Klei Aê Diê Blŭ: Y-Yêrêmi 24:1-10.
Êlan kliăng: “Snei Yêhôwa, Aê Diê phung Israel lač: ‘Msĕ si boh hra jăk anei, msĕ snăn mơh phung mnă mơ̆ng čar Yuđa kâo suôt leh mơ̆ng anôk anei brei diñu nao kơ čar Kaldê, klei anăn jing tŭ dưn kơ diñu” (Y-Yêrêmi 24:5)
Klei êmuh ksiêm mĭn: Ya klei Khua pô hưn êlâo Y-Yêrêmi dưi ƀuh mŏng Yêhôwa? Klei Yêhôwa brei ñu ƀuh ya jing? Ya ngă mâo klei tŭ mdê mdê mơ̆ng dua bai boh hra? Ya klei hriăm anei mñă kơ phung drei hlăm hdră tui hluê Khua Yang?
Khua pô hưn êlâo Y-Yêrêmi lŏ dơ̆ng tŭ mă klei bi ƀuh mơ̆ng Yêhôwa bi êdah, anăn jing dua bai boh hra mdê mdê. Sa bai dưm boh hra jăk, bi bai dih dưm boh hra jhat snăk tơl arăng amâo dưi ƀơ̆ng ôh (êlan 2-3). Yêhôwa brei khua pô hưn êlâo thâo dua bai boh hra ñu ƀuh jing bi hmô kơ klei hdĭp mơ̆ng mnuih ƀuôn sang Aê Diê ruah Israel. Bai boh hra jăk jing gru rup mơ̆ng mtao Y-Jêhôyakin, amĭ mtao, jih jang phung khua kahan, phung lĭng kahan jhŏng ktang, phung mkra kyâo leh anăn tuh tia msei… jing phung gưt asăp Yêhôwa dưi hưn mthâo êlâo anăn jao diñu pô kơ mtao Ƀabylôn (II Bruă Mtao 24: 12-16), Y-Yêrêmi 21:9). Phung anei srăng msĕ si Klei Yêhôwa lač leh diñu srăng hdĭp, leh anăn Aê Diê ƀuăn Ñu srăng “uêñ dlăng leh anăn ngă klei jăk” (êlan 5). Bi kơ gru rup bai boh hra jhat jing klei hdĭp mơ̆ng “Y-Sêdêkia mtao Yuđa, phung khua ñu, kdrêč ăt dôk mơ̆ng phung ƀuôn Yêrusalem ăt dôk hlăm čar anei, amâodah phung dôk hlăm čar Êjip” (êlan 8a), kyua diñu ăt knŏng čiăng ngă klei pô čiăng truh knhal tuč, amâo tŭ ư klei ngă hlŭn, anăn klei hdĭp diñu tŭ “klei hêñ, klei arăng djă djik djak, klei mưč, leh anăn klei tăm pah hlăm jih jang anôk kâo srăng suôt diñu.” (êlan 9b) leh anăn Yêhôwa pô srăng ba klei ruă tưp, đao gưm, klei ư̆ êpa tơl diñu rai jih mơ̆ng lăn Aê Diê ƀuăn leh (êlan 10).
Wăt tơdah jih dua êpul mâo phung kahan nah Dưr kdŭng ngă ƀiădah diñu mâo leh dua klei hdĭp mdê mdê. Sa êpul gưt hluê si Klei Yêhôwa iêu mthưr, ba jao diñu pô čiăng jing mnă, jing klei bi kmhal năng djŏ hŏng klei soh diñu ngă leh, snăn dưi mă klei pap brei leh anăn bi mrâo mơ̆ng Yêhôwa (êlan 6-7). Hjăn êpul adôk ăt čiăng hdĭp tui si klei diñu čiăng, amâo mâo ôh bruă ngă brei ƀuh diñu kmhal klei soh êlâo dih, anăn diñu msĕ si bai boh hra jhat tơl amâo dưi lŏ ƀơ̆ng ôh, ba hwiê, diñu srăng hêñ ti krah dŭm ala čar leh anăn bi rai (êlan 9-10).
Dŭm klei bi hmô anei brei drei bi mĭn kơ klei kah mbha mơ̆ng Yêhôwa hlăm hruê knhal tuč. Dua êpul mnuih hŏng dua klei hdĭp bi mklăk: mdiê, amâo dah biăp dưi bi kah čiăng tŭ mă klei hdĭp jăk mơak, bi êpul rơ̆k jhat amâo dah bê ăt dưi bi kah ƀiădah čiăng tŭ klei bi kmhal lă lar (Y-Mathiơ 3:12, 25:32-33). Kyua anăn, kmhal bĕ klei soh êjai dôk mâo mông găl.
Ya klei gun kpăk gang drei amâo dưi bi êdah ai tiê kmhal hŏng Aê Diê?
Ơ Aê Diê Pô Myang hĭn! Mơ̆ng klei Ih phat kđi kơ phung buôn sang Aê Diê, kâo ƀuh Ih bŏ klei pap prŏng prĭn kơ hlei pô thâo kmhal klei soh. Akâo kơ Ih đru kâo mčah ai tiê thâo kmhal klei soh sĭt mâo Ih ƀuah ăl.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 11:1-30
Kênh Youtube BHKTHN:
