Klei Aê Diê Blŭ: I Têsalônik 4:13-18
Êlan kliăng: “Kyuadah Khua Yang pô srăng trŭn hriê mơ̆ng adiê hŏng klei ur mjan, hŏng asăp khua dĭng buăl jăk Aê Diê, leh anăn hŏng asăp ki Aê Diê. Leh anăn phung djiê leh hlăm Krist srăng kbiă lŏ hdĭp tal êlâo hĭn. Leh klei anăn phung drei Aê Diê lui ăt dôk hdĭp, arăng srăng pŭ ba mbĭt hŏng diñu hlăm knam čiăng bi tuôm hŏng Khua Yang hlăm êwa. Snăn drei srăng dôk hlŏng lar mbĭt hŏng Khua Yang” (I Têsalônik 4:16-17)
Klei êmuh ksiêm mĭn: Khua ƀĭng kna Y-Pôl brei thâo si kdrêč phung djiê hlăm Krist hlăm hruê Ñu lŏ hriê? Ya klei phung đăo đăo knang hlăm hruê Khua Yang lŏ hriê? nSi diih hdĭp hlăk êjai dôk guôn hruê dưi dôk mbĭt lă lar hŏng Khua Yang?
Khua ƀĭng kna Y-Pôl wĭt lač klei êmuh phung đăo Têsalônik kơ phung djiê êlâo kơ hruê Khua Yang lŏ hriê. Ñu lač phung anei amâo djiê ôh ƀiădah knŏng “pĭt””. Diñu srăng kgŭ pĭt leh anăn Khua Yang srăng ba dôk mbĭt hŏng Ñu êlâo kơ phung dôk hdĭp. Anei jing “klei Khua Yang blŭ”, kyua anăn diñu amâo guôn rŭng răng ôh kơ phung “pĭt” leh hlăm Krist. Bi phung dôk hdĭp tơdah Khua Yang lŏ hriê, ăt srăng lŏ dơ̆ng “arăng srăng pŭ ba mbĭt hŏng diñu hlăm knam čiăng bi tuôm hŏng Khua Yang hlăm êwa. Snăn drei srăng dôk hlŏng lar mbĭt hŏng Khua Yang” (êlan 17). Anăn jing klei brei diñu đăo kjăp kyua klei myang Aê Diê ngă kơ Khua Yang Yêsu lŏ hdĭp leh si ngă snăn grăp čô phung ƀuôn sang Ñu ăt dưi hgŭm mbĭt hlăm klei kbiă lŏ hdĭp guh kơang anăn (Rôm 6:4).
Snăn, Khua ƀĭng kna Y-Pôl čiăng kơ phung đăo Sang Aê Diê Têsalônik brei thâo săng hĭn kơ Klei Aê Diê Blŭ hưn kơ kdrêč phung djiê leh hlăm Krist ăt msĕ mơh kdrêč phung dôk hdĭp tơl truh kơ ênuk Khua Yang Yêsu lŏ hriê. Đa đa nao êlâo đa đa nao êdei, jih jang dưi bi tuôm hŏng Khua Yang Yêsu ti anôk jăk mơak, lă lar amâo mâo klei bi ktlah ôh. Thâo săng kơ klei sĭt nik anei đru phung đăo kơ Khua Yang mâo thiăm klei čang hmăng, amâo ênguôt hnĭng đei ôh tơdah bi ktlah êjai hŏng găp djuê kyua klei djiê, mbĭt anăn mđĭ ai jih jang mnuih mprăp knuih hdĭp dôk guôn hruê Khua Yang lŏ hriê čiăng kơ jih jang drei dưi dôk mbĭt hŏng Khua Yang nanao.
Phung ƀuôn sang Aê Diê grăp čô găn leh sơăi klei ênguôt hnĭng tơdah luč mnuih hlăm găp djuê. Amâo mâo sa klei bi ktlah amâo ênguôt hnĭng, ƀiădah phung đăo kơ Khua Yang amâo brei ôh klei ênguôt hnĭng anăn kiă kriê hlăm ai tiê klei mĭn leh anăn klei hdĭp pô, kyua drei thâo klă klei sĭt nĭk Klei Aê Diê Blŭ mtô. Klei Aê Diê Blŭ čih kơ klei phung đăo djiê msĕ si pĭt, bhiâo leh anăn phung pĭt srăng kgŭ kyua klei myang Aê Diê, kyua anăn drei jing phung đăo kơ Khua Yang Yêsu amâo ênguôt hnĭng đei, luč klei čang hmăng ôh. Drei hdĭp ti lăn ala ƀiădah ai tiê mđing kơ hruê dưi bi tuôm hŏng Khua Yang Yêsu khăp hơiêng leh anăn phung găp djuê drei khăp hơiêng.
Drei dôk čang guôn hruê dưi dôk mbĭt nanao hŏng Khua Yang mơ̆?
Wah lač: Ơ Aê Diê! Bi mni kơ Ih kyua hlăm Ih kâo dưi hdĭp hŏng klei đăo knang yuôm bhăn hruê Ih lŏ hriê, akâo kơ Ih đru kâo gĭr wah lač leh anăn hur har hưn Klei Mrâo Mrang Jăk čiăng mâo lu găp djuê, ƀĭng găp kâo dưi bi tuôm hlăm hruê jăk mơak anăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Kbiă 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
