Klei Aê Diê Blŭ: Y-Mathiơ 15:32-39
Êlan kliăng: “Yêsu lač kơ diñu, “Dŭm klŏ kpŭng diih mâo lĕ?” Diñu lač, “Kjuh klŏ leh anăn đa đa drei kan điêt.” (Y-Mathiơ 15:34)
Klei êmuh ksiêm mĭn: Leh mdrao klei ruă kơ lu mnuih, ya klei Khua Yang Yêsu čiăng ngă kơ phung ƀuôn sang? Si ngă phung ƀĭng kna bi êdah ai tiê diñu hŏng klei Khua Yang čiăng? Si diih mă yua klei hriăm tơdah tuôm hŏng klei phung mkăn čiăng?
Leh bi hlao klei ruă lu mnuih, Khua Yang Yêsu iêô phung ƀĭng kna leh anăn lač, “Kâo mâo klei pap kơ phung lu, kyuadah digơ̆ dôk leh mbĭt hŏng kâo tlâo hruê, leh anăn amâo mâo mnơ̆ng ƀơ̆ng huă ôh. Kâo amâo čiăng brei digơ̆ wĭt tian êpa ôh, huĭdah digơ̆ djiê hwăt ktuê êlan” (êlan 32). Khua Yang Yêsu amâo djŏ knŏng mtô leh anăn bi hlao klei ruă ôh ƀiădah Ñu ăt mđing kơ klei čiăng hlăm kđeh asăr leh anăn klei suaih pral phung ƀuôn sang. Ñu amâo čiăng ôh digơ̆ wĭt hlăm boh klei êmăn mik, hwăt ai tiê. Khua Yang ƀuh klei êpa hmao hlăm mngăt phung ƀuôn sang nao kơ Ñu amâo djŏ kyua mnơ̆ng ƀơ̆ng ôh, leh anăn Ñu ăt mđing kơ klei čiăng hlăm asei mlei digơ̆ mơh.
Phung ƀĭng kna djăl wơr êdi, diñu amâo hdơr ôh hlăm boh klei msĕ snăn êlâo anăn, Khua Yang mblư̆ leh kpŭng kơ phung ƀuôn sang lu snăk ƀơ̆ng leh anăn adôk êbeh bŏ 12 bai. Kyua anăn diñu wĭt lač hŏng Khua Yang: “Ti anôk drei dưi mâo djăp kpŭng hlăm kdrăn tač dưi čiêm phung lu msĕ snei?” (êlan 33). Tơdah Khua Yang Yêsu êmuh: “Dŭm klŏ kpŭng diih mâo lĕ?” Diñu lač, “Kjuh klŏ leh anăn đa đa drei kan điêt.” Ênoh mnơ̆ng ƀơ̆ng anei tơdah dưm hlăm kngan diñu ăt knŏng djăp kơ ƀiă mnuih, ƀiădah hlăm kngan Khua Yang, Ñu bi djăp klei čiăng kơ pă êbâo čô ƀơ̆ng amâo yap ôh wăt phung mniê leh anăn hđeh điêt ăt adôk êbeh bŏ kjuh boh bai.
Hruê anei, drei khăng lư mplĕ bruă klam đru kơ phung mkăn hŏng klei blŭ “klei čiăng prŏng đei’, “kâo amâo dưi đru ôh”… Khua Yang Yêsu čiăng kơ drei brei mđing uêñ kơ klei čiăng phung riêng gah drei msĕ si Ñu mđing uêñ leh. Đăm lač ôh drei knŏng mđing kơ klei čiăng hlăm mngăt bi klei čiăng hlăm asei mlei snăn brei digơ̆ kriê dlăng mă hjăn pô dê. Khua Yang amâo čiăng ôh phung mkăn knŏng hmư̆ kơ klei khăp leh anăn wĭt hlăm boh klei ư̆ êpa kyua kƀah mnơ̆ng dhơ̆ng.
Grăp čô drei mâo sơăi ƀiă êdi sa talăng Khua Yang brei, tơdah knŏng djă pioh hjăn păn pô, boh tŭ dưn amâo srăng mâo lu ôh, ƀiădah tơdah drei myơr kơ Khua Yang snăn hlăm kngan Ñu, srăng jing tŭ dưn kdlưn hĭn lu êbeh kơ bruă Khua Yang, bi djăp klei čiăng hŏng klei yuôm bhăn, êbeh dlai. Khua Yang srăng yua klei điêt hlăm phung drei čiăng ngă klei prŏng prĭn tŭ dưn kơ lu phung riêng gah pô dôk mâo klei čiăng.
Akâo kơ Khua Yang đru drei thâo kral kơ klei čiăng hlăm mngăt ăt msĕ mơh hlăm kđeh asăr phung riêng gah, hŏng ai tiê thâo pap čiăng đru digơ̆ hlăm klei dưi pô mâo, Khua Yang srăng brei boh tŭ prŏng hĭn mơ̆ng ya klei điêt dhiêt drei myơr.
Drei mđing mơ̆ kơ klei dleh dlan leh anăn jih ai tiê đru kơ phung riêng gah pô?
Wah lač: Ơ Khua Yang, akâo kơ Ih đru kâo tui hlue Ih, hdĭp bi êdah Klei Mrâo Mrang Jăk hŏng phung riêng gah kâo, amâo djŏ knŏng mtô leh anăn bi hlao hlăm mngăt ôh ƀiădah ăt mđing uêñ kơ klei čiăng hlăm kđeh asăr leh anăn klei suaih pral digơ̆ mơh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Kbiă 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
