Klei Aê Diê Blŭ: Philip 3:12-14
Êlan kliăng: “Kâo hung čiăng truh kơ anôk bi kčah, čiăng mă klei mưn jing klei Aê Diê iêô hlăm Krist Yêsu kơ klei hdĭp ti dlông” (Philip 3:14).
Klei êmuh ksiêm mĭn: Klei êran leh anăn anôk bi kčah Khua ƀĭng kna Y-Pôl lač čiăng lač kơ ya mta klei? Si Y-Pôl brei thâo kơ klei ñu “hung” leh anăn klei ñu ktưn ngă ti anăp? Hlăm thŭn mrâo anei si ngă ih tui tiŏ klei êran?
Khua ƀĭng kna Y-Pôl khăng yua rup klei bi lông êran čiăng lač klei hdĭp phung đăo kơ Krist (dlăng Bruă Phung Khua Ƀĭng Kna 20:24; I Kôrantô 9:24; Galati 5:7). Hlăk đăo kơ Yêsu mtam, grăp čô drei jing phung bi lông êran sơăi hlăm klei hdĭp myang. Klei kñăm čiăng kơ klei êran anei jing čiăng dưi thâo kral Khua Yang lu hĭn leh anăn jing msĕ si Ñu hĭn (Philip 3:10). Amâodah lač snei, klei êran anei yơh jing êlan myang čiăng kơ sa čô mnuih đăo kơ Krist dưi đĭ hriê kơ prŏng.
Blŭ djŏ kơ klei ñu jing ară anei hin, Khua ƀĭng kna Y-Pôl lač, “Amâo djŏ ôh kâo mă tŭ leh klei mưn, amâodah truh leh kơ klei jăk klă, ƀiădah kâo hung phă anăp čiăng mă klei anăn kơ kâo pô, kyua kơ klei anăn Krist Yêsu mă leh kâo kơ Ñu pô” (êlan 12). Ñu ăt dôk hlăm klei dôk đĭ hriê kơ prŏng, klei hdĭp myang ñu ka jing jăk klă ôh. Ñu thâo kơ ñu pô dôk hlăm klei êran, leh anăn srăng gĭr grăp hruê. Kyuanăn, ñu ktưn ngă: “kâo wơr bĭt hĕ klei ti tluôn leh anăn hung kơ klei ti anăp. Kâo hung čiăng truh kơ anôk bi kčah, čiăng mă klei mưn jing klei Aê Diê iêô hlăm Krist Yêsu kơ klei hdĭp ti dlông” (êlan 13b-14).
Bi mni kơ Khua Yang kyua sa thŭn êgao brei kơ drei mâo lu mmông myun pioh hriăm čiăng dưi thâo kral Khua Yang. Mâo klei jăk jĭn năng kơ drei hdơr ƀiădah ăt mâo mơh klei êgao leh năng brei drei wơr bĭt hĕ. Khua Yang čiăng drei mŭt sa thŭn mrâo hŏng klei thâo săng anei jing sa thŭn drei ăt lŏ êran, jing mmông găl čiăng kơ klei hdĭp myang drei dưi đĭ hriê kơ prŏng. Wăt tơdah hlăm thŭn êgao leh mâo klei dưi amâodah hơăi, đăm brei klei anăn bi mbha klei mĭn, bi wơr drei klei êran phă anăp ôh.
Hlăm dŭm hruê akŏ thŭn mrâo anei, čang hmăng grăp čô drei ktưn: “êran phă anăp kơ anôk bi kčah leh.” Brei drei ktưn hriăm čiăng dưi thâo kral Khua Yang lu hĭn leh anăn jing msĕ si Ñu hĭn. Čiăng ngă klei ktưn anei, brei grăp čô drei mkra hdră bi klă. Si tô hmô, ƀuăn dlăng jih hdruôm hră Klei Aê Diê Blŭ, dlăng hdruôm hră klei hriăm, hdruôm hră klei hriăm Adŭ Hruê Kjuh, mŭt hriăm adŭ hriăm Klei Aê Diê Blŭ leh anăn lu klei mkăn đa đa…Mbĭt hŏng klei anăn brei drei mkra hdră ngă mơh ya klei hriăm drei mâo mơ̆ng klei drei mă bruă, atăt ba mnuih mkăn hriê kơ Khua Yang leh anăn mtô klei đăo kơ digơ̆. Aê Diê Pô iêô drei kơ klei bi lông êran srăng thiăm klei ktang kơ drei čiăng drei dưi êran tuč êlan êran tơl truh kơ anôk bi kčah leh anăn mă tŭ klei mưn prŏng Ñu pioh leh kơ drei.
Hlăm thŭn mrâo anei ya drei srăng ngă čiăng thâo kral Khua Yang lu hĭn leh anăn jing msĕ si Ñu hĭn?
Wah lač: Ơ Khua Yang, kâo lač jăk kơ Ih kyua sa thŭn mrâo Ih pŏk kơ kâo sa mmông myun čiăng ăt êbat hlăm êlan êbat myang, čiăng klei hdĭp myang kâo dưi đĭ hriê kơ prŏng. Đru kâo mđing, hung phă anôk bi kčah leh, leh anăn amâo bi mbha klei mĭn kyua jih jang klei djiêo gah ôh. Đru kâo sĭt suôr hlăm tui tiŏ klei kñăm čiăng thâo kral Ih leh anăn jing msĕ si Ih hĭn. Kâo wah lač hlăm anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 43
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
