LĐ Êyiptơ 32:9-14
“Đơ̆ng noh tơplih tơdrong Sư tơchĕng wă pơm kơnê̆ lu kon pơlei pơla Sư.” (LĐ Êyiptơ 32:14)
Nơ̆r jet tơchĕng pơwao:
– Đei plei đơ̆ng ‘bok Môis krao khan tơplih noh tơdrong kiơ?
– Lu bơ̆n băt tơdrong kiơ gah tơdrong krao khan tơplih?
– Tơdrong ‘nâu ba pơchŭt ăn kơ bơ̆n thoi yơ lăm tơdrong krao khan tơplih?
Đơ̆ng tơdrong ‘bok Môis krao khan tơplih ba ăn tơdrong lơi yua tih dêh, “Kră Yang ‘Bok Kei-Dei ưh kơ đei pơrăm tơdrong tih krưp kơ kon pơlei Sư kơdih”. Nơ̆r “achăng ưh kơ pơm” kŭm gơh tơblang “tơplih tơdrong wă pơm”. Kră Yang ‘Bok Kei-Dei ưh kơ đei layơ wă tơplih mălei jơ âu “tơplih” (Jô̆ bơngai 23:19). Thoi noh nơ̆r mă pơm ăn kơ bơ̆n hlôh noh yua kơ ‘mêm mơnat na Kră Yang ưh kơ wă phak kon pơlei pơla Sư thoi Sư mă trŏ kơ wă phak.
Hơdai lăm tơdrong noh, tơdrong mă Kră Yang “tơplih” đơ̆ng nơ̆r ‘bok Môis apinh noh jơ̆ Kră Yang đei sơng iŏk tơdrong krao khan đơ̆ng lu bơngai mă hli yom kơ Kră Yang na tơ’bôh tơdrong mơsêh păng tơdrong mơnat đơ̆ng Sư. Tơdrong âu tơ’bôh kơ nơ̆r pơma mă Kră Yang wă phak pơrăm đơ̆ng Sư thoi âu: “Athei Mơ̆ng kơ Inh pơm” (trong 10). Dah Kră Yang ưh kơ wă ‘bok Môis pơgăn lei yua kơ kiơ Sư pơma thoi noh? Tơpă, Kră Yang ‘Bok Kei-Dei ‘maih wă ba ăn kơ ‘Bok Môis lăm tơdrong krao khan kơ kon pơlei pơla Sư, lăm minh trong đĕch noh jơ̆ krao khan apinh đĕch. Đơ̆ng rŏng kơ tơdrong âu Kră Yang wă bơtho tơ’bôh ăn kơ bơ̆n tơdrong gĭt kăl lăm tơdrong krao khan apinh. Pơma phara wă khan Kră Yang dan tơdrong krao khan apinh đơ̆ng ‘Bok Môis tŏk bŏk kon pơlei hăm Kră Yang, wă khan dan ‘Bok Môis krao khan tơplih tŏk bŏk kơ ‘Bok Kei-Dei hăm lu kon pơlei pơla sư.
‘Bok Môis gơh krao khan tơplih kơ lu kon pơlei pơla Sư wă chă tơdrong mơnat đơ̆ng Kră Yang yua kơ tơdrong yoch kon pơlei pơla sư. ‘Bok Môis đĭ jơhngơ̆m ‘mêm kơ kon pơlei pơla Kră Yang, dan tơdrong lơi yua kon pơlei pơla hloh kơ tơdrong lơi yua kơdih sư, hloh kơ đĭ đăng sư dan tơdrong ‘lơ̆ng rŏ Kră Yang ‘Bok Kei-Dei noh hloh kơ đĭ đăng. Đunh đơ̆ng rŏng kơ ‘nâu, Kră Yang Yêsu Krist – Tơ’ngla mă krao khan tang tih tơpă – kŭm đei krao khan kơ lu bơngai mă pơ̆ng Sư tơ’long pơglang (Luka 23:34). Kŭm nhen minh ‘nu bơngai đĭch lăm Mathiơ 18:23-25, lu bơ̆n đei hre kơ Kră Yang mă bơ̆n ưh kơ kĕ ăn, kŭm đei bơngai nai mă hre kơ bơ̆n tơdrong hre iĕ ioch. Tơdah băt kơ Kră Yang yua kơ Kră Yang đei mơnat ăn kơ tơdrong yoch bơ̆n lei bơ̆n kŭm kăl kơ mơnat ăn kơ ‘nhŏng oh bơ̆n đei pơm yoch hăm bơ̆n, ‘mêm mơnat kơ lu sư, pŭ trăp hơdai lu sư păng krao khan tơplih kơ lu sư (Galati 6:1-2).
Chăl dang ei, Kră Yang Yêsu oei ling lang krao khan tơplih kơ lu bơ̆n (Hêbrơ 7:25; I Yôhan 2:1-2), păng ‘Bok Kei-Dei krao bơ̆n wă kơ bơ̆n krao khan tơplih ăn kơ bơngai nai (Êphêsô 6:18; I Timôthê 2:1-2), athei ‘blŏk đei lơ bơngai oei krao khan tơplih ăn kơ bơ̆n tơdrong arih gah bơhngol kŭm dai tơdrong arih gah sĕch akar, thoi noh kăl kơ hŏk pơhrăm đơ̆ng chăl arih Kră Yang Yêsu hăm ‘Bok Môis, krao khan ăn kơ bơngai jê̆ bơ̆n wă kơ lu sư đei tơdrong mơnat đơ̆ng Kră Yang păng arih hiôk hơiă hăm Kră Yang.
Ơ Kră Yang, inh bơnê kơ tơdrong mơnat đơ̆ng Ih mă ăn bơih kơ inh, inh bơnê kơ Ih yua kơ Ih đei mơ̆ng nơ̆r bơngai nai mă Krao khan tơplih ăn kơ inh. Apinh ih tơgŭm inh pơtrơp tơdrong jang Krao khan tơplih ăn kơ lơ bơngai nai. Krao khan yua anăn Kră Yang Yêsu Krist, Amen.
Lu bơ̆n đei krao khan tơplih ăn kơ bu? Lăm tơdrong kiơ?
Đŏk Sơ̆p Hla Bơar ‘Bok Kei-Dei lăm pêng sơnăm: Êsai 3-4
Kênh Youtube BHKTHN:
