Klei Aê Diê Blŭ: Y-Yêrêmi 25:1-6
Êlan Kliăng: “Khua ñu lač kơ ñu, Jăk leh, Ơ dĭng buăl jăk leh anăn sĭt suôr. Ih dôk sĭt suôr hlăm bruă điêt, kâo srăng brei ih kiă kriê lu. Mŭt bĕ leh anăn mâo klei hơ̆k mơak mbĭt hŏng khua ih.” (Y-Mathiơ 25:21).
Klei êmuh ksiêm mĭn: Khua pô hưn êlâo Y-Yêrêmi hưn Klei Aê Diê Blŭ hlăm dŭm thŭn? Si ngă ai tiê ñu ngă leh bruă klam? Si ngă ai tiê drei hluê ngă klei Aê Diê mtă?
Mphŭn mơ̆ng bruă ngă hlăm “thŭn tal pluh tlâo ênuk Y-Jôsia” truh kơ ênuk Khua pô hưn êlâo Y-Yêrêmi dôk bi hriăm Klei Aê Diê Blŭ kơ phung ƀuôn sang Israel jing dua pluh tlâo thŭn (êlan 3). Yap mơ̆ng leh hmư̆ klei blŭ mơ̆ng Yêhôwa, ñu amâo lŏ dôk guôn ôh, ƀiădah kgŭ ưm čiăng lač kơ phung ƀuôn sang Aê Diê. Klei blŭ diñu čiăng hmư̆ jing “brei jih jang diih wir đuĕ bĕ mơ̆ng êlan soh leh anăn klei jhat diih ngă”; “dôk hlăm čar Yêhôwa brei leh”, “Đăm tui hlue yang mkăn ôh čiăng mă bruă leh anăn kkuh mpŭ kơ diñu” (êlan 4-5), ƀiădah diñu amâo dôk hmư̆ ôh!
Dua pluh tlâo thŭn jing wưng sui dôk čang guôn čiăng thâo ƀuh phung ƀuôn sang Aê Diê hmư̆ klei pô blŭ, ƀiădah Khua pô hưn êlâo Y-Yêrêmi ăt kăn êdu ai. Klei čih lač ti nei brei ƀuh ñu kgŭ ưm čiăng hưn klei ñu hmư̆ leh mơ̆ng Yêhôwa, ăt hưn mơ̆ng hruê anei truh hruê mkăn, thŭn anei truh thŭn mkăn, leh anăn tlă anăp hŏng lu klei bi kdơ̆ng… Jih jang klei anăn amâo ngă kơ phung mă bruă sĭt suôr kơ Aê Diê êdu ai hlăm bruă knuă ôh, ƀiădah ai tiê sĭt suôr, hur har mơ̆ng Khua pô hưn êlâo Y-Yêrêmi ƀrư̆ bi êdah ktang hĭn, gĭr hĭn.
Drei khăng čhuai knŏng phung Khua pô mtô jing phung dĭng buăl kơ Aê Diê, ƀiădah wơr hĕ mơ̆ng leh Khua Yang bi mtlaih leh drei hŏng klei yuôm bhăn, jih jang phung drei amâo lŏ jing hlŭn kơ klei soh ôh ƀiădah jing dĭng buăl kơ Khua Yang klei khăp, leh anăn dưi mâo Khua Yang jao bruă mdê mdê. Ñu iêu đa đa mnuih jing khua pô mtô, phung bi hriăm,… (Êphêsô 4:11), leh anăn Ñu ăt iêu phung drei hŏng klei kluôm ênŭm jing phung hiu hưn klei mrâo mrang jăk kơ Ñu. Khă gơ̆ jing dĭng buăl Aê Diê hlăm ya bruă klam, wăt tơdah wưng hluê ngă bruă klam bhiâo amâodah sui, ƀiădah bruă Aê Diê jao brei kơ drei jing msĕ “Ƀiădah tơdah Yang Mngăt Jăk truh kơ diih; diih srăng mă tŭ klei myang leh anăn diih srăng jing phung hưn bi sĭt kơ kâo hlăm ƀuôn Yêrusalem, hlăm tar čar Yuđa, čar Samari, leh anăn tơl truh ti knhal lăn ala.” (Bruă Phung Khua Ƀĭng Kna 1:8). Khădah, lu bliư̆ drei ăt ngĭ ngư̆ hŏng lu mta phŭn “păt dah amâo đei djŏ klă ôh” msĕ si: “Kâo amâo mâo klei thâo hiu hưn Klei Mrâo Mrang Jăk”, “Kâo amâo thâo si ngă srăng blŭ”. Amâodah hlăk ngă bruă ƀiădah tuôm hŏng klei arăng bi kdơ̆ng, mưč mač, ka ƀuh boh tŭ dưn snăn drei êdu ai, lui bruă klam Aê Diê jao kơ pô mkăn. Klei bi hmô mơ̆ng Khua pô hưn êlâo Y-Yêrêmi jing klei mđĭ ai phung drei gĭr ngă bruă čiăng kơ jih jang phung drei jing dĭng buăl jăk, sĭt suôr kơ Khua Yang.
Drei jing sa čô dĭng buăl jăk, sĭt suôr kơ Aê Diê mơ̆?
Ơ Khua Yang Aê Diê Pô Myang hĭn! Kâo bi mni lač jăk kơ Ih bi mtlaih leh kâo leh anăn jao kơ kâo hiu hưn Klei Mrâo Mrang Jăk Ih, akâo kơ Ih đru kâo jing sa čô dĭng buăl sĭt suôr hluê ngă bruă klam Aê Diê jao wăt tơdah tuôm hŏng klei găl jăk amâo dah tlaih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 11:31-13:16
Kênh Youtube BHKTHN:
