Klei Aê Diê Blŭ: Hêbrơ 12:1-3
Êlan kliăng: “Brei drei msĕ mơh lưh hĕ jih mnơ̆ng bi ktrŏ leh anăn klei soh drei čiăng djă pioh, leh anăn brei drei êran hŏng klei gĭr hlăm klei êran arăng pŏk leh kơ drei” (Hêbrơ 12:1b).
Klei êmuh ksiêm mĭn: “Mâo lu phung hưn bi sĭt dôk jŭm drei msĕ si knam”, hlei phung anăn jing? Čiăng gĭr hlăm klei bi lông êran myang, ya klei brei drei ngă? “Yêsu, Pô khua leh anăn Pô bi klă klei đăo drei” si čiăng lač?
Leh yua jih sa kdrêč dlông blŭ djŏ kơ phung jhŏng ktang klei đăo, pô čih hră mơĭt kơ phung Hêbrơ pŏk kŏ kơ kdrêč dua hŏng boh blŭ mduê “snăn”. Sĭt nik, pô čih čiăng phung dlăng hră ñu mơĭt thâo săng “mâo lu phung hưn bi sĭt dôk jŭm drei msĕ si knam” jing phung bi hmô kơ klei đăo ñu mrâo blŭ leh êlâo tinăn hlăm kdrêč 11. Anôk brei drei hdơr nanao tinei jing klei ñu bi msĕ digơ̆ hŏng “knam”, čiăng lač knam mâo lu tal, kpal snăk. Amâodah lač snei, mâo lu lĭn phung jhŏng ktang klei đăo hưn bi sĭt kơ drei thâo kơ digơ̆ dưi leh hlăm klei bi lông êran hlăm klei hdĭp myang digơ̆ pô.
Čiăng êran jăk hlăm klei bi lông anei, pô čih hră mtă kơ drei: “lưh hĕ jih mnơ̆ng bi ktrŏ leh anăn klei soh drei čiăng djă pioh.” (êlan 1) “Mnơ̆ng bi ktrŏ” čiăng lač kơ mnơ̆ng bi gun ti êlan. Mnơ̆ng bi gun anăn amâo djŏ klei jhat ôh, tăp năng anăn jing klei jăk mơh, ƀiădah mnơ̆ng anăn bi mbha klei mĭn drei mơ̆ng bruă drei dưm tal êlâo hĭn hlăm klei hdĭp. Leh anăn sĭt nik, hlăm mnơ̆ng bi gun anăn mâo wăt klei soh mơh. Tuôm mâo leh lu mnuih jing msĕ si sa bĕ “ana kyâo prŏng” hlăm klei đăo, mâo klei hing ang hlăm bruă mă, ƀiădah lĕ buh leh ti krah êlan, boh knhal tuč kơ klei hdĭp amâo mâo sa klei jăk ôh. Ƀiădah drei mâo sa klei ƀuăn jăk snăk jing Khua Yang srăng pap brei kơ hlei pô kmhal sĭt kơ klei soh. Klei anăn čiăng lač drei mâo nanao mmông myun lŏ kgŭ leh anăn lŏ êran leh lĕ buh leh, khă bi drei thâo kmhal kơ klei soh leh anăn lui hĕ klei dôk dơ̆ng ƀơ̆ng huă hŏng klei soh.
Hlăm klei bi lông êran anei, pô čih hră mtă brei drei dlăng kơ Khua Yang Yêsu. Sĭt nik mâo lu mnuih năng kơ drei tui, mâo lu bruă năng kơ drei tui hriăm, ƀiădah klei drei mđing prŏng hĭn jing kơ Khua Yang Yêsu. Drei srăng ngă msĕ snăn kyuadah Ñu jing “Pô bi klă klei đăo” drei. Khua Yang Yêsu jing “Pô khua” kơ klei đăo kyuadah klei Ñu djiê pŏk leh kơ drei sa êlan nao kơ Aê Diê Ama. Khua Yang Yêsu jing “Pô bi klă”, Ñu jing Pô bi leh klei đăo kyuadah ară anei hin Ñu dôk “leh tĭng hnuă kơ jhưng mtao Aê Diê.” Tinăn jing anôk Ñu ƀuh, hmư̆ klei drei wah lač leh anăn thiăm ai ktang kơ drei grăp blư̆ drei êdu ai. Kyuanăn yơh wăt klei bi lông êran hlăm klei đăo amâo mâo ênưih ôh. Brei grăp čô drei dôk hơĭt ai tiê kyuadah anôk bi kčah guh kơang dôk guôn leh hlei pô đăo kơ Khua Yang Yêsu leh anăn gĭr hlăm klei bi lông êran.
Mâo mơ̆ klei soh drei čiăng Khua Yang Yêsu thiăm kơ drei ai ktang lui hĕ klei soh anăn hruê anei mtam?
Wah lač: Ơ Ama hlăm adiê ơi, mâo lu mnơ̆ng dôk bi gun hlăm êlan êbat klei hdĭp myang kâo. Akâo Khua Yang đru kâo thâo lui hĕ klei soh leh anăn dlăng nanao kơ Khua Yang Yêsu čiăng dưi bi leh klei bi lông êran hŏng klei jăk. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Mathiơ 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
