hơwen âu kư̆m dai bơngai yoch. Tơdrong jĭ bơngai ‘nâu lĕch đơ̆ng kon bơngai bơ̆n pơm yoch oei arih lăm teh đak pơ̆k huŏng lăm tơdrong yoch. Đĭ bơngai hơwen păng puăn ‘nu buăl tung sư noh năm tơ Kră Yang tơchĕng wă kơ gơh klaih đơ̆ng tơdrong jĭ jăn gah sĕch akar đĕch, mălei Kră Yang pơma tơ’bôh ăn gơh klaih đơ̆ng yoch noh kăl hloh. Mưh gơh klaih đơ̆ng yoch bơhngol gơh oei hiôk hăm ‘Bok Kei-Dei, gơh tơ’bưh hăm Sư păng gơh đei pŭn hiôk ưh kơ sĭ kơ chăl arih dang ei đĕch mălei truh tơ chăl arih ning mônh hloi. Thoi noh, Kră Yang khan Sư pơklaih yoch bơngai hơwen noh adrol đơ̆ng noh na Sư pơklaih jĭ hơwen hăm tơdrong mơsêh Sư. Đơ̆ng adrol bơngai âu ‘bĭch kơtă ‘bơ̆t anhŭn ưh kơ gơh adrŏ na puăn ‘nu buăl sư tung anhăk sư tơ Kră Yang, dang ei sư iung hloi iŏk chĕp anhŭn sư brŏk tơhnam. Tơdrong kơnhăm Kră Yang Yêsu jur tơ ala teh âu ưh kơ sĭ wă pơklaih tơdrong jĭ jăn đĕch ôh, mălei wă bơtho tơdrong ‘Bok Kei-Dei păng pơklaih kon bơngai bơ̆n đơ̆ng tơdrong yoch. Sư đei khan: “Thoi noh na iĕm athei ăn kơ Sư pơgơ̆r iĕm, hăm adrin pơm ‘lơ̆ng thoi Sư wă, noh kăl hloh kơ dôm tơdrong nai; pơm thoi noh na Sư gô ăn kơ iĕm tôm tơmam iĕm kăl yua.” (Mathiơ 6:33). Kră Yang Yêsu tơchĕng kơ tơdrong kăl wă gah bơhngol hloh kơ tơdrong kăl wă gah sĕch akar. Mưh bơhngol gơh klaih bơih, bơ̆n arih hơđơ̆ng hiôk lăm teh đak âu, păng năr tôch kơnh brŏk tơ Kră Yang, ưh pă đei jĭ jăn păn hnong yua kơ Kră Yang pơklaih tôm đĭ bơih.
Ơ Kră Yang, apinh Ih tơgŭm inh băt tơpă tơdrong yoch inh Ih mơnat ăn bơih păng gơh klaih đơ̆ng yoch kăl hloh kơ tơdrong gơh klaih đơ̆ng jĭ jăn wă kơ inh rai băt lui gơnang kơ Kră Yang păng arih pơm kơ Kră Yang lăp đon lăm tôm tơdrong đei truh lăm chăl arih inh. Yua anăn Kră Yang Yêsu Krist, Amen.
Bơ̆n hăm đei mơn gơh klaih đơ̆ng tơdrong yoch kăl hloh kơ gơh klaih đơ̆ng jĭ jăn ưh?
Chă dêh char ‘Bok Kei-Dei
Sư ăn pŭn hiôk tôm mah rơkah rơkai
Tơrdrong yoch Sư pơklaih ăn bơih
Apinh pơyơ̆r kơ Kră Yang chăl arih inh âu
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 22
Kênh Youtube BHKTHN:
