Efexus 5:22-33
Nqe cim:
“…Txhua tus txiv, nyias yuav tsum hlub nyias tus pojniam ib yam li nyias hlub nyias lub cev. Thiab txhua tus pojniam nyias yuav tsum hwm nyias tus txiv.” (Efexus 5:33)
Lus nug rau sawvdaws xav:
– Nyob rau hauv tus Tswv txhua tus puavleej muaj nqis ib yam nkaus tiamsis yog ua cas tus pojniam yuavtsum hwm tus txiv?
– Tus txiv yog tus pojniam lub taubhau muaj lub ntsiab li cas?
– Tus txiv coj tsev neeg mus raws li tus qauv twg?
– Niam txiv ua neej raws li Vajtswv txoj lus qhia yuav tau txais tej yam koob hmoov twg?
Nyob rau ntau txoj kev coj noj coj ua hnub thaud thiab zoo li niaj hnub nimno, pojniam luag yeej saib tsis muaj nqis npaum li txiv neej. Tiamsis nyob rau hauv Pawg Ntseeg tsis muaj kev xaiv ntsejmuag, vim ntawm Vajtswv lub xubntiag tsis hais yog haivneeg twg, ua tswv lossis ua qhev, pojniam txivneej txhua tus puavleej muaj nqis ib ib yam nkaus (Kalatias 3:28). Tiamsis yog ua cas timthawj Paulus yuav qhia hais tias tus pojniam yuavtsum hwm tus txiv? Nqe 23 qhia meej hais tias tus txiv yog tus pojniam lub taubhau “Rau qhov tus txiv yog tus uas muaj hwjchim kav tus pojniam, ib yam li Yexus Khetos muaj hwjchim kav cov ntseeg. Cov ntseeg yog Yexus Khetos lub cev, thiab Yexus Khetos yog cov ntseeg tus Cawmseej”. Taubhau yog hais txog kev muaj hwjchim. Raws li Vajtswv tus uas zoo kawg nkaus lub siab nyiam Nws xav kom txhua pab pawg neeg tau tsa los ua ib yam dab tsi twg yuavtsum muaj tus thawj coj, los coj kev. Tsev neeg lub taubhau yog tus txiv, Pawg Ntseeg lub taubhau yog Tswv Yexus, ib lub tebchaws li taubhau yog vajntxwv. “Sawvdaws yuav tsum mloog nomtswv lus, rau qhov tej nomtswv ntawd yog Vajtswv pom zoo thiaj muaj.…” (Loos 13:1a).
Tus pojniam mloog tus txiv lus li mloog tug Tswv lus txhais hais tias, yog mloog los ntawm txoj kev txaus siab, tsis yog ntawm txoj kev ntshai. Lolus “ib yam li nej mloog tus Tswv lus” qhia hais tias tus txiv yuavtsum xyaum tus Tswv tus qauv coj tsev neeg thiab tus pojniam yuav mloog tus txiv lus yog thaum tus txiv paub mloog tus Tswv lus. Yog tus txiv tej lus tsis raws li tus Tswv siab nyiam ces yuavtsum ua li tim thawj Petus teb cov nom tswv uas txwv tsis pub qhia Yexus lub npe hais tias, “Peb yeej yuav mloog Vajtswv lus heev dua li mloog neeg lus” (Tes Haujlwm 5:29).
Tim thawj Paulus qhia hais tias tus txiv cia li coj tsev neeg kev los ntawm txoj kev hlub li Tswv Yexus tus qauv hlub Pawg Ntseeg. Tswv Yexus los rau hauv ntiajteb no “Nws tsis tau kom leejtwg tu nws, tiamsis nws los tu sawvdaws…” (Malakaus 10:45), ib yam li ntawd, tus txiv yuavtsum hlub tus pojniam los ntawm txoj kev hlub txaus siab poob txhua yam vim tus uas yus hlub, siv sijhawm, siv dag zog los tu pojniam thiab tsev neeg, tsis txhob muaj tus cwjpwm ua limhiam rau pojniam (Khaulauxais 3:19). Hauv Tswv Yexus, tus pojniam thiab tus txiv los koom ua ib lub cev lawm (Chivkeeb 2:24) yog li ntawd, tus txiv uas hlub thiab tu nws tus pojniam ces kuj yog nws hlub nws lub cev ntag (nqe 28).
Xaus lus ntawm tus ua niam ua txiv feem xyaum hauv nqe 33 hais tias “Txhua tus txiv, nyias yuav tsum hlub nyias tus pojniam ib yam li nyias hlub nyias lub cev. Thiab txhua tus pojniam nyias yuav tsum hwm nyias tus txiv.” Qhov ntawd txhais hais tias, thaum txoj kev ua niam txiv muaj Vaj Ntsujplig ua tus coj kev thiab nyias paub nyias feem xyuam li Vajtswv Txojlus qhia lawm, ces lub tsev neeg yuav nyob kaj siab, thaum muaj tej kev sim siab tuaj raug yuav siv kev hlub los daws tau tsis nyuaj, lub neej yuav tau txais Vajtswv koob hmoov thiab yuav yog tus qauv zoo rau tej menyuam xyaum.
Thov Vajtswv,
Vajtswv, thov pab kom nyuam yaus ob niam txiv txawj sib hlub, sib pab, sib hwm li Koj Txojlus qhia kom nyuam yaus tsev neeg ua neej muaj kev kaj siab thiab kom nyuam yaus tej menyuam tau txais Vajtswv koob moov. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb lub tsev neeg tus niam tus txiv puas ua neej yog nyias feem xyuam raws li Vajtswv Txojlus qhia?
Nyeem Vajluskub hauv peb lub xyoos: Khiavdim 38
Kênh Youtube BHKTHN:
