Klei Aê Diê Blŭ: Y-Yôhan 18:1-11
Êlan kliăng:
“Kyuadah klei khăp kơ prăk jing agha kơ jih jang klei jhat; leh anăn kyua klei tluh anăn đa đa klah đuĕ leh mơ̆ng klei đăo leh anăn bi truh kơ ai tiê diñu lu klei rŭng ênguôt.” (I Y-Timôthê 6:10).
Klei êmuh ksiêm mĭn: Bi msĕ lăng êlan 2 hŏng êlan 5 ya mta klei brei ƀuh kơ klei bi mlih anôk Y-Yuđas dôk dơ̆ng? Ya mta klei mtrŭt brei “khua ƀĭng kna Y-Yuđas” pô Khua Yang iêu jing hĕ “Y-Yuđas, pô lhiăr kơ Khua Yang”? Ya mta klei dôk mtrŭt drei tui hlue Khua Yang?
Leh bi mprăp ai tiê klei mĭn kơ phung khua ƀĭng kna (kdrêč 13-17), Khua Yang Yêsu nao mđrăm mbĭt hŏng diñu kơ war mnga anôk diñu jêñ nao. Êlan 2 brei ƀuh Y-Yuđas thâo bĭt mơh anôk anei kyuadah ñu ăt khăng nao mbĭt kơnăn hŏng Khua Yang leh anăn phung khua ƀĭng kna mkăn čiăng bi kƀĭn leh anăn wah lač. Êlan 5 brei thâo mlam anăn Y-Yuđas nao kơnăn mơh leh anăn “dôk mbĭt hŏng diñu” – “hŏng diñu”, ară anei amâo djŏ ôh dôk mbĭt hŏng Khua Yang leh anăn hŏng phung khua ƀĭng kna sĭt suôr hŏng ñu, ƀiădah dôk mbĭt hŏng phung djă mnơ̆ng bi blah čiăng nao mă Khua Yang. Dơ̆ng mơ̆ng anôk dôk dơ̆ng mbĭt hŏng Khua Yang leh anăn phung ƀĭng kna, Y-Yuđas mlih nao dôk dơ̆ng tĭng kơ phung mă leh anăn bi mdjiê Khua Yang. Dơ̆ng mơ̆ng khua ƀĭng kna Y-Yuđas, ñu sĭt êmĭt mlih jing hĕ “Y-Yuđas pô lhiăr kơ Khua Yang” (êlan 2,5).
Klei Aê Diê Blŭ čih kơ Y-Yuđas amâo lu ôh. Bliư̆ tal êlâo hĭn ƀuh mâo anăn ñu hlăm hră čih anăn pluh dua čô khua ƀĭng kna Khua Yang ruah, leh Ñu krŏng ală jih mlam wah lač (Y-Luk 6:12-16). Khua Yang mdưm ñu mtăp mđơr hŏng phung khua ƀĭng kna mkăn mơh msĕ si Y-Pêtrôs, Y-Andrê, Y-Yôhan…Bliư̆ tal mkăn hlăk Khua Yang lač kơ phung ƀuôn sang tui duah Ñu kyua čiăng mâo kpŭng ƀơ̆ng ƀiădah amâo thâo ôh kơ Khua Yang yơh jing kpŭng hdĭp trŭn mơ̆ng adiê. Hlăk anăn, lu mnuih kdŭn tluôn, amâo lŏ tui hlue Khua Yang ôh. Êdei kơnăn mtam, Khua Yang ênguôt lač kơ Y-Yuđas: “Amâo djŏ hĕ kâo ruah diih leh, pluh dua čô, ƀiădah sa čô hlăm phung diih jing yang jhat?” (Y-Yôhan 6:22-71). Sa bliư̆ mkăn, hlăk H’Mari bi mčah giêt êa ƀâo mngưi nard phŭn yuôm snăk čiăng trôč ti jơ̆ng Khua Yang. Khua ƀĭng kna Y-Yôhan čih: “Y-Yuđas Iskariôt, … lač, si ngă amâo čhĭ hĕ êa ƀâo mngưi anăn kơ ênoh tlâo êtuh đơniê leh anăn brei kơ phung ƀun ƀin? Ñu lač klei anăn, amâo djŏ kyuadah ñu uêñ kơ phung ƀun ƀin ôh, ƀiădah kyuadah ñu jing mnuih knĕ, leh anăn ñu jing pô djă kdŭng prăk leh anăn khăng mă prăk arăng dưm hlăm kdŭng anăn” (Y-Yôhan 12:4-6). Khua ƀĭng kna Y-Mathiơ čih Y-Yuđas ư ai čhĭ Khua Yang hŏng tlâo pluh klŏ prăk (Y-Mathiơ 26:14-16)…
Mơ̆ng ya klei “khua ƀĭng kna Y-Yuđas” pô Khua Yang iêu mlih jing hĕ “Y-Yuđas, pô lhiăr kơ Khua Yang”? Dŭm bliư̆ Klei Aê Diê Blŭ čih djŏ kơ ñu bi mâo mbĭt hŏng đa bruă duah kpŭng ƀơ̆ng, ngăn drăp, prăk kăk sơăi. Ñu tui hlue Khua Yang, hmư̆ klei Khua Yang mtô bi hriăm, ƀuh bruă Khua Yang ngă leh anăn ngă bruă Khua Yang jao ƀiădah klei mtrŭt mơ̆ng lam ai tiê ñu kyua klei čuôt klih, kyua mnơ̆ng dhơ̆ng đuč. Ñu ngă bruă Khua Yang jao, ƀiădah boh sĭt gơ̆ knŏng pioh bi bŏ tian ñu, kdŭng ñu. Klei tluh kơ prăk ngă kơ ñu dôk mbĭt hŏng Khua Yang mơh ƀiădah amâo mâo Khua Yang hlăm ñu ôh, êbat mđrăm mbĭt hŏng Khua Yang mơh ƀiădah ai tiê knŏng mĭn kơ prăk, leh anăn êlan knhal tuč, ñu ruah čhĭ Khua Yang.
Hlăm yan bi hdơr kơ Khua Yang tŭ klei knap mñai, thŭn anei, grăp čô drei brei bi êmuh hĕ: Ti anôk kâo dôk dơ̆ng ară anei? Kâo nao kơ anôk jêñ nao, anôk mâo Khua Yang čiăng thâo kral Khua Yang amâodah čiăng “duah ƀơ̆ng”? Mâo mơ̆ ya mta “agha tluh kơ prăk” dôk kma mŭt hlăm ai tiê kâo?
Ơ Khua Yang, akâo kơ Ih bi mtlaih kâo mơ̆ng klei tluh kơ prăk čiăng kơ kâo đăm mă tŭ lu klei ruă ênguôt ti lăn ala anei leh anăn wăt kơ ênuk hlŏng lar.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
