Klei Aê Diê Blŭ: Y-Mathiơ 15:10-14
Êlan kliăng: “Êdei tinăn Ñu iêu phung ƀuôn sang hriê kơ Ñu leh anăn lač kơ digơ̆, “Dôk hmư̆ bĕ, leh anăn brei diih thâo săng” (Y-Mathiơ 15:10)
Klei êmuh ksiêm mĭn: Ya ngă Khua Yang Yêsu phung ƀuôn sang hriê? Ya ngă Ñu lač “Dôk hmư̆ bĕ, leh anăn brei diih thâo săng”? Si diih ba yua klei hriăm anei tơdah grăp blư̆ hmư̆ Klei Aê Diê Blŭ?
Khua Yang Yêsu iêô phung ƀuôn sang hriê, jing phung hmư̆ leh phung Pharisi êmuh Khua Yang leh anăn phung ƀĭng kna Ñu kơ bruă amâo rao kngan êlâo kơ ƀơ̆ng mnơ̆ng, Khua Yang čiăng mblang kơ phung ƀuôn sang thâo săng djŏ kơ klei bhiăn mơ̆ng klei bi doh leh anăn čhŏ. Ñu lač, “amâo djŏ mnơ̆ng mŭt hlăm ƀăng êgei ôh bi čhŏ mnuih, ƀiădah mnơ̆ng kbiă mơ̆ng ƀăng êgei, mnơ̆ng anăn bi čhŏ mnuih.” (êlan 11). Klei bhiăn kčah kơ dŭm mta mnơ̆ng doh leh anăn čhŏ (Bruă Lêwi 11) ƀiădah anăn jing klei bhiăn đru bi doh hlăm asei mlei, bruă rao kngan êlâo kơ ƀơ̆ng mnơ̆ng amâo dưi bi doh ôh kơ knuih hdĭp doh jăk, leh anăn amâo rao kngan êlâo kơ ƀơ̆ng ăt kăn dưi bi doh mơh klei soh hlăm mngăt. Knŏng klei ƀai, klei bi roh dôk hlăm lam ai tiê, klei blŭ mgao, luar mơ̆ng ƀăng kƀông, klei mĭn mnêč jhat hlăm kŏ dlô bi čhŏ ai tiê mnuih.
Khua Yang lač “Dôk hmư̆ bĕ, leh anăn brei diih thâo săng”. Phung ƀuôn sang hmư̆ klei mtô, ƀiădah brei ksiêm dlăng čiăng thâo săng klă hĭn anăn jing klei djŏ hŏng klei bhiăn mtô amâodah kyua anak mnuih kčah. Amâo djŏ jih jang klei phung khua gĭt gai klei đăo hlăk anăn, jing phung Pharisi leh anăn phung khua čih hră lač djŏ sơăi, phung hmư̆ brei ksiêm dlăng bi nik čiăng đăm lĕ hlăm ƀăng ôh. Tơdah khua gĭt gai klei đăo mtô djŏ Klei Aê Diê Blŭ snăn amâo djŏ knŏng lač djŏ hlue si Klei Aê Diê Blŭ ôh ƀiădah brei hdĭp djŏ hlue si klei bhiăn Klei Aê Diê Blŭ mơh, jing diñu amâo djŏ phung ai ngăm ôh. Tơdah phung khua kiă kriê klei đăo knŏng mtô kơ phung biăp mđing kơ klei bhiăn ti êngao, dưm klei ktrŏ kăm ghă leh anăn hlue si klei bhiăn… snăn amâo mdê ôh hŏng “phung bum ală atăt êlan”. Hlei pô bum ală hmư̆ leh anăn hlue ngă ƀiădah amâo ksiêm mkă snăn boh jhat jing srăng hrăm mbĭt “lĕ hlăm ƀăng” kyua phung khua gĭt gai anăn ăt srăng tŭ klei Khua Yang bi kmhal (êlan 13-14). Anăn jing mta phŭn ya ngă Khua Yang mtô phung ƀuôn sang “Dôk hmư̆ bĕ, leh anăn brei diih thâo săng”. Ñu čiăng kơ digơ̆ amâo hmư̆ ôh klei mtô soh ngă kơ mngăt ai tiê ƀrư̆ kbưi hŏng Khua Yang, bi luč klei jăk siam mơ̆ng adiê.
Hruê anei, lu phung đăo alah dlăng leh anăn hriăm Klei Aê Diê Blŭ. Diñu knŏng hmư̆ hŏng klei amâo ksiêm dlăng, amâo thâo klei djŏ klei soh. Brei drei tui hriăm hlue si klei bi hmô phung đăo ti Sang Aê Diê Ƀêrê hlăm Bruă Phung Khua Ƀĭng Kna 17:11, “Phung Yuđa anei mâo knuih jăk hĭn kơ phung Yuđa hlăm ƀuôn Têsalônik, kyuadah digơ̆ tŭ klei Aê Diê blŭ hŏng klei čiăng snăk, ksiêm dlăng grăp hruê Klei Aê Diê Blŭ čiăng thâo tơdah klei mtô anăn jing sĭt”.
Tơdah hmư̆ Klei Aê Diê Blŭ, brei drei dlăng hlăm Klei Aê Diê Blŭ čiăng ksiêm dlăng klei mtô djŏ mơ̆ êlâo kơ hlue ngă. Anăn jing klei Khua Yang mtô. Hmư̆ ƀiădah amâo ksiêm dlăng, hlei pô lač ăt hmư̆ sơăi snăn kăp răng huĭdah srăng “lĕ hlăm ƀăng”! Brei drei hriăm klei sĭt nik, thâo săng klei pô đăo leh anăn hdĭp djŏ hŏng klei đăo anăn čiăng mâo klei êđăp ênang kyua thâo drei dôk nao djŏ êlan kơ Ƀuôn Ala Mtao.
Drei dlăng leh anăn hriăm Klei Aê Diê Blŭ grăp hruê čiăng ksiêm dlăng grăp blư̆ hmư̆ mơ̆?
Wah lač: Ơ Khua Yang, akâo kơ Ih đru kâo hriăm Klei Aê Diê Blŭ, thâo ksiêm dlăng tơdah hmư̆ leh anăn êbat nanao hlăm klei Yang Mngăt Jăk ktrâo lač čiăng klei hdĭp kâo amâo bi luč ôh klei jăk mơak Aê Diê brei.Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
