Klei Aê Diê Blŭ: Klei Bi Hriêng 21:16-18; Rôm 6:15-23
Êlan kliăng: “Kyuadah ênoh mưn kyua klei soh jing klei djiê, ƀiădah klei Aê Diê brei hơăi mang jing klei hdĭp hlŏng lar hlăm Krist Yêsu Khua Yang drei” (Rôm 6:23)
Klei êmuh ksiêm mĭn: Ya boh jhat mơ̆ng bruă ngă soh? Mơ̆ng ya klei phung ƀuôn sang Aê Diê jing hlŭn kơ klei kpă ênô? Si ngă čiăng drei dưi êbat hlăm êlan kpă ênô Khua Yang?
Klei Bi Hriêng 21:16-18 mtô, phung ƀai srăng tŭ klei jhat kjham snăk mơ̆ng bruă kngan diñu pô ngă. Hrô kơ êbat hlăm êlan thâo mĭn, kpă ênuah mơ̆ng Aê Diê, phung lui êlan klei thâo mĭn ruah leh êlan hjăn klei soh. Boh jhat mơ̆ng klei čhuai êlan soh jhat jing diñu dôk “ti anôk phung djiê bi kƀĭn”, tŭ mbĭt klei hdĭp hŏng phung ƀai (êlan 16). Đa đa mnuih hrô kơ mđing truh hdră kñăm tui hriăm klei kpă ênô Khua Yang, duah klei mơak hlăm klei bhiăn Ñu čiăng ngă hlue, snăn diñu lŏ khăp kơ klei mơak lăn ala, ñŭ êlam hlăm klei hlăp mbŭl, kpiê ruă phưi tha. Tơdah leh kpiê ruă, dŭm boh klei mâo jing kjham hĭn êjai, klei ƀun ƀin lŏ đĭ hĭn, klei hdĭp ƀrư̆ hruê mmăt tĭt hĭn (êlan 17). Phung ƀai knhal tuč ăt tla ênua kơ klei soh, kơ klei jhat ƀai, amâo mtăp mđơr diñu ngă leh čiăng ƀêč ngă jhat kơ phung kpă ênô snăn diñu pô lŏ lĕ hlăm klei anăn. Diñu duah hdră ba phung kpă ênô hlăm anôk djiê snăn ară anei diñu lŏ tla klei soh hrô kơ phung kpă ênô. Êlan 18 mñă wĭt klei Mtao Y-Salômôn mtô leh: “Arăng bi mtlaih mnuih kpă ênô mơ̆ng klei rŭng răng, ƀiădah klei rŭng răng anăn truh kơ mnuih ƀai” (Klei Bi Hriêng 11:8). Phung ƀai klam klei djiê diñu pô ngă leh kơ phung kpă ênô. Bi phung kpă ênô, Khua Yang srăng bi mtlaih mơ̆ng klei jhat.
Hlăm hră Rôm 6:15-23, Khua ƀĭng kna Y-Pôl mtô phung ƀuôn sang Aê Diê ñĕ đuĕ kbưi hŏng êlan klei soh, đăm lŏ jing hlŭn kơ klei soh ôh kyua klei knhal tuč kyua klei soh jhat jing klei djiê. Phung ƀuôn sang Aê Diê brei thâo kơ klei khăp leh anăn klei pap Khua Yang bi mtlaih leh pô, čiăng đăm lŏ jing hlŭn kơ klei soh ôh. Ară anei drei jing hlŭn kơ klei kpă ênô anăn brei jih ai tiê knang kơ Khua Yang hdĭp kpă ênô, doh jăk. Hlăm Khua Yang Yêsu Krist, drei dưi mtlaih mơ̆ng klei soh, dưi bi doh jăk leh anăn knhal tuč dưi hdĭp hlŏng lar.
Akâo kơ Khua Yang đru grăp čô drei thâo kmhal mtam tơdah Yang Mngăt Jăk ƀuah mkra klei soh. Knang kơ Khua Yang bi juh, mđĭ ai čiăng êbat tui hlue êlan Khua Yang, leh anăn hdơr nanao: “Kyuadah ênoh mưn kyua klei soh jing klei djiê, ƀiădah klei Aê Diê brei hơăi mang jing klei hdĭp hlŏng lar hlăm Krist Yêsu Khua Yang drei” (Rôm 6:23). Đăm lĕ hlăm klei mơak mñai ti lăn ala anei ôh ƀiădah brei hdĭp hlăm êlan thâo mĭn, kpă ênô Aê Diê, drei srăng dưi dưn klei êđăp ênang, jăk mơak hlăm klei hdĭp anei leh anăn mâo klei hdĭp hlŏng lar hlăm Ƀuôn Ala Mtao.
Mâo ya klei soh, klei mơak ti lăn ala anei ngă kơ drei ngơi mang hlăm êlan tui hlue Khua Yang mơ̆?
Wah lač: Ơ Khua Yang, akâo kơ Ih pap brei kơ klei mĭn, bruă ngă soh jhat kâo. Akâo kơ Yang Mngăt Jăk ktrâo atăt kâo êbat djŏ leh anăn êbat kluôm êlan Khua Yang. Akâo kơ Ih đru kâo mđing kơ klei hdĭp hlŏng lar hĭn kơ klei mơak ti lăn ala anei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
